واجه مولانا عبدالحمیدءَ ماں جمعهءِ گپاں گوں اشاره په وحدت و تپاکیءِ هپتگءَ، مسلمانی په وحدت و تپاکیءَ توار پِر دات اَنت.
واجه مولانا عبدالحمیدءَ ماں زاهدان جمعهءِ نماز 4 دی 1394 (13 ربیعالاول 1437)ءَ وحدت و تپاکی په مسلماناں سک مهم و ضروری زانت و گوشتی: پیغمبر صلیاللهعلیهوسلم ءَ په تپاکیءِ یارگءَ باز جهد کرت. وهدے که پیغمبر دیم دیگ بوت دنیا چه اختلاف و تفرقهءَ پر اَت. عربی راج وت ماں وتءَ درگیر اِت اَنت. 120سالی جنگ و هون و هونریچی راه کپتگ اَت. بلے گوں پیغمبر صلیاللهعلیهوسلمءِ آیگءَ آ گوں وت تپاک بوت اَنت الله تعالی فرمائینیت: «وَاذْكُرُواْ نِعْمَتَ اللّهِ عَلَيْكُمْ إِذْ كُنتُمْ أَعْدَاء فَأَلَّفَ بَيْنَ قُلُوبِكُمْ فَأَصْبَحْتُم بِنِعْمَتِهِ إِخْوَانًا وَكُنتُمْ عَلَىَ شَفَا حُفْرَةٍ مِّنَ النَّارِ فَأَنقَذَكُم مِّنْهَا»؛ یاد کن اِت هما وهدءَ که شما وتماںوتءَ دژمن اِت اِت، الله تعالیءَ شمئے دلانی در میانءَ دوستی یارت و شما گوں وت برات بوت اِت و شما کڈے سُنٹءَ اِت اِت، شماری نجات دات. الله تعالیءَ شمئے جدایی و اختلاف په تپاکی بدل کت. گوں پیغمبرءِ مبعوث بیگءَ بهتریں اخلاق و رفتار و عقیده مردمانی وجودءَ آتک.
زاهدانءِ جمعهءِ پیشمازءَ گوشت: اختلاف و تفرقهاے که مرچی جهان اسلامءَ حاکم اِنت، په مسلماناں ٹوهیں خطره و بیمے.
دژمناں وتی فائدهءَ ماں اختلاف و تفرقهءَ زان اَنت.
واجهءَ تپاکی سک ضروری زانت و گوشتی: وحدت و تپاکی په اسلامی ملکاں سک مهم وضروری اِنت. مرچی وهدے که تمامیں دژمناں مُچ/جمع بوتگ اَنت و په مسلمانانی ضرر رسینگءَ گوں وت تپاک اَنت، باید مسلماناں هں گوں وت تپاک ببنت. عقلمند و دانائیں قوم و راج وت ماں وتءَ تپاک بنت آ که گوں وت اختلاف گِروکَشّ اش هست و ناتپاک اَنت آ جاهلیں قوم اَنت.
واجهءَ گوشت: ما چه هر وڑیں اختلاف و تفرقهءَ باید دوری بکنیں. هرکس چه شیعه وسنی باید وتی ترندروانی هیالداریءَ بکنت و مئلیت کهگوں دژمناں همدست ببنت.
قرآنءِ و پیغمبر سیرتءِ سرا عمل کنگ، انسانءَ چه گناهاں پاک و تزکیه کنت
شیخالاسلام مولانا عبدالحمیدءَ ماں دگه بهرے چه جمعهءِ وعظاں، پیغمبر صلیاللهعلیهوسلم، زندگیءِ بارهءَ گپ کت و واجهءِ زندگی یے تمامیں عملی، اعتقادی، ظاهری و باطنی خوبیانی خلاصه زانت.
واجه مولانا عبدالحمیدءَ رند چه آیه «لَقَدْ مَنَّ اللّهُ عَلَى الْمُؤمِنِينَ إِذْ بَعَثَ فِيهِمْ رَسُولًا مِّنْ أَنفُسِهِمْ يَتْلُو عَلَيْهِمْ آيَاتِهِ وَيُزَكِّيهِمْ وَيُعَلِّمُهُمُ الْكِتَابَ وَالْحِكْمَةَ وَإِن كَانُواْ مِن قَبْلُ لَفِي ضَلالٍ مُّبِينٍ» [آل عمران:164] ءِ وانگءَ گوشتی: ربیعالاولءِ دوزادهمی روچ اهلسنتءِ تاریخءِ مطابقءَ پیغمبر ءِ ولادت و بیگءِ روچ اِنت. بزرگانی یادکنگ و آیانی سیرت و زندگیءَ بیان کنگ شریں کارے، بلے چه پهکاں مهمتر همیش اِنت که آ واجهانی اتباع و رندگیری کنگ به بیت. الله تعالیءَ مئے سربلندی و نجات ماں پیغمبر ءِ سنتانی رندگیریءَ ایر کرتگ. و ما را حکمی کرتگ که چه آ واجهءَ رندگیری بکنایں.
واجهءَ «نیکیں اخلاق و رپتار» چه پغمبرءِ مهمیں تعلیماں زانت و گوشتی: یکے چه پیغمبر مهمیں درساں نیکیں اخلاق و کردار اِنت. واجهءَ ماں حدیثی گوشتگ: الله تعالیءَ منءَ دیم داتگ که نیکیں اخلاق ءَ کامل بکناں. الله تعالیءَ تمامیں اخلاق و خوبی اعتقادی، عملی، ظاهری و باطنی پیغمبرءَ داتگ اَنت.
دارالعلوم زاهدانءِ کارمسترءَ گوشت:الله تعالیءَ پیغمبر مزنیں اخلاقءِ صاحب و واهند زانتگ. وهدے که بیبی عایشه رضیاللهعنها چه پیغمبرءِ اخلاقءَ جست کنگ بوت، گوشتی: «کان خلقه القرآن» واجهءِ اخلاق قرآن بوتگ.
واجه مولانا عبدالحمیدءَ گوشت: قرآن مجیدءِ حکمانی سرا عمل کنگ انسانانءَ په کمال و مزنی رسینیت. قرآنءِ و پیغمبر سیرتءِ سرا عمل کنگ انسانءَ چه گناهاں پاک و تزکیه کنت. باید ما پهکاں اراده بکنایں که پیغمبرءِ سیرتءِ سرا عمل کنایں. هما دابءَ که پیغمبرءَ الله تعالیءِ حکمانی سرا عمل کت، ما هں کوشش بکنایں که شریعتءِ سرءَ عمل بکنیں.
زاهدانءِ جمعهءِ پیشنمازءَ گوشت: اگه لوٹیں اللهءِ محبوب بئیں باید چه پیغمبرءَ اتباع و رندگیری بکنیں. الله تعالی فرمائینیت: «قل إن کنتم تحبون الله فاتبعونی یحببکم الله» اگه لوٹیں اللهءِ محبوب بئیں باید جهد بکنیں که وتی زندگی هر بهرءَ چه پیغمبرءِ زندگیءَ اتباع بکنیں. پیغمبر په الله حقءِ جاه آرک و مردمانی حقانی جاه آرگءَ اسوه و نمونه اِنت.
چمشانک