شیخ الإسلام مولانا عبدالحمیدءَ گوں علمءُ زانتءِ فایده یانی نام برگ ماں نوکیں دنیاءَ “پاکیں خداءِ منّگ ءُ آئیءِ نعمتانی شگر گِرَگ ئے” چه علمءُ زانتءِ برءُ ثمره یاں زانت أنت.
زاهدانءِ جمعهءِ پیشنمازءَ ماں وتی جمعهءِ گپاں (7 شهریور1393)ءَ رند چه سوره “علق”ءِ اولیگیں آیاتءِ وانگءَ، په علمءُ زانتءِ اهمیّتءَ ماں دنیاءِ راجانی دیمرویءَ گپ جتءُ گوشتی: مرچی ما پهکاں علمءُ زانتءِ اَثَرءَ ماں دنیاءَ گِندگائیں. یک روچے مسلماناں علمءُ زانتءِ منبعءُ سرچمگ بوتگ أنت، بلے کم کم یُورپءُ رُونِندی مردماں علمءُ زانتءِ رندگیری کت، ءُ مرچی هر ترقیءُ دیمروی ئے ماں یورپءَ گندگ بیت آ علمءُ زانتءِ بَر إنت.
واجه مولانا عبدالحمیدءَ گوں دلیلءُ مَنّانک گرگ چه آیت«إقرأ بِاسمِ رَبِّکَ الَّذِی خَلَق»ءَ گوشتی: علمءُ زانت هما وهدی انسانءَ وش نصیبءُ کامیاب کنت که گوں”الله”ءِ نامءَ همراه به بیت. اگاں علم گوں اللهءِ نامءَ همراه به بیت آئیءِ اَثَر چنت برابر بیت. آ علم که گوں اللهءِ نامءَ بُنگیج به بیت ءُ اللهءِ رضامندی واستءَ به بیت تُوانیت که انسانءِ دلءِ تهءَ بَدَلی بیاریت.
واجهءَ وتی إے بهرءِ گپانی آسرءَ گوشت: “پاکیں خداءِ مَنّگءُ آئیءِ نعمتانی شگرءَ گرگ”، چه علمءُ زانتءِ بَرءُ ثمره إنت، علم هما وهدی سودمند بیت که مارا په الله تعالیءِ سرءَ ایمان آرگءُ پاکیں هاوندءِ نعمتانی شُگرءِ اداکنگءِ نیمگءَ شوں بدات. اگاں ما ترقیءُ دیمروی کت بلے په الله تعالیءَ ایمان إیں نیارتءُ آئیءِ نعمتانی شگرإیں ادا نکت إے دابیں علم مارا هچ فایدهءُ سودے نه دات.
حکومت باید وت سریں کارانی دیمءَ بگر إیت
شیخ الإسلام مولانا عبدالحمیدءَ ماں دگه بهرے چه وتی جمعهءِ گپّاں په دولتءِ هپتگءَ اشاره کتءُ گوں إے هپتگءِ مرادبات گوشگ په دولت مرداں گوشتی: یکے چه دولتءِ مزنتریں کاراں ماں میاں استمانی ردءَ انرژی هسته ای ءِ مذاکراتءُ شورءُ سلاه إنت تا که به توانیت دشمنانی ارشءِ دیمءَ بگریت ءُ تحریمانءَ به پروشیت. امیت إنت که ملکءِ تحریماں پروشگ به بنت ءُ ملکءِ بند بوتگیں زرءُ مال پچ ترّینگ به بنت ءُ دولت گوں ایرانءِ راج به توان أنت آزاتی سرءَ تجارتءُ باپاری بکن أنت.
زاهدانءِ جمعهءِ پیشنمازءَ دیمءَ په دولتءِ لهتے خدمتاں ماں بلوچستانءُ سیستانءِ تهءَ اشاره کتءُ پرمائینتی: دو کارخانه پتروشیمیءِ اعتبارءِ دیگ ماں راجکماشءِ آخری سفرءَ ءُ گازءِ لوله کشی چ هایرانشهر په استانءِ إے دگه شهراں ءُ چهبارءُ زاهدانءِ ریلءِ بنگیج چه استانءِ مزنیں کارءُ پروژه یان أنت که چه یازدهمی دولتءِ نیمگءَ تصویب بوتگ أنت.
واجهءَ ” نهاد درگیجگ په کشاورزانی محصولاتءَ” تاکید کتءُ گوشتی: تا وهدے که دولت په کشاورزی محصولاتءِ بهاءُ زیرگءَ برنامه ریزی مکنت پهکیں هزینه یانے که ماں إے بهرءَ کنگ بنت، بر باد بنت. گڑا باید دولت په کشاورزءُ إے دگه با پاریانی محصولاتءِ بها کنگءَ ماں ملکءُ در ملکءَ برنامهءُ پروگرام ایر بکنت.
دولت په بنیادی قانونءِ کارمرز کنگءَ کوشش بکنت
دارالعلوم زاهدانءِ کارمسترءَ دیم گور په دولتءَ گوشتی: منی سوج همیش إنت که په بنیادی قانونءِ کاربندگءَ که چه ڈاکٹر روحانیءِ وعده یاں بوتگ کوشش بکنت، بنیادی قانون مئی ملی پیمان إنت ءُ چه دنیاءِ دیم کپتگیں قانونان إنت که سرجمیں راجانی حقءَ ادا کنت.
زاهدانءِ جمعهءِ پیشنمازءَ دیمترءَ گوشت: منی دومی وصیتءُ سوج په دولتءَ إیش إنت که سلیقه ای ءُ وت سریں کارانی دیمءَ بگر إیت. شیعهءُ سنیءُ راجءُ مذهبانی حقّ دیگ به بیت. مردمانی سرجمیں آزاتی دینیءُ مذهبیءُ… دیگ به بنت ما پهکاں باید بنیادی قانونءِ کارمزکنگءَ دیم پانی بکنیںءُ بے شک ملت په بنیادی قانونءِ کار بندگءَ دولتءِ پشتءَ اُوشتیت.
راجءُ مذهبانی کار گرگ ماں ملکءِ اداره کنگءَ ملی تپاکیءُ امانءِ آروک إنت
مولانا عبدالحمیدءَدولتءِ وعده یانی پوره کنگ په راج ءُ مذهباں لوٹوک بیتءُ إے بارهءَ گوشتی: منی سوجءُ وصیت په کارمسترءُ مسئولاں همیش إنت که ماں دولتءِ نام گپتگیں هپتگءَ په راجءُ مذهبانی داتگیں وعده یانی پوره کنگءَ گیشتر کوشش به کن أنت. راجءُ مذهبانی کارگرگ ماں ملکءِ اداره کنگءَ تپاکیءُ امنیتءَ گیش کنت. اهلسنتءِ راه ءُ مسیر گپءُ ترانءُ شورءُ صلاحءِ راه إنتءُ گوں تندرویں پاٹءُ گلاں همراه نه إنت،ءُ په ترندرویءُ تکفیرءَ باوری نیست، بلکیں براتی ءُ اسلامی تپاکیءُ وتی قانونی حقوقءُ آزاتیءِ لوٹوک إنت.
پرچا رونندی سیاست والایاں پیسر چه پیش آمدءِ پیش آیگءَ دیم إش نه گپت؟
شیخ الإسلام مولانا عبدالحمیدءَ ماں دگه بهرے چه وتی گپاں په رونندی ملکانی دو دیمی سیاستءَ ماں اسلامی ملکانی مشکلاتءِ حل کنگءَ اشاره کتءُ گوشتی: مرچی أمریکهءُ یورپی ملکاں پگر کن أنت که مردم آیانی سل کاریانءَ نه گند أنت بلے چو نه إنت جهانیاں بلی که قدرت نیست بلے آیاں عقل و هست. زاهدانءِ جمعهءِ پیشنمازءَ په أمریکهءِ دزمانجنی ماں اسلامی ملکانی تهءَ اشاره کتءُ گوشتی: أمریکه هنو په عراقءُ سوریاءِ خیر واهیءَ پاد آتکگ، پیسرءَ کجا بوتگ؟ إے ملکانی مردم چند سال إنت که رنجءُ نگیگیانی تهءَ کپتگ أنت کشگءُ بیراں کنگ بوتگ أنتءِ وتی زندگی إش چه دست داتگ. پرچا إے زوراکاں پیسرءَ إے ملکانی مشکلات حل نکت أنت تا إشی که روچ مروچی مه رستیں که ترندرویں پاٹءُ گلاں پاد میاتکین أنت. سازمان ملل ءُ شورای امنیت پرچا جوڑ کنگ بوتگ أنت؟ پرچا مرچی فلسطینیاں ماں إے مشکلاتءِ تهءَ گرپتار أنت.
واجهءَ دیمءَ فلسطینءِ اشغال کنگی”تروریزم”ءِ ریشگءُ بنیاد زانتءُ گوشتی: أمریکهءُ سازمان ملل گوش أنت ما گوں تروریزمءَ مقابله کن إیں، بلے گپ إیش إنت که تروریزمءِ بنیادءُ ریشگ فلسطینی ملکانی اشغال کنگءِ تهءَ إنت. تروریزمءِ ریشگ ماں ظلمءُ جنایاتی تهءَ إنت که سالانءِ سال إنت اسرائیلءِ رژیمءَ مسلمانانی سرءَ آرتگ. فلسطینءِ مرمانءَ کشیتءُ لوگان إش هراب کنت، فلسطینیانی هبر گوش کنگ نه بیت، ءُ آیانی حق دیگ نه بیت.
مولانا عبدالحمیدءَ گوشت: ما گوں هر دابیں تروریزمءَ مخالف إیں، بلے چارگ به بیت که تروریزمءِ ریشگ کجا إنت؟
مولانا عبدالحمیدءَ دیم په اسرائیلءِ مددکنوکاں ماں اسرائیلءِ تازه ایں ارشءَ، غزهءِ مردمانی سرءَ گوشت: شما 50 روچ اسرائیلءِ دستءَ پچ کن إت تا غزهءِ مردمانءَ به کشیتءُ بیراں بکنت. رندءَ گوَش إت: ما گوں تروریزمءَ مقابله کن إیں؟ شما گوں تروریزمءَ مقابله نه کن إت، بلکیں شما تروریزم جوڑ کن إت.
واجهءَ آ سرءَ گوشت: منی پیغام په جهانیاں إیش إنت: اگاں شما لوٹ إت گوں تروریزمءُ ترندرویءَ مقابله بکن إت ءُ لوٹ إت که دنیا امان به بیت، اسرائیلءِ جنایاتءِ دیمءَ بگر إت. فلسطینءِ مردماں په وتی آزاتیءَ به رس أنت اسرائیلءُ مسلمانانی میانجیءَ عدالت سرءَ فیصله کنگ به بیت.
چمشانک