مروچی :پنجشنبه, ۹ فروردین , ۱۴۰۳

دولتءِ اولی برنامه ‌مُلکی مردمانی سرکارکنگ بہ بیت

دولتءِ اولی برنامه ‌مُلکی مردمانی سرکارکنگ بہ بیت

شیخ‌الاسلام مولانا عبدالحمیدءَ ماں چهبار ءِ دو نوکیں مجتمع پتروشیمی و فولاد مکرانءِ کلنگ‌جنی/بُن‌ردی مراگشءَ گوں منتواری چہ امیت و تدبیر دولتءِ دلگوشءَ پہ سیستان‌وبلوچستانءَ، پہ ملکی مردمانی سرکار کنگءَ تاکیدی کت.
پہ سنی‌آن‌لاینءِ هالکاریءَ، مولانا عبدالحمیدءَ ماں چهبارءِ فولادسازی و پتروشیمی کارجاهءِ کلنگ‌جنی/ بن‌ردیءَ که پنج‌شنبه 19شهریور 1394ءَ برجم دارگ بوت، رند چه منتواری چہ ایرانءِ رهشون و راجکماشءِ دلگوشءَ پہ سیستان‌وبلوچستانءَ گوشتی: مرچیگیں نوکیں کارجاهانی کلنگ‌جنی و بن‌ردگرگ، پیش داریت که کارمستراں پہ اے ملکءَ دلگوش هست.
واجہءَ دیم پہ کارمستراں گوشت: دلجم بئیت کہ استانءِ مردم تمامیں آ کسانےءَ که پہ ملکءِ دیمروی و ترقیءَ کوشش کن انت، شر پجاه کار انت و آیانی منتوار انت. الحمدلله استان سیستان‌وبلوچستان چه کشورءِ امن و شریں استانان انت.کمیں نا امنیاں که اے استانءَ گندگ بیت چه دگہ استاناں باز کمتر انت.
واجہءَ دیما گوشت: الله تعالی مردمانی انگیزه و مرادءَ چار ایت. بلکیں لهتے تمنا همیش انت که وتی دنیاءَ آباد بکن انت، اے هں جائز انت، بلے اگہ مئے تمنا همے به بیت که ما مردمانی دنیاءَ آباد بکن ایں، گڑا اے کار سب بیت، مئے دنیا و آخرت آباد به بیت. باید مئے تمنا همے به بیت کہ ما گوں مردمانی سرکار کنگءَ آیانی رفاه و آسودگیءِ سبب به بئیں. مشموش ایں کہ ما مسلمانیں راجے ایں ، گڑا باید مئے تمامیں کار پہ اللهءِ رضامندیءِواستا به بنت.
واجه مولانا عبدالحمیدءَ “پتروشیمی صنعتءِ نقصان و عوارضءِ زیان کنگ” و “ملکی مردمانی سرکارکنگ”، دو مهمیں تمنا زانت انت و چہ مسئولانی لوٹ ات که پہ اشانی حل کنگءَ کوشش بکن انت.
واجهءَ اے بارهءَ گوشت: هر رحمتےءَ گوں وت زحمتے همراه انت. وهدے که هور گواریت، مردمءِ پُچ هں تر بنت. صنعت هں همے پیما کم یا باز عوارض و نقصانی هست. گڑا مردمانی واهش همش انت که کارمستر دلگوش بکن انت کہ صنعتءِ ضرر و نقصان مردماں مہ رسیت.
ایرانءِ اهل سنتءِ واجهءَ پہ ملکی مردمانی تعلیم و سرکارکنگءَ وصیت کت و گوشتی: ملکءِ مردم خاصکار چهبارءِ مردمانی تمنا همیش انت کہ ماں اے شرکتاں کہ کلنگ‌جنگ بوتگ انت و بن‌رد ‌گرگ بوتگ انت. باید گار گرگ به بنت و باید پہ آیانی سرکار کنگ برنامه و پروگرام ریچگ به بیت، پرچا که ملکءَ بے کاری باز انت.
واجہ تاکید کت: مئے اولی سیاست همے بہ بیت که ملکءِ مردم ماں کارجاهاں سرکار کنگ به ببنت. دژمن لوٹ ایت کہ چہ استان سیستان وبلوچستانءَ په ملکءِ نا امنیءَ استفاده بہ کنت و بهر بزیریت، بلے اگہ ملکءِ مردمانی اقتصاد و مالی حالت شر به بیت و سرکار به بنت، گڑا باور کن ات کہ ملک امن بیت.
گذران و اقتصاد کِرا پہ مردمانی تعلیمءَ هں دلگوش کنگ به بیت
واجہ مولانا عبدالحمیدءَ اقتصاد کرا دلگوش پہ مردمانی تعلیم و آموزشءَ هں تاکید و گوشتی: تهنا مردمانی اقتصادءِ پکرءِ کنگ بس نه انت، بلکیں باید پہ وانگ و تعلیمءَ دلگوش کنگ بہ بیت. اگہ ما پٹ‌ولوٹ بکن ایں ما را معلوم یت کہ زانوگر و واننده کمتر دگرانی پریبءَ ور انت. هرابیں موادءِ کارمرز کنگ و نا امنیانی جوڑ بیگءِ اصلی سبب دلگوش نکنگ پہ آموزش و تحصیلءَ انت.

واجہءَ وتی گپانی گڈسرا گوشت: مکرانءِ دریاءِ تیاب و ساحل چہ توانمندیں ساحل و تیابان انت. اے توانائی که مکرانءِ تیابءَ گندگ بیت، ملکءِ دگه ساحلاں گندگ نبیت. گڑا باید کارمستر پہ اے تیابءِ جوڑکنگءَ گیشتر کوشش بکن انت.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *