مروچی : 5 آذر , 1394

ایرانءِ بیست‌ویکّمی اسلامی فقہءِ دیوان بَرجَم دارگ بوت

ایرانءِ بیست‌ویکّمی اسلامی فقہءِ دیوان بَرجَم دارگ بوت

ایرانءِ اهل‌سنتءِ “بیست‌ویکمی اسلامی فقہءِ مَجمع و دیوان” گوں بازیں عالم و مفتی‌یے مُچّی و حاضریءَ شنبه و یکشنبهءِ روچءَ ( 30 آبان و1آذر 1394/ 9و10 صفر1437/ 22و21نوامبر2015) ماں دارالعلوم زاهدانءَ برجم دارگ بوت.

پہ ایرانءِ اهل‌سنتءِ هال‌رسانی سایت “سنی آن‌لاین”ءِ هالکاریءَ، ایرانءِ اهل‌سنتءِ بیست‌ویکمی اسلامی فقہءِ دیوان شنبهءِ سَباه (30 آبان)ءَ ماں دارالعلوم زاهدانءَ بنگیج بوت. ماں اے دیوانءَ واجہ شیخ‌الاسلام مولانا عبدالحمیدءَ “فقهی مجمع و دیوان” ءِ برجم دارگ، سک مهم و ضروری زانت و گوشتی: مرچی دنیاءِ هالات بَدَل بوتگ، و نوکیں مسائل و جست پیش آتکگ، باید اسلامی شریعت هر هالءَ مردمانی جوابگو بہ بیت، گڑا ضروری اِنت کہ عالم و زانتکار کوشش بکن اَنت کہ نوکیں مسائلانی حکمءَ، شوهاز بکن اَنت و گوں آیانی گیشّینگءَ مردمانی مشکلاں حل بہ کن اَنت.
پہ “سنی آن‌لاین”ءِ هالکارءِ هالکاریءَ ماں اِے دیوانءَ عالم و مفتیاں کہ چہ ایرانءِ مختلف‌اِیں جاهاں، چوشکه خراسان و گلستانءَ حاضر اِت اَنت، سَے مسئلہءِ بارهءَ گوں وت بحث کت و وتی نبشتانک و چمشانک‌اِش پیش کت اَنت.
ماں اے دیوانءِ گُڈّی بهرءَ کہ دوشنبهءِ بیگاهءَ برجم دارگ بوت، اے مسئله یانی حکم‌‌اِش گیشّینت اَنت.

ایرانءِ بیست‌ویکّمی اسلامی فقہءِ دیوانءِ گیشّینتگ‌اِیں مسائلانی حکم، اِیش اَنت:

1.‌ لاپی زهگ و چُکّانی دَور دیگ (سقط جنین)
الف) ماں اولی 40 روچ، رند چہ گیماری (زهگءِ لاپءَ کپگ و ماتءِ حامله بیگ) ءَ، بے عذرءَ چُکءِ دَور دیگ، مکروه و اسلامی مقصد و مرادانی خلافءَ اِنت.
ب) رند چہ 40 روچ تا 120روچ، چہ گیماری و حاملگیءَ، زهگءِ دَور دیگ ءَ هما وهدی اجازت هست کہ یک گروهے چہ متخصص و بروسه بوتگیں ڈاکٹراں ثابت بکن اَنت کہ لاپی‌زهگ یک بے‌درمانیں نادراهی ءَ مبتلا اِنت و دیمءَ وتی زندگی و پت و ماتءِ زندگیءَ سکّین و سوریں مشکلءِ کاریت.
ج) رند چہ 120 روچ، چہ گیماری و حاملگیءَ، هر چنت کہ زهگ “ناقص الخلقہ” و ناتمامینے بہ بیت، بلے زهگءِ دور دیگ حرام اِنت و مردمے کشگ زانگ بیت؛ البت اگہ یک گروهے چہ متخصص و معتمدیں ڈاکٹراں ثابت کت کہ زهگءِ پَشت کپگ ماں لاپءَ، ماتءَ بیرانءِ کنت، گڑا اے صورتءَ مجمعءِ گیشتریں باسکاں گوشتگ کہ مات توانت زهگءَ دَور بہ دات.

2. جهل آتکگیں وامانی ادا کنگ، بزاں هما وام کہ دیرگوزگءِ سببءَ وتی ارزشتی چہ دست داتگ
آ وام کہ صاحبءَ دیگ نہ بوتگ تا اشے کہ آ پولءِ ارزش باز جهل آتکگ، اِے بارهءَ فقهی مجمعءِ باسکاں گوشتگ کہ تا دو ماهءَ گیشتر پٹ و پول کنگ بہ بیت کہ چہ تورّم، سُهر (طلا)، روچءِ نهاد و یا دگہ چہ چیزے گونءَ تعیین کنگ بہ بیت. بلے تا هنو اول سرءَ دوئیں طرف، گوں وت سهل بکن اَنت و اگہ پہ سهلءَ راضی نبوت اَنت ، گڑا طلاهءِ نهادءَ حساب کنگ بہ بیت.

3. روچگءِ حالتءَ، هیسک (آسم)ءِ اسپری و گاز ءِ استعمال کنگ
الف) هیسک و آسمءِ اسپری بهتریں قولءَ روچگءِ پروشوک اِنت.
ب) اگہ هیسکءِ نادراه مجبور اَت کہ رمضانءِ ماهءَ چہ آسمءِ اسپریءَ کارمرز بکنت، گڑا اسپریءَ کارمرز بکنت، بلے روچگءَ هں بداریت و باید روچگءِ قضایا هں جاه بیاریت.
ج) اگہ هیسکءِ نادراهی همیشہءِ واستءَ اَت، گڑا روچگءَ بداریت و اسپریءَ کارمرز بکنت و باید پہ احتیاطءِ واستءَ فدیہ (روچگ بها ) هں بدات.


چمشانک

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *