واجه مولانا عبدالحمیدا ماں وتی جمعهیِ گپاں (8 خرداد 1395) گوں اشاره په دولتی مدرسهیانی چُٹّی و تعطیلیا، په زهگانی دینی احکام و مسائلِ یادگرگا تاکیدی کرت.
شیخالاسلام مولانا عبدالحمیدا ماں وتی گپانی اولی بهرا گوں آیه «يَا أَيُّهَا الَّذِينَ آمَنُوا قُوا أَنفُسَكُمْ وَأَهْلِيكُمْ نَارًا وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلَاظٌ شِدَادٌ لَا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ» [تحریم: 6] وانگا گوشتی: الله تعالی ماں اِے آیتا پرمائینیت که وتا و وتی زهگاں چه آسے که آئیِ دار انسان و سِنگ انت نجات دیت.
واجهها دیما گوشت: ماں همے آیتا یهتگ که اللهها جهنمءِ آسِ سرا هنچیں فرشته اِشتگ که اللهها ناپرمانی نکننت. اے فرشتهیاں چه جهنمیانی آه و پریاتاں رحم نیئیت، بلکیں بدتر هژم گرنت؛ پچے که انساناں پیگمبر و وتی خیرخواهانی گپ گوش نداشتنت.
دارالعلوم زاهدانِ کارمسترا گوشت: الله تعالی مئے اصلاح و پاکی و همے پیم لوگِ مردمانی اصلاح و تزکیه مئے ذمهها اشتگ، الله تعالی چه ما لوٹتگ که وتیگ و وتی زهگانی تربیت و اصلاحا کوشش کنِیں.
واجهها گوں اشاره په دولتی مدرسهیانی تعطیلیا چه پت و ماتاں لوٹت که په وتی زهگانی دینی احکام یادگرگ و تعلیما آیانا قرآنی مکتب و هما مسجداں که قرآنی کلاس برجم دارنت دیم بدیت.
زاهدانِ جمعهیِ پیشنمازا گوں اشاره په ماه مبارک رمضان نزیکیا گوشتی: شعبان و رمضان ماه نفسِ اصلاح و وتسازیِ ماهانت. گوں ذکر، تلاوت، روچگ و دعا په رمضانا تیاری کنت.
امیت انت که گوں حکومت برنامهیاں، ملکی مردمانی بےکاری و بےدندائیِ مشکل حل ببیت
شیخالاسلام مولانا عبدالحمیدا ماں دگه بهرے چه وتی جمعهیِ گپاں په چهبار منطقه آزاتِ بُرزیں اقتصادی جاها اشاره کرت و گوشتی: چهبار، مرچی نه تهنا استان سیستانوبلوچستانِ اقتصادی پیشانیگ زانگ بیت، بلکیں مرچی ملک اقتصادی پیشانیگ چهبار انت. رهشون و راجکماشِ توجه و دلگوشا په چهبار منطقه آزاتا، اِے منطقه، یک مزنیں تجاری و باپاری جاهے بدل کرتگ.
دارالعلوم زاهدانِ کارمسترا په نوکیں اجلاس «آیورا»یِ برجم دارگ ماں چهبارا اشاره کرت و گوشتی: نوکیں اجلاس که راجکماشِ کمکّار و چنت وزیر و دگه بازیں درملکی مهمانے حاضریا ماں چهبار برجم دارگ بوت په منطقهها ٹوهیں فرصتے ات. گوں اِے اجلاس برجم دارگ ماں چهبارا دیما شرکت و تاجراں گیشتر په اِے ملکا دلگوش کننت.
زاهدانِ جمعهیِ پیشنمازا دیما گوشت: ما را امیت انت که دولت ٹوهیں طرح و پروگرام بتواننت اے استانِ بےکاری وبےدندائیِ مشکلا حل کننت، پرچے که اِے مردم چه ملک دگه مردماں گیشتر گوں فقر و بیکاریا دپ کپتگنت.
چمشانک