شیخالإسلام مولانا عبدالحمیدا ماں وتی جمعهءِ وعظاں، رمضانءِ مبارکیں ماهی «معنوی بهارگاه» و «عبادت موسم» زانت و په گیشتر بهر زیرگ ماں اِے ماها تاکید کت.
زاهدانءِ جمعهءِ نمازءِ پیشنمازا ماں وتی جمعه 29 خرداد /2رمضان ءِ وعظاں رند چه آیه« یَا أَيُّهَا الَّذِينَ آمَنُواْ كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ» وانگا پرمائینتی: الله تعالی ئا په انسانءِ جسمءِ تقویتا مختلف/ وڑوڑیں روزیگ و نعمت ماں زمینا اِیرکتگ. همے پیما الله تعالیئا په انسانءِ روح و معنویتءِ تقویتا نعمت قرار داتگ و برنامهاِی اِیر کتگ.پیغمبر صلیاللهعلیهوسلما،بهتریں برنامه په انسانءِ اصلاح و پاکیا آرتگ.آ مردم که په وتی اصلاح و پاک کنگا شموشکار بنت و په گناه و هرابکاریا دیم کن اَنت، جهنمءِ مانجینا غرق بنت.
زاهدانءِ جمعهءِ پیشنمازا پرمائینت: مروچی بازیں مردمےئا په الله تعالیءِ حکماں پشت مان داتگ و بے هبر اّنت. ماں آ حالتا که الله تعالیءِ حکمانی سرا عمل کنگ چه انسانءِ طاقتا هں در نه اِنت. اسلام، اعتدال و برابریءِ دین اِنت عبادتی په ما آسان کتگ. مثال واستا دین اسلاما په روچگا تهنا رمضانءِ ماه روچانی روچگی فرض کتگ و شپاں وَرْد و نوشءِ اِجازتی داتگ.
واجها دیما په رمضانءِ ماهءِ فضیلتاں اشاره کت و گوشتی: رمضانءِ ماه، قرآن مجیدءِ نازل بیگءِ ماه اِنت و ما گوں روچ دارگا په قرآنءِ نازل بیگا جشن گر اِین و شاتکامی کن اِیں. په اِشی که ما گوں قرآنا نزیک به بئیں الله تعالیئا رمضانءِ ماهءِ روچگ فرض کتگ. روچگ پیغمبرانی سنت اِنت.الله تعالیئا په اِشی که توراتا نازل بکنت، حضرت موسی اِی پرمان دات که په تیاریا 40 روچ، روچگ بگراِیت.
واجها «تقوا و خداترسیءِ رسگ» روچگءِ مزنتریں مقصد زانت و گوشتی: رمضان ماهءِ روچگءِ اصلی مقصد اِشنت که مئے وجودا تقوا و خداترسی بیئیت، هما پیم که الله تعالیئا گوشتگ «يَا أَيُّهَا الَّذِينَ آمَنُواْ كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ» گڑا باید روچگ ما را چه گناه و تبهکاریا منع به کنت و به روکیت. پیغمبر صلیالله علیه وسلم، پرمائینیت: هرکس روچگ بگراِیت و گناهاں یله/ترک مکنت، الله تعالیئا په آئیءِ روچگا هچ نیازے نیست اِنت. روچگ بزاں دوری چه گناه. زانگی اِنت که گناه همک وهدا ممنوع اِنت، بلے رمضانا چه هر وهدا گیشتر. گناه و تبهکاری انسانءِ روچگا تاوان رسینیت و مُزّ و ثوابیئا چه بین بارت.
دارالعلوم زاهدانءِ کارمسترا نیکیں کردار خاصکار قرآن مجیدءِ تلاوت سرا تاکید و گوشتی: رمضانءِ مبارکیں ماها شیطان جِیل/ زندانا کنگ بنت ، جهنم دروازگ بندکنگ بنت و بهشتءِ دروازگ پچ کنگ بنت. ماں اے ماها عبادت و الله تعالیءِ نیمگا روگءِ راه پچ اِنت، گڑا باید چه اِے فرصتا بهر زیرگ ببیت و په آخرتا تیاری بکن اِیں. ماں اے ماها قرآن مجیدا باز تلاوت بکن اِت. هر اندازه که الله تعالیئا گیشتر ذکر و یات بکن اِت هما اندازهئا رمضان گیشتر مئے زندگیئا اثر دَور دات.
واجهءَ دیما گوشت: چه رمضانءِ همے اولا نیکیں کردار ءِ پدا به بِت. په آخری ده روچا منتظر مه بئت، پرچا که بلکیں ما و شما په آخری دهه ئا نرست ایں، اگاں رست اِیں گڑا عبادت کن ایں. نیکیں کردار و اعمال مئے و شمئے آخرتءِ ذخیره اَنت.گڑا رمضانءِ معنوی بهارگاها شری سرا بهر بزوراِیں. اے ماه، اللهءِ مهمانی ماه اِنت. اے روچ توبه و الله تعالیءِ نیمگ پچ ترّگءِ روچ اَنت. رمضانءِ اولی ده روچ رحمتانی روچ اَنت هرکس په وتی توانا بهر بزیر اِیت.
زاهدانءِ جمعهءِ پیشنمازا گوشت: دیم په مسیت/ مسجداں هیلّاَت/اشتاپ کن اِت. شما ماں اے ماها چه شیطانءِ فریبا در امان اِت. هر اندازه مئے طلب و واهش گیشتر به بیت گیشتر چه رمضانا بهر زرت کن اِیں، گڑا شیرمرد و شیر زالانی وڑا اللهئا عبادت بکن اِت.
دارالعلوم زاهدانءِ کارمسترا گڈسرا په حقوقالناس بزاں مردمانی حقءِ هیال داری، فقیر و بے وسانی کمک و پاکونڈ/ زکات و صدقات ادا کنگ ماں اے ماها ضروری زانت.
مروچی :جمعه, ۲۸ اردیبهشت , ۱۴۰۳
چمشانک