وانگءِ نوکیں سالءِ پِربیگ پہ دو زبانیں نودربراں هاس ماں وانگءِ سالءِ بنداتی روچاں، گوں هما نودربراں کہ آیانی وانگءِ ءُ ماتی زبان یکین ٳنت مزن پرک ءُ پیرے داریت.
اچ دو زبانیں هلکهاں مراد، هما هلکہ أنت کہ آیانی اسلی ءُ ماتی زبان ابید اچ پارسی زبانءَ ٳنت.
پہ درور اے هلکهاں کہ آیانی بنندجاه پہ بلوچی، کردی، ترکی، لری، عربی زبانءَ گپ جن أنت. ماں ایرانءِ سرڈگارءَ آیانی شمار نیم ٳنت (بزاں نیمے پارسی ءُ دگہ نیمے ماں دگہ زباناں گپ جن أنت).
وانگءِ نوکیں سالءِ بنداتی روچءَ ماں اولی کلاسءَ سرجمیں نودربر پارسیءِ نبشتہ کنگءِ رهبندءَ سوج گرأنت بلے ماں دو زبانیں هلکهاں، نودربر بایدٳنت یک نوکیں زبانیءِ یاد گرگءَ ساڑی بہ بنت ءُ آئیءِ نبشتہ کنگءَ بہ سِک أنت ءُ پہ المی اے گرانءُ مشکلیں کارے.
بلکیں اے نودربرانی وانگءِ یل دئیگ ءُ سبکانی نا دلگوشی سبب یکے همئے بہ بیت. چیا کہ نودربر ماں اے هلکهاں بایدٳنت یک نوکیں زبانیءِ وانگءُ یاد گرگءَ گلایش بہ بنت بلے ماں دگہ هلکهاں نودربر هما زبانءَ کہ زان أنت ءُ آئیءِ گالانی بزانتءَ گیشینت کن أنت گڑا هما زبان ءِ نبشتہ کنگءَ هم یاد گرأنت.
اچ ایشیءَ ابید ماں دو زبانیں هلکهاں، نودربرانی ماتی زبان پارسی نہ ٳنت. آئی گوں دگہ زبانیءَ گپ جنگءَ لگ ٳیت، مهر شانی کنت، همداری ے بنگیج کنت ءُ اچ مارشتءَ سرریچ بیت، اے نودربرءَ اینچک قدرت نیست ماں وتی وانگءِ بنگیجی روچاں، ابید اچ وتی ماتی زبانءَ، ماں دگہ زبانیءِ تها وتی پکرءُهیالءَ پہ وساچیءَ ساڑی بکنت ءُ آئیءَ پهتہ ءُ الکاپیں گپتارے بہ بیت.
اے بنگپ ماں ٱستادءُ نودربرءِ همداریءِ نیامءَ ءُ درونتءُ سبکانی یاد گرگءَ مزنیں دیمگیرے.
بلے اپسوز بازیں مردمے ءُ بلکیں هکومتی منصب دارءُ واننده ایں مردم هم اچ اے بلاهیں بنگپءَ نا دلگوش ءُ بے کمارأنت،ءُ اے مزنیں گرانیءِ توجیل نہ بیگ ءِ مستریں سبب هم همیش ٳنت.
مئے هیالءَ بہ بیت کہ ایرانءِ سرڈگار میاں رودرآتکءِ ،آپریکاءِ گوریچاں، یوروپ ءُ نیامی ایشیاءِ (آسیا) نیامءَ گیشتریں زبانانی واهند ٳنت کہ هچ سرڈگارے اچ اے نام گپتگیں جاهاں گندگ نہ بیت کہ اینچک زبانءِ واهند بہ بیت.
ماں دگہ ملکاں کہ بازیں زبانانی واهندأنت چو کہ(أنڈیا، سویڈن، عراق، اوگانستان، بلژیک) هکومتءَ ماتی زبان ءِ یادگرگ ءِ أزباب ماں وانگجاهاں ساڑی کتگ أنت.
مئے اوستءُ ودار اچ ایران ءِ هکومتءَ همیش ٳنت گوں مزن هیرت چاریءَ ءُ رهبندانی ٹهینگءَ وانگ ءِ هستیں رهبنداں ماں هما هلکهاں کہ اودءِ جاهمنند دو زبان ءِ واهندأنت مٹ ءُ بدل بکنت ءُ پہ اے گرانی ءَ توجیلے در بگیج ٳیت تاں اے کہ پارسی زبان هم سرجمیں هندانی زبان بہ بیت ءُ هم اے کہ دو زبانی پہ نوک گامیں نودربراں مستریں گرانی مہ بیت.
اچ اے توجیل راهاں یکے ،هما رهبند کہ پہ تهران ءِ دمگءِ املسیںِ وانگجاهاں کارمرز بیگءَ ٳنت بیت کنت. ماں اے وانگجاهاں هما نودربر کہ اچ ایرانءَ ڈن وانگءَ أنت پارسیءَ الکاپی گپ جت نہ کن أنت بلے گوں نوکیں ءُ دلجمیں رهبندے اچ دگہ نودربراں پہ وانگءَ گلایش أنت.
پدا هم پارسی زبان تیوک یک ءُ یا کہ چنت ادار ماں هپتگءِ روچانی تها نہ ٳنت. زبان، همداریءِ یک أزبابے کہ گوں آئیءِ نہ بیگءَ دگہ درونتءُ سبکانی چو کہ (ریاضی،اجتماعی) دربرگ هم گران ءُ مشکلیں کارے.
سرچمگ:عصر ایران/رضا غبیشاوی
رجانک:محمدامیری
چمشانک