مروچی : 13 تیر , 1393

“بـلـوچـستان”بلوچانی راجی پَجّارإنت وهچ پیمءَ گار کنگ نبیت

“بـلـوچـستان”بلوچانی راجی پَجّارإنت وهچ پیمءَ گار کنگ نبیت

تازه یاں ماں لهتے دولتی و رسمی چِٹّی و نبشته یانی تها گندگ بیت که لهتے په قصد لوٹ أنت بلوچستانءِ نامءَ چه وتی نبشته و چِٹّی یانی تها حذف وبیگواه کن أنت، تا چه إے طریقءَ بتوان أنت همیشه واستءَ بلوچستانءَ چه دنیاءِ مُل بت (نقشه)ءَ گار بکن أنت.

په سنی آنلاینءِ هالکاریءَ : گوں إشی که ملکءِ رهبر، راجکماش و إے دگه مسئولاں هَمُک وهد په وحدت وتپاکیءِ نیمگءَ مردمانءَ گوانک جن أنت و چه قومی ومذهبی اختلافءِ جوڑ بوگءَ منع کن أنت، بلے گندگ بیت که لهتے وتی نفع و سیتءَ ماں قومی اختلاف ودرگیریانی تها زان أنت، وهمک وهد کوشش کن أنت تا مردمانی در میانءَ قومی ومذهبی جنگ واختلاف جوڑ بیت. ماں إے درگتءَ نوکتریں هال، “بلوچستان”ءِ حذف بیگ ماں لهتے اداره یانی چِٹّی ونبشه یانی تها إنت.
إے بارهءَ واجه عبدالوهاب ایران نژاد، یکے چه بلوچ راجے نبیسوک وزانوگراں، اول سرءَ إے جار جت و ماں وتی فیسبکی تاکءَ چه “کمیته امداد امام خمینی” که ماں وتی چِٹّی و رسیدانی تها بلوچستانءِ نامی حذف کتگ ات گله ای کت. گڑا دیر نبیت که “کمیته امداد امام خمینی”ءَ وتی إے کار سیسٹمی غلط و اشتباهے زانت و په آئیءِ راست نبیسگءَ وعده دات. بلے گوں بلوچ راجءِ پٹ وپولءَ زانگ بیت که إے بس سیسٹمی غلط واشتباهے نهنت بلکیں بازیں اداره إے چوشکه “بانک قرض الحسنه مهر ایران” ماں چهبار، “بیمه سلامت ایرانیان” ماں نیکشهر، ولهتے دگه بلوچستانءِ نام إش حذف کتگ. و زانگ بیت که لهتے لوٹ أنت په وتی نامرادیں مرادانی رسگءَ استانءِ نامءَ بس بنبیس أنت”سیستان” وبلوچستانءَ إے پیمءَ چه دنیاءِ مُل بت (نقشه)ءَ گار بکن أنت.
گوشگی إنت پیشترءَ حضرت شیخ الإسلام مولانا عبدالحمیدءَ ماں وتی جمعهءِ وعظانی تها چه بلوچستانءِ نامءِ حذف بیگءَ منع کت وپرمائینتی: چه قدیما إے استانءِ نام “بلوچستان” بوتگ، بلوچستان مئے راجی پجّار إنت و ماں ایرانءِ راجدپتر (تاریخ)ءَ ثبت إنت و آیاں که لوٹ أنت بلوچستانءِ نامءَ گار بکن أنت ما آیانءَ وتی دژمن زانیں. دیمءَ لهتے چه إے بت (عکساں) که بلوچستانءِ نام حذف کنگ بوتگ پیش کنگ بیت.

 


چمشانک

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *