شيخ الاسلام واجه عبدالحميدءَ إے هپتگءِ جمعهءِ نمازءِ وازاني تها گوں إشيءِ گوشگءَ كه« جهان اسلامءَ هنوگيں جاوراني ديمءَ، نوكيں استراتيجي و موقفے پكارإنت»، چه اسلامي ملكاني سروكاني لوٹ إت كه په جهان اسلامءِ مشكل و ناگيگياني گيشينگءَ نوكيں پگرے بزورأنت.
زاهدانءِ اهلسنتءِ جمعهءِ پيشنمازءَ ماں بهرے چه جمعهءِنمازءِ گپاں (13 تير 1393)ءَ پرمائينتي: مرچي جهان اسلام ناتپاكي و ترندويءِ آماچ إنت و بازيں ناگيگي و پاترپےءَ جهان اسلام دوره كتگ. گوں دلگوش په إشيءَ كه مروچاں اسلام ماں يورپي و غيراسلامي ملكاني تها ديمروي كنگاإنت و اسلامءِ منوكاں إے ملكاني تها گيش بيان أنت، و چه دگه نيمگے اسلامي آگاهي ماں اسلامي ملكاں چول جنگاإنت، اسلامءِ دژمناں رنگ رنگيں پروگرام، كِشْك و برنامه هست إنت تا اسلامي جهداني ديمءَ بگرأنت و مسلماناں يكادگرءِ جانءَ دور بدينت.
واجه شيخ الاسلامءَ “قومي، قبيله اي و مذهبي جنگ و چوپاني گيش كنگ”ءَ چه دژمناني برنامه و رهبنداں زانت و گوشتي: گوں دلگوش په إشيءَ كه مسلماناني آگاهي، جهانءِ زورمند و مزن واكاني سرءَ گران گوستگ، همے واستا جهاني مزن واك و ميانملكي صهيونيزم گلائيش أنت مسلماناں يكادگرءِ ديمءَ قرار بدينت و آياني ميانءَ قومي، قبيله اي و مذهبي ناتپاكي و گر و كش پاد بكن أنت.
شيخ الاسلام مولانا عبدالحميدءَ ديمءَ عراقءِ هنوگيں جاوراني بارهءَ پرمائينتي: عراقءِ هنوگيں جاوراں سرجميں مسلمانان پريشان كتگ؛ إے ملك كه چه منطقهءِ مهميں ملكان إنت، بهربهربيگ و چنڈ چنڈبيگءِ آماچ إنت. عراقءِ بهربهربيگ په إے ملكءِ وتي مردماں و په إے دگه مسلماناں مزنيں بيمے زانگ بيت و بلكيں دژمناں لوٹ أنت كه إے دگه اسلامي ملكاں هں بهربهربكن أنت.
جهان اسلامءِ عالماني اتحاديهءِ باسكءَ عراقءِ مردماني إے پيمءَ خطاب كت: مني كله و پيگام په عراقءِ مڑاداريں مردماں إشنت كه عالماں هور گوں إے دگه شهزانت و زانتكاراں و إے دگه مردماں، عراقءِ بهربهركنگءِ ديمءَ بگرأنت، پچے كه هما وهدءَ عراق قدرتمند بيت كه تپاك و يكے ببيت. اگاں إے ملك بهربهركنگ ببيت، گڑا وتي توان و واكءَ چه دست دنت. همے واستا من چه پهكيں راج و مذهبانے كه عراقءِ نندوك أنت دزبندي كناں كه گوں وتي هوري و تپاكيءَ و گوں يك راجي حكومتےءِ إيركنگءَ وتي لوٹ و مقصداں رندگيري بكن أنت، بلئے هچ وڑءَ عراقءَ په بهربهركنگءَ مئيل أنت.
واجهءَ عراقءِ بهربهركنگءَ “اسرائيل و زورگريں واكاني شاد كنگ” زانت و پرمائينتي: عراق كه دهراني دهر جهان اسلامءِ مركز بوتگ، آئيءِ بهربهركنگ اسرائيل و زورگريں واكاں گل وشاد كنت.
مولانا عبدالحميد گوں إشيءِ گوشگءَ كه «مسلماناں بايدإنت يكادگرءَ برداشت بكن أنت»، مشكلاني گيشينگءِ تهنائيں راهي “گپ و تران” زانت و پرمائينتي: مسلماناں بايدإنت يكادگرءَ برداشت بكن أنت. مشكلاني گيشينگ و نگبهتي و پيروزيءِ راه، جنگ و گر و كش نه إنت، بس گپ و تران و يكادگرءَ برداشت كنگ، ناگيگي و مشكلاني گيشينگءِ راه انت. إشي مزنيں بدبهتي إے كه مختلفيں مذهباني منوك، راج، گل و پاٹياں يكادگرءَ برداشت مكن أنت. شيعه وسني كه گوں يكدگرءَ اسلامي پيوندإش هست اگاں يكدگرءَ برداشت مكن أنت گڑا مزنيں بدبهتي و اپسوزي هالے. آ كس كه دگراں برداشت كنت آئي دود و ربيدگ و تمدنءِ واهندإنت، بلئے آ كه دگراں برداشت كت نكن أنت، مني هيالءَ بے دود ربيدگ و ناواننده و بے تمدنيں مردم أنت.
دارالعلوم زاهدانءِ كارمسترءَ ديمءَ پرمائينت: هما پيمءَ كه ترندروي جهان اسلامءَ إيرجيگ كنت، تنك چمي و وتي پاداں چارگ و دگراني حقءَ جاه نيارگ جهان اسلامءَ گيشتر إيرجيگ كنت. اپسوزي گپے كه انگتا ماں جهان اسلام و مئي ملكءَ هں كسانے هست أنت دگراني حقءَ جاه نيارأنت. إے پيميں مردماں جمهوري اسلاميءِ نظام و شيعه و سنيءِ تپاكيءَ تاوان دينت. من إے مردماني ضرر و تاوان چه ترندرويں گروپاني ضررءَ كمتر نزاناں.
زاهدانءِ اهلسنتءِ جمعهءِ پيشنمازءَ په اسلامي و راجي هيالءِ نيمگءَ تاكيد كت و پرمائينتي: هيالاں بايد اسلامي و راجي هيال ببنت؛ كسانے كه راجي و اسلامي هيال إش هست په آياں شيعه وسني يك أنت. پچے عراق و سورياءِ مردماں يكادگرءِ گورءَ زندگي كت مكن أنت؟ كسانے كه عراقءَ كشگ بنت عراقءِ وتي جندءِ مردم أنت، فرق نكنت شيعه ببنت ياسني يا كورد يا عرب؛ إشاں پهكاں عراقي أنت. همے واستا مسلماناں بايدإنت يكادگرءَ برداشت بكن أنت، پچے كه شيعه و سني و راج و مذهباں گوں اسلام و وتي ملكءَ بندوك أنت. مارا إے حق نيست إنت كه يكےءَ په إشي كه سني يا شيعه إنت آئيءِ حقءَ جاه ميارإيں و زبهري بكن إيں.
مولانا عبدالحميدءَ وتي گپاني آسرءَ اسلامي ملكاني سروكاني گوشت: من چه إے گونڈيں تريبونءَ اسلامي ملكاني سروك و جهان اسلامءِ سرجميں زانتكار و عالماں توار پر دياں كه وتي استراتيجي و موقفءَ بدل بكن إت؛ هر جاورےءَ وتي خاصيں استراتيجي هست إنت و جهان اسلامءَ هنوگيں جاوراني ديمءَ نوكيں استراتيجي إے پكارإنت، و من په جهان اسلامءِ هنوگيں مجيں جاور و ناگيگياں ابيد چه گپ و تران و يكادگرءِ برداشت كنگ و گون وت تپاك بيگ و راجي حكومت جوڑينگ دگه استراتيجي و راهے نگنداں.
سرچمگ: شیخ الاسلام مولانا عبدالحمیدء ہال رسانی سایت
چمشانک