واجه مولانا عبدالحمیدءَ ماں جمعهءِ وعظاں شیخ باقرالنمرءِ اعدام، گرانیں هبرے زانت و مشکلاتے که رندءَ پیش آتک
خاصکار ایران و سعودیعربءِ زهری په مسلمانانی ضررءَ زانت.
په ایرانءِ اهلسنت هالرسانی سایت “سنیآنلاین”ءِ هالکاریءَ شیخ الاسلام مولانا عبدالحمیدءَ ماں زاهدانءِ جمعه (18 دی 1394/ 27 ربیعالاول 1437/10 ژانویه 2016) ءِ وعظاں په شیخ باقر النمرءِ پاهو/اعدامءَ اشاره کت و گوشتی: شیخ نمرءِ اعدام گرانیں هبرے اَت و بازیں مردمے پریشان و جذباتی کت. شیخ نمر یکے چه سعودی عربءِ عالمان اَت که رند چه زندانیءَ بازیں دوزواه و پاٹی یے په آئیءَ در کپت.
واجه مولانا عبدالحمیدءَ گوشت: شیخ نمرءِ اعدامءَ نه تهنا شیعه دلپدرد کرت اَنت، بلکیں شیعه و سنی چه اے کارءَ دلگران بوت اَنت، پرچے که عالمانی کشگ شیعه و سنی حتی مسیحی عالمانی کشگ، مردمانی جذبات و احساساتءَ ٹپّی کنت، مگر اشی که آ عالم قتلے بکنت و رندءَ شریعتءِ حکم آئیءِ سرا جاری کنگ به بیت. بلے عالمے خاصکار هنچینے که مردماں په آئیءَ واهگ هست و قتل و کوشے نکرتگ، گڑا اِے نباید کشگ به بیت و مردمانی جذبات چست کنگ به بنت.
زاهدانءِ جمعهءِ پیشنمازءَ دیمءَ گوشت: رند چه شیخ نمرءِ اعدامءَ بازیں اعتراضے کنگ بوت. ما هں اشیءِ اعدام تقبیح کت و بد زانت . اگه یکےءَ مشکلے هست، باید دگه نرمیتریں رپتارے گوں آئیءَ کنگ به بیت، سزایی کشگ نه اِنت.
واجهءَ دیمءَ په سعودیءِ سفارت و کنسولگریءِ اُرُش ماں ایرانءَ اشاره کت و گوشتی: اُرُش/حملهاے که سعودی عربءِ سفارتءَ ماں تهران و کنسولگریءَ ماں مشهدءَ کنگ بیت، ایرانءِ مردم اے کارءِ لائق نه اِتنت، پرچے که سفارتجاه و کنسولگریانی سرا ارش شریعت، عقل و بینالمللی قانود/قانونءِ خلافءَ اِنت. اگه یک دولتےءَ غلطیں کارے کت، باید آ دولتءِ جهگیر/نماینده ماں دگه ملکاں امنیتءِ تهءَ به بنت و نباید وتسریں مردم کارے بکن اَنت که تمامیں مردمانی آبرو و عزتءَ به برنت.
واجهءَ گوشت: سعودی عرب و ایرانءِ زهریءَ په منطقه و مسلماناں فائده و سوتے نیست، بلکیں بازیں نقصان و ضررے داریت. ایران و سعودی عربءَ ماں میاںرودراتک/خاورمیانهءَ مزنیں جاگاهے هست و جهان اسلامءَ دو مزنیں ملک اَنت که توان اَنت مردمانی مشکلاتءَ حل بکن اَنت و بگیشّین اَنت، گڑا نباید اِے دوئیں ملک گوں وت به مِڑ اَنت. اسلامی ملکاں نباید وتی رابطهءَ گوں وت به سند اَنت. اے دابیں کار مسلمانانی ضررءَ اِنت. ما را امیت اِنت که هرچے زودتر گوں شور و گپوتراں اے رابطه اپدءَ بر قرار کنگ به بیت.
واجه مولانا عبدالحمیدءَ وتی گپانی گڈسرا چه «پاهو/اعدام»ءَ ماں لهتے ملکاں گلّه کت و گوشتی: اعدام شریں کارے نه اِنت و سکتریں سزا اِنت. ماں اسلامءَ په اعدامءَ کم جاهءَ حکم دیگ بوتگ. ما چه اسلامی و غیر اسلامی ملکاں لوٹیں که وتی اے قانودءَ اپدءَ بچار اَنت. هر ملکءِ قانود چارگ به بنت اگه ضرورتے هست اَت باید ٹگلینگ به بنت . اے قانون چه آسمانءَ ایرگیج نبوتگ اَنت، بلکیں انساناں جوڑ کتگ اَنت و انسان هرچنت که مزنیں فقیه و عالمے هں به بیت اپدءَ بیت کنت که اشتباه بکن اَت.
مروچی :جمعه, ۳۱ فروردین , ۱۴۰۳
چمشانک