سنیآنلاین/ مولانا مفتی احتشامالحق آسیاآبادی و واجهَے زهگ مولوی شبیراحمدیکشنبه 3 مرداد 1395 ئے بیگاها گوں سلاهبندیں ناشناسانی تیرگواریا شهید کنگ بوت.
واجه مولانا مفتی محمدقاسم قاسمی، دارالعلوم زاهدانَے دارالافتایَے کارمسترا و ندای اسلامَے فصلتاک/سےماهییَے سرشونکارا ماں دارالعلوم زاهدانَے استاد و مدرّسانی دیوانا که سےشنبه 5 مرداد 1395 برجم دارگ بوت، وتی دلپدردی چه اِے هالا درشان کرت و واجهَے باروا گوشتی:
وهدے که من ماں دارالعلوم زاهدانا اول مقدماتا وانگ اِتاں گوں مولانا احتشامالحقّا همکوٹی/ هماتاقی بوتاں. آ وهدی منی هیالا واجه موقوف علیه (هپتمی سالا) وانگ اَت. گوں اِشی که وت طالبے اَت بلے طالبانی درمیانا اصلاحگری نقشے آئیا هست اَت. همیشه مدرسه و طالبانی اصلاحَے فکرا اَت. یکبرے منی گوشت: اگه لوٹئے شر درس بوانئے «تعلیمالمتعلم» کتابا بوان. من گوشت: استادے نے که منا درس بدات. مولانا گوشت: من وت ترا درس دیاں و رندا منی اِے کتاب درس دات و په من باز مفید بوت.
مولانا احتشامالحق رحمهالله، ها په اهلسنتَے طالبانی جمعیتَے جوڑکنگا باز جهد کرت. طالبی زمانگا گوں استاداں انچوشکه مولانا مفتی محمدشفیع و مولانا محمدتقی و دگراں حتا هما استاداں که گوں آیاں درسی نیست اَت چه نزیکا رابطه هست اَت و اِے رابطهای تا آخرا داشت. همے پیم گوں ایرانَے واجهاں ارتباطی هست اَت هر وهد که یک ایرانی عالمے چوشکه مولانا عبدالعزیز، مولانا شهداد، مولانا محمدیوسف، مولانا خالد و دگرے پاکستانا که شت، گڑا ضرور آئییی وتی طالبی ناشتا یا شام و سبارگے دعوت کرت و مهاندارییَے حقّی ادا کرت.
مولانا آسیاآبادیا وتا ماں یک میدانے محدود نکرت. واجه، تمامیں چوٹ و گمراهیں گروهانی دیما چوشکه مسیحیت اوشتات. حضرت شیخالاسلام مولانا عبدالحمیدَے گورا بهت و چو گونڈیں زهگے گریت و گوشتی: په مئے نوکیں نسلا کلیسا جوڑ کنگ اَنت. مئے نسلا مسیحتَے نیمگا کشّگ اَنت. واجه، دیمی نسلَے فکرا اَت.
مولانا احتشامالحقا مدرسهیَے کارانی تها تقوای یَے دامنی ویل ندات. سُهلانی گرگا سک صبور اَت. په همے محبوبیت، اخلاص و کماشی واستا مزنیں پروندهیانی حلّ و گیشّینگا حتی ماں ایران، پیشّن و ایرانشهرا سک موفق اَت. اگه بزانتینی که شاگرد و استادانی در میانا اختلافے هست، اول سرا همائی حل کرت. یکبرے سهی بوتگت که مئے استانَے زرباری/جنوبی نیمگا یک مدرسه اِے مدیر و استادانی در میانا کمے اختلاف هست، هما دمانا اودا شتگت و مسئلهای حل کرتگت.
واجهَے محبوبیت چه یک گروه و ملکیا چه برزتر اَت همے واستا واجهَے شهادتا پهک متاثر کرتنت حتا که بلوچستانَے آجویی لوٹاں/ ملیگرایاں و زگریاں هں بیانیه صادر کرتگ و واجهَے شهادتش یک کوششے په علم و زانتَے چه بین برگ ماں بلوچستانا زانتگ.
مولانا احتشامالحقا په ایرانَے اهوالا باز شوق هست اَت. من هچ پاکستانے عالمے ندیستگ که اِے اندازه ایرانَے هالاتا شوقی ببیت. گوں مولانا عبدالحمید و مولانا عبدالعزیز دوستی هست اَت و وهدے که ما گوں واجها گندک کرت زانتیں که واجه لهتے چه مئے درمیانَے گونڈیں مسائلاں سهیگ اِنت و وتی پشنهادی هں پیش کرتنت.
مولوی شبیراحمد که مولانا احتشامالحقَے زهگ اَت ماں اِے حادثهیا شهید کنگ بوت، آئی سکیں ذهن والایے اَت و علمی لحاظا سک گوں مولانا احتشامالحقا نزیک اَت. چو که جاه کئیت اِے ترورَے برنامه چه پیسرا طراحی و کَشّگ بوتگت. اللهم اغفرله و ارحمه و لا تفتنّا بعده.
چمشانک