شیخالاسلام مولانا عبدالحمیدا ماں جمعهیِ گپاں (14 خرداد1395) گوں اشاره په رمضانِ ماهِ نزیکیا، تاکیدی کرت که وتا و وتی گِس/لوگِ مردماں په رمضانِ پر خیر و برکتیں ماهِ دیمراهی و استقبالا تیار کنِت.
واجه مولانا عبدالحمیدا ماں وتی گپانی اولی بهرا گوشت: رمضانِ ماه نزیک اِنت. رمضانِ ماهِ عبادت، یکے چه هما برنامهیان اِنت که الله تعالایا په انسانانی اصلاح و نیکبیگا گچیں کرتگ. اگه انسان په الله تعالیِ اصلاحی و تربیتی برنامهیاں عمل بکنت، گڑا آئیِ نفس پاک و صاف بیت.
زاهدانِ جمعهیِ پیشنمازا دیمترا گوشت: ماں بازیں حدیثے په رمضانِ ماهِ شپانی زندگ کنگا تاکید بوتگ. اهلسنتِ عقیده و باور همشنت که «تراویحِ نماز» پیگمبر صلیاللهعلیهوسلمِ سنت اِنت. چنت شپا پیگمبرا وت په اِے نمازا پابندی کرتگ و رند چه واجها، خلفای راشدینا اِے دگه صحابه که وتِش گروه گروه نماز وانت، مُچ کتنت و ماں یک پیشنمازے پشت اوشتارائینت اَنت. رندا اِے عمل حضرت عثمان و حضرت علیِ دورا پشت کپت و همے سنت مسلمانانی در میانا بر جاه منت.
دارالعلوم زاهدانِ کارمسترا دیما دَرّائینت: ما و شما باید وتا په رمضانِ ماهِ عبادتا تیار کنیں، تا ماں اِے ماهِ روژنائیا ما و شما په وشنامی و لائکیا دست کپیں. ماں اے ماها الله تعالایِ رحمت گیش بنت، باید وتا و وتی لوگِ مردماں په رمضانِ پر خیر و برکتیں ماهِ دیمراهیا تیار کنیں.
زاهدانِ جمعهیِ پیشنمازا گوشت: باید ماں اِے ماها په دعا و تضرع و زاریا پابند بئیں. بےوس و بزّگیں مردماں کمک کنیں. الله تعالایا گوں شیطانانی بند کنگا عبادت و نفسِ پاکی په ما آسان کرتگ. رمضانِ ماه وتسازی و نفسِ پاکی چه تمامیں رذایل و بدیان اِنت. ماں اِے ماها باید تمامیں گناهاں ویل دئیں.
مولانا عبدالحمیدا گوں اشاره په تراویحِ نماز و قرآن مجید ختم کنگا ماں اے نمازا ، چه حافظانی لوٹت که نمازانا گوں آرامی و کرار بوان اَنت تا اللهِ بارگاها قبول کنگ ببنت.
همے پیم واجها چه تمامیں مردماں لوٹت که وتی کار و سفراں په رند چه رمضانا بلّ اَنت، و رمضانِ ماها په اللهِ یات و عبادتا خاص کنَنت.
واجها وتی اِے بهرِ گپانی گڈسرا چه مردماں لوٹت که یکشنبهِ بیگاها (16 خرداد) په رمضانِ ماهِ هلال و نوکِ چارگا جِهد کنَنت و اگه یکشنبهِ بیگاها نوک گندگ نبوت، سےشنبه روچ الّما رمضان مبارکِ اولی روچ اِنت.
واجه مولانا عبدالحمیدا وتی گپانی دگه بهرے چه اهلسنتِ یک جهگیرے جاه دیگ ماں پارلمانِ هیئت رئیسه و کارمستری دیوانا، وتی گَلی و وشهالی درشان کرت و گوشتی: دیمی هپتگا ماں جمعهِ گپاں ما یک لوٹے داتگت که چه اهلسنتِ نماینده و جهگیراں ماں پارلمانا یک نپرے باید په مجلسِ هیئت رئسهیا گچیں کنگ ببیت که مرچی الحمدلله اِے لوٹ پوره بوت و اهلسنت یک نمیاندهاِے ماں هیئت رئیسهیا جاه دیگ بوت. حکومتِ اِے پیمیں کار په وحدت و تپاکیِ برجم دارگا کمک کنت.
همے پیم واجها راجکماش ڈاکٹر حسن روحانیِ گپ ماں مهابادا که “گوشتگی هچ قوم و مذهبےیا ماں مالکا اِے حق نیست اِنت که وتا چه دگه قوم و مذهباں برزتر بزانت، بلکیں ماں ایرانا تمامیں قوم و مذهب گوں وت برابر اَنت و باید چه تمامیں قوم و مذهبانی توامندیں مردماں کارگرگ ببیت” حقّاِیں گپ زانت اَنت.
مروچی :جمعه, ۷ اردیبهشت , ۱۴۰۳
چمشانک