دارالعلوم زاهدانِ قرآن مجیدِ دوره تفسیرِ گُڈی دیوان مرچی ظهرِ نماز چه پد، 12 تیر 1395( همدپ گوں26 رمضانالمبارک 1437) ماں زاهدانِ مکّی مسیتّا برجم دارگ بوت.
په “سنیآنلاینِ” هالکاریا ماں اِے دیوانا که بازیں مردمے چه زاهدانِ کِرّ و گوراں ماں مکی مسیتا مُچ بوتگ اِتنت، واجه مولانا عبدالحمیدا قرآن مجید دوئیں گُڈی سوره بزاں معوذتین (قل أعوذ برب الفلق- قل أعوذ برب الناس) په مردماں تفسیر کتَنت.
مولانا عبدالحمیدا اول سرا چه مولانا عبدالغنی بدری دارالعلوم زاهدانِ تفسیرِ استادا په اِے دورهیِ برجم دارگا منتواری کرت و اِے دورهیِ برجم دارگی یک توفیقے چه اللهِ نیمگا زانت.
دارالعلوم زاهدانِ کارمسترا دیما په اِے دورهیانی تفسیری داب و روشا اشاره کرت و گوشتی: اِے تفسیری دورهیانی داب و روش په قرآن مجیدِ تفسیرا، شیخالتفسیر مولانا حسینعلی، شیخالقرآن مولانا غلامالله خان و مولانا عبدالغنی جاجروی (رحمهمالله) داب اِنت. ماں اِے دورهیاں په قرآن مجیدِ پهمگ هما سلفصالحِ پهمِ مطابقا تاکید بیت و چه وتسریں تفسیرا پهریز کنگ بیت. همے پیم ماں اِے تفسیری روش چه اسرائیلی روایت و بےسریں روایتاں پهریز کنگ بیت. البت اِے دورهیانی استاد همُک دابیں تفسیراں مطالعه کنَنت و واننت.
واجه مولانا عبدالحمیدا دیما سوره معوذتین بزاں (قل أعوذ برب الفلق- قل أعوذ برب الناس) په مردماں تفسیر کتَنت و گوشتی: اِے دوئیں سورهیاں په یهودیانی مکر و حسدّا اشاره کنَنت که مدینهیِ یهودیاں لوٹت واجه پیگمبرا سِحر بکنَنت، پمشا که واجه پیگمبر چه حضرت ابراهیمِ اوبادگان اَت آیاں زهر آتک که پرچے چه حضرت اسحاق و یعقوبِ نسلا یکے په پیگمبری گچیں کنگ نبوتگ.
واجها دیما گوشت: چه قرآن و روایاتِ چارگا جاه کئیت که ساحر و جادوگراں تاریخِ دراجیا گیشتریں مخالفت گوں اهلحقّا بوتگ. گیشتریں جادوگر کافر اَنت. جادو انسانِ ایمانا چِنت و کِنچی کنت. الله تعالایا ماں اِے دوئیں سورهیاں ما را تعلیم داتگ که وهدے گوں سحر و جادو دپ کپتیں، گڑا په اللهِ مبارکیں ناماں متوسل به بئیں و په اللهها پناه ببریں.
زاهدانِ جمعهیِ پیشنمازا گوشت: اِے دوئیں سورتاں «ربِّ» لبز باز تکرار بوتگ، اِے لبز اللهِ گورا باز دوستناک اِنت. قرآن مجیدِ بازیں دعائے گوں «رب» بنگیج بنت. «رب» اللهِ رحمتانا جوش کاریت. دعایِ وهدا اللهها گوں همے لبزا یادکنیں تا دعا زودتر قبول کنگ ببنت.
شیخالاسلام مولانا عبدالحمیدا په اِے دوئیں سورهیانی فضیلتِ باروا گوشت: پیگمبرا اے سورهیانی فضیلت باروا باز گوشتگ. ماں روایتا یهتگ که اے دوئیں سوره رند چه هر نمازا وانگ ببنت. پیگمبرا همیشه اِے سوره وانتگنت، ما و شما گیشتر محتاج ایں.
اِے ایمانی دیوان گوں واجه مولانا عبدالحمیدِ دعایا تمام بوت.
گوشگی اِنت که قرآن مجید ترجمه و تفسیرِ دوره همُک سال شعبان و رمضانِ ماها ماں دارالعلوم زاهدانا برجم دارگ بیت.
چمشانک