مروچی : 6 مرداد , 1395
مولانا عبدالحمیدا ماں گپ‌وترانے گوں «سنی‌آن‌لاینا» گوشت:

زوراکاں لوٹِت که مصرَے هالاتا ترکیایَے سرا بیار اَنت/ ترکیایَے کودتایَے پروش ورگ په پهکاں عبرتے بیت

زوراکاں لوٹِت که مصرَے هالاتا ترکیایَے سرا بیار اَنت/ ترکیایَے کودتایَے پروش ورگ په پهکاں عبرتے بیت

سنی‌آنلاین: لهتے چه ترکیایَے پوجیاں/ارتشیاں گوستگیں جمعه‌یَے بیگاها(25 تیر/ 15 جولایا) لوٹت که ترکیایَے حکومتیا تهبیل بگرنت، بلے گوں ترکیایَے مردم و دولتَے هُژّاریا ناکام بوتنت.
بازیں ملکے کماش و رهشون و دگه سیاسی و علمی رهبر و کارمستراں و بازیں عالم و زانتکاریا ترکیایَے پوجیانی اِے کار په ترندی اِیرجتگ و ترکیایَے مردم و اردوغانَے دولتَے کامیابی و پیروزی په آیاں «مبارکبات» گوشتگ.

🔹شیخ‌الاسلام مولانا عبدالحمیدا هں ماں گپ‌وترانے گوں سنی‌آنلاینَے هال‌رسانی سایتا، ترکیایَے مردمانی کامیابی‌ مبارکبات گوشتگ و رجب طیب اردوغان یک «دلیریں» مردے زانتگ که توانتگی پوجیانی دیما بوشتیت و آیانا ناکام بکنت.
واجه مولانا عبدالحمیدَے «گپ‌وتراں» گوں “سنی‌آنلاینا” شما را پیش کنگ بیت:

🔸واجه! شمئے دیدانک په ترکیایَے ناکامیں کودتایا چی اِنت؟
🔹پوجیانی پروش ورگ ماں ترکیایا یک وشّیں هالے اَت، هں په اسلامی ملکاں و هں په کل جهانا. گوں کودتایَے پروش ورگا ماں اِے ملکا قانونی حکومت و دموکراسی و اسلام‌لوٹی یَے ڈیکی و بُن‌جاه مُهرتر بوتنت. منی هیالا اِے آخری کودتا اِنت که ترکیایا پیش آتک. اِے ملکا دگه کودتا پیش نیئیت. ما اِے کامیابیا په ترکیایَے دولت و ملّتا مبارکبات گوشیں.
ترکیایَے ناکامیں کودتایا پیش داشت که دنیایَے زوراک و مستکبراں چه پیمیں ٹوهین و شومّیں نقشه په اسلامی ملکاں کشّتگ. زانگ بوت که زوراک نه اِشی که نلوٹنت سوریا، عراق و یمن و دگه اسلامی ملکانی مشکلاں گیشّینَنت، بلکیں انگت په اسلامی ملکانی بربادیا ٹوٹَل جنَنت.
زوراکاں رند چه اِشی که مصرَے مردمانی انقلاب گوں کودتا نابود کرت، چه پدا آواں لوٹت که گوں کودتا ترکیایَے حکومتا هں نابود بکننت. اِے کودتا یک معمولی و ساده‌ئیں موضوعے نبوتگ، بلکه په اِشیا باز نقشه و برنامه کشّگ بوتگ تا که اِے ملکا هں گوں مصرَے سرنوشت و عاقبتا دچار کننت.

🔸واجه! شمے هیالا ترکیایَے ملتَے کامیابی‌یَے سوب و علت چی اَت؟
🔹ترکیایَے مرماں بازیں کودتائے تجربه کرتگ. ترکیایَے تمامیں عقب‌منتگیانی سوب همے بازیں کودتا بوتگنت. اِے کودتایَے پروش وارتنَے اصلی سوب الله تعالایَے غیبی کمک و نصرت اَت، پدا مردمانی مقاومت و پوجیانی دیما اوشتگ سبب بوت که کودتا پروش بوارت. ترکیایَے آگاهیں مردماں دربوت اَنت. پوجَے اصلی پرماندهاں هں گوں کودتا همراه نبوتنت، پلیس و ترکیایَے کارمستر هں کودتایَے دیما اوشتاتنت.
واجه رجب طیب اردوغانا واکی ماں اِے پیشامدا چه وت دلیری پیش داشت و شگر انت که اِے کودتا پروش وارت. حققیت اِشنت که اِے کودتایا هچ حامی و دیمپانی نیست اَت. اِے کودتایَے طراح و واهگداراں وتی حسابانی تها رَد وارتگت، پرچے که ترکیا و مصر یک‌پیم نهنت. مصرَے مردم نوک آگاه بوتگ اِتنت. بلے ترکیایَے مردم دیر اِنت که آگاه بوتگنت. ترکیایَے مردم وتی دینی تمنایانی پدا اَنت. جاه یئیت که اِے کودتاگر بے‌عقل و نازانت بوتگنت، نچارتگش که باریں اِے کودتایا مردمانی کِرّا ارزشے هست یا نه؟ اِے کودتا په تمامیں مردماں عبرتے بیت.

🔸واجه! شمے هیالا اِے کودتایَے ڈنّی و خارجی لوٹوک و واهگدار کئی بوتگنت؟ و مرادش چے بوتگ؟
🔹منی هیالا دنیایَے مستکبر و رونندی زوراک، و زوگیریں اسرائیل؛ همایاں که مصرَے کودتایا دستش بوتگ، ماں اِے کودتایا هں هور بوتگنت. البت لهتے چه شرقی و رودراتکی زوراکاں چه اِے کودتایا بے میل نبوتگنت. کودگراں ضرور گوں رودراتکی و رونندی زوراکانی سبزیں چراگ/لَیٹَے پیشدارگا اِے کار کرتگ.

🔸واجه! پچے ترکیایَے تمامیں مردماں حتی هما گروه و پاٹاں که دولتَے مخالف اَنت، گوں اِے کودتایا مخالفت کرت؟
🔹اے مخالفت و کودتایَے نه منّگ آیانی هژّاری و آگاهی‌یَے نشانی اِنت. پچے که کودتا یک تروریستی کارے و اصلی تروریست همے کودتاچی اَنت که قانونَے خلافا چِست بنت و گوں گُلدری لوٹنت زورا دستا بیار اَنت.

🔸واجه! شما را چه پیگامے په ترکیایَے ملّتا هست اِنت؟
🔹امیت اِنت که ترکیایَے دولت و حکومت رند چه اِے جریانا گیشتر په وتی آگاهیں ملتا دلگوش کنَنت و په احزاب و گروهاں که ترکیایَے تها سیاسی فعالیت و جهد اِش هست گیشتر آیانی هال‌چونیا کنَنت و آیانی آزاتیا تامین کنَنت.
امیت اِنت که دگه ملکاں هں قانون/کانود برجاه دارگ ببیت. و دولت په وتی ملتاں دلگوش کنَنت و آیانا گوں وت هور کنَنت. اگه ملت هور ببیت، گڑا حکومت چه هر آپت و مصیبتا بَچّ اَنت.


چمشانک

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *