مروچی :پنجشنبه, ۹ فروردین , ۱۴۰۳
واجه مولانا عبدالحمید، زاهدانءِ جمعهءِ نمازءِ دیوانءَ:

آخرتءِ توشگ تقوا و نیکیں عمل اِنت

آخرتءِ توشگ تقوا و نیکیں عمل اِنت

واجه مولانا عبدالحمیدءَ په آخرتءِ سفرءِ تیاری و آمادگیءَ تاکید کرت، «تقوا» و «نیکیں عملی» آخرتءِ توشگ زانت.
په سنی‌آنلاینءِ هالکاریءَ، واجه مولانا عبدالحمیدءَ زاهدانءِ جمعهءِ‌ نمازءَ(10 اردیبهشت 1395) گوشت: انسان باید چه دنیاءِ فرصتءَ په آخرتءِ سفرءَ تیاری بکنت. انسان توانت ماں همے دنیاءَ گوں نیکیں کردار چوشکه نماز، روچگ، صدقه و دگه نیکیاں په آخرتءِ سفرءَ په وت نور و روژنائی جمع بکنت.
واجهءَ دیمءَ گوشت:‌‌‌ قرآن عظیم‌الشأنءَ پرمائینتگ که په وتی آخرتءِ سفرءَ تقوا و خداترسیءَ رعایت کن اِت. کسے که لوٹیت په یک شهر و ملکے بروت په وت توشگے زوریت،‌ همے پیم باید هرکس په وتی آخرتءِ سفرءَ توشگ بزوریت که آخرتءِ توشگ تقوا و نیکیں عمل اِنت. دنیاءَ‌ اگه یکے ءَ توشگ گوں مبیت بلکیں بتوانت چه دگرے کمک بگریت،‌ّ‌ بلے آخرتءَ هچ‌کس نتوانت دگرے ءَ کمک بکنت.
واجهءَ‌ گوشت: دنیا عملءِ جاه اِنت. انسان باید ماں همے دنیاءِ زندگیءَ په وتی آخرتءَ تیاری بکنت تا قیامتءِ روچءَ پریشاں مبیت.
زاهدانءِ جمعهءِ پیشنمازءَ گوشت: باید چه دنیاءِ تمام امکاناتءَ ‌په شری بهر بزوریں و په آخرتءَ تیاری بکنیں.
واجه مولانا عبدالحمیدءَ «دنیاءِ دوستی» تمامیں گناهانی بنیاد زانت و گوشتی:‌‌‌‌‌ مرچی انسان گوں دنیا ءِ محبتءَ گرپتار انت و چه آخرتءَ غافل اَنت. اللهءَ گوشتگ آخرت په شما چه دنیا ءَ گهتر اِنت. دنیاءِ محبت تمامیں گناهانی بنیاد اِنت.

??زاهدانءِ فارغ‌التحصیلی و پاگ‌بندی دیوان، تپاکی و وحدتءِ نشانی اِنت

واجه مولانا عبدالحمیدءَ ماں دگه بهرے چه جمعهءِ گپاں گوں اشاره په زاهدانءِ‌ فارغ‌التحصیلی و پاگ‌بندی دیوانءِ نزّیکیءَ گوشتی:‌ دارالعلوم زاهدانءِ طالبانی دیوان که پنچشنبه 16 اردیبهشتءَ برجم دارگ بیت، په استان و ملکءَ شیعه و سنیءَ خیر و برکتی مان اِنت و په پهکانی پائده انت. اِے دیوان تپاکی و وحدتءِ نشانی اِنت.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *