مروچی : 9 دی , 1394
واجه مولانا عبدالحمید ماں بیست‌ونهمی بین‌المللی تپاکی دیوانءَ:

بے حکومتانی تپاکیءَ، مردمانی تپاکی مشکل اِنت

بے حکومتانی تپاکیءَ، مردمانی تپاکی مشکل اِنت

شیخ‌الاسلام مولانا عبدالحمیدءَ ماں بیست‌ونهمی بین‌المللی تپاکی مراگش/ کنفرانسءَ که دوشی (سے‌شنبه 8 دی 1394 همدپ گوں 17 ربیع‌الاول 1437 و29 دسمبر2015 )ءَ که ماں تهرانءَ برجم دارگ بوت، نوکیں جاور/حالاتءَ اسلامی ملکانی وحدت و تپاکیءِ ضروری زانت و گوشتی: په مردم و ملتانی تپاکیءَ اولءَ باید دولت گوں وتءَ تپاک ببنت.
واجهءَ وتی گپانی اولی بهرءَ رند چه اللهءِ شگرءَ گوں گَلی و خوشحالی چه جهان اسلامءِ عالمانی اجتماع و مچیءَ که په تپاکیءِ هپتگءَ ماں تهرانءَ مُچ/جمع بوتگ اِتنت، تمامیں مهمان خاصکار دَر ملکی/خارجی مهمان وَش آتک گوشت اَنت و چه اے مراگش و کنفرانسءِ برجم داروکاں منت‌واری کت.
واجه مولانا عبدالحمیدءَ گوشت: ما اے کنفرانسءَ وهدے برجم دارگیں که اسلامی ملکاں گوں بازیں مشکل و آپَتے دپ کپتگ اَنت. جهانی استکبار و صهیونیسمءِ برنامه و پروگرام ماں اسلامی ملکاں کارمرز بیگءَ اَنت. مسلمانانی دَر په دَری ، و اروپایی ملکاں پناه برگ، مسلمانانی کشت و کوش ومسلمانانی دارو مدارءِ نابودیءَ مردمءِ دلءَ ٹپیگ کرتگ.
واجهءَ دیمءَ گوشت: مسلماں بازیں ملکےءَ اختلاف و جتائیانی تهءَ گرپتار اَنت. مسلمان به جاه اشیءَ که گوں تپاکی، وحدت و مزن‌دلی وتی مشکلاں به گیشّین‌اَنت، گوں بازیں مشکلے دپ کپتگ اَنت. جهانی زوراک و استکبار په مسلماناں هیچ رحمے نکن اَنت. بلکیں په وتی مرادانی رسگءَ مسلمان اِش گروه گروه و پاٹ پاٹ کرتگ اَنت.
زاهدانءِ جمعهءِ پیشنمازءَ دیمءَ گوشت: ‌مسلماں گوں اشیءَ که بے‌مَٹّیں کتابے چوش قرآنءِ واهند/صاحب اَنت و مهربانیں پیغمبرے آیانی رهشون اِنت و اے هر دو مسلمانانءَ په وحدت و تپاکی دعوت کن اَنت و همے پیم سالم و دراهیں عقل و هوش هں مردمءَ په تپاکی دعوت کنت. بلے اپدءَ مسلمان جنگ و شدّتانی تهءَ گرپتار اَنت.
واجهءَ گوشت: تاریخ گواه اِنت که آ راج و ملت که گوں وت تپاک بوتگ اَنت، دنیاءِ تهءَ موفق و سوبیں بوتگ اَنت و مزنیں پیروزی و کامیابی اِش دستءَ آرتگ. فرهنگ و هوشمندیں ملت و راج همیشه گوں وت تپاک بنت. اختلاف و جتاییءَ هر وهدءَ مسلمان، ضرر و نقصان رسینتگ. مزنتریں اختلاف و جتایی که اسلامی اولی دورءَ پیش یهت و مسلماناں گروه و گروه بوت اَنت، تا مروچی انگتءَ هما اختلاف پش کپتگ.
ایرانءِ اهل‌سنتءِ مزنیں عالم و زانتکارءَ گوشت:‌ عالم و اسلامی حکومتانی وظیفه ماں اے حالاتءَ سک گران اِنت. اے دابیں کنفرانس و مراگشءِ برجم دارگ سک ضرورت اِنت. باید اسلامی ملکاں تپاکی و وحدت و گَپ‌وٹال/گفتمانءِ دَرءَ پچ بکن اَنت. ماں ایرانءَ روحانیءِ دولت و همے پیمءَ ایرانءِ رهشون باز جهد کن اَنت که تپاکی برجم دارگ به بیت.
واجهءَ « گَپ‌وٹال/گفتمان» په نوکیں مشکل و آپتانی گیشینگءَ ضروری زانت و گوشتی: گفتمانءِ راه مرچی اسلامی ملکانی تهءَ سک لازم و ضروری اِنت. دولتانی اختلاف و جتایی وت مردمانی تهءَ تاثیر ایر کنت. تا وهدے که اسلامی دولتاں گوے وت تپاک مبنت، ملتانی تپاکی مشکل اِنت. مئے عقیده همش انت که بهتریں راه په جهان اسلامءِ گِر وکشانی واپینگءَ گَپ‌وٹال/گفتمان و سرجمیں دولتانی تشکیل دیگ اِنت.
زاهدانءِ جمعهءِ پیشنمازءَ دیمءَ وتی گپانی تهءَ گوشت: من په مهمانانے که چه ڈنی ملکاں یهتگ اَنت و همے پیمءَ وتی مسئول و کارمسترانءَ گوشاں که ایرانءِ اهل‌سنت چه هر دابیں افراط و ترندرویءَ بیزار اَنت و نه من اَنت.
واجهءَدیمءَ گوشت: اهل‌سنتءَ گوں اشیءَ که بازیں مشکلاتی بوتگ، بلے په وحدت و تپاکیءِ برجم دارگءَ کمکی کتگ. ماں جنگءِ هشت سالءَ شهیدی داتگ. من، ایرانءِ کارمسترانءَ اطمینان دیاں ما اهل‌سنت په ایرانءَ امانت‌داریں مرزدار ایں و تا جاهے که توان ایں هچکسءَ اجازت ندئیں که یک بچیلے/وجبے چه مئے ملکءَ وتیگی بکنت.
مولانا عبدالحمیدءَ گوشت: وحدت و تپاکی سک مهم و ضروری اِنت. ما چه وتی براتیں شیعه‌یاں لوٹیں که ما را وتی رقیب مزان اَنت بلکیں ما را وتی رفیق بزان اَنت. من گوں منت‌واری چه ایرانءِ کارمستراں گوشاں که وتی سُنّی‌ئیں براتاں گیشتر توجّه بکن اِت، پرچا که اهل‌سنت شمئے کرا اِنت و په ملکءِ دیمپانیءَ سکی و سوری کشّ اَنت.
واجهءَ دیمءَ شیعه و سنی‌ئیں عالم و زانتکار و اسلامی دولت، توار پر دات اَنت و گوشتی:‌ منی وصیت په تمامیں عالم و مفتیاں شیعه و سنیاں همیش اِنت که هنوگیں جاورءَ اسلام خطره تهءَ اِنت، مئے و شمئے تمامانی مسئولیت و رسالت گران اِنت و باید په وتی مسئولیت و وظیفهءَ عمل بکنیں. همے پیمءَ منی توصیه په اسلامی دولتاں همیش اِنت که په وتی اقلیت و کمیں قومی ومذهبی مردمانی حق و حقوقءَ دلگوش کن اَنت و آیانی حقءَ ادا بکن اَنت.
دارالعلوم زاهدانءِ کارمسترءَ گوشت: منی وصیت په آسیای میانه/میاں‌رودراتک ءِ دولتان و دگه دولتاں ایش اِنت که مسلمانانی سرءَ سک گیری مکن اَنت.پرچا که یکے چه ترندرویانی اصلی سبب، لهتے حکومتانی ظلم و وت‌واهی و مسلمانانی سرپروش کنگ اِنت.
شیخ‌الاسلام مولانا عبدالحمیدءَ گوشت: ما چه ایرانءِ اسلامی دولتءَ لوٹیں هما پیمءَ که چه فلسطینی مسلمان و دگه مسلماناں کمک و دیمپانی کنت، آ اسلامی دولتے که دین والایانی سرا فشار کار اَنت بگوشیت که مسلمانانی چارگ/رعایتءَ بکن اَنت.
واجه مولانا عبدالحمیدءَ گڈسرءَ گوشت: منی وصیت په شیعه و سنیاں همیش اِنت که وتءَ را گوَرمباز/بغل کن اَنت و گوں وت دوستی و محبت بکن اَنت.

(گوشگی اِنت که واجه مولانا عبدالحمیدءِ گپ و هبر اے بین‌المللی مراگشءِ عالم و زانتکاراں که چه هفتاد ملکءَ یهتگ اِتنت، باز پسند بوتگ اَنت)


چمشانک

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *