مروچی :جمعه, ۱۰ فروردین , ۱۴۰۳

سوره عصر، دین وحکمتءِ خلاصه

سوره عصر، دین وحکمتءِ خلاصه

وَالْعَصْر ﴿1﴾ إِنَّ الْإِنسَانَ لَفِي خُسْر﴿2﴾ إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ ﴿3﴾
رجانک: سوگند انت زمانگئے(1) (كه)بے شك درستيں مردم نقصانءِ تهاينت  ابيد هما كساں كه ايمان إش آرت ونيكيں عمل إش كت ونصيحت إش كت يكدگرا په بر حقيں دينءَ ونصيحت إش كت يكدگرا په صبرءَ.

 

فضيلت
     إے گونڈيں سوره،  دین و حکمتءِ  خلاصه إنت و حضرت امام شافعی رحمة الله علیهءَ وش گوشتگ که اگاں چه قرآن شریفءَ تهنا  همی سوره نازل کنگ ببوتین په انساناني هدایتءَ بس أت.
وهدے كه بزرگان گوں يكادگرءَ ملاقات بوتگ أنت گڑا تا إے سوره إش يكادگرءَ نه اشكنائينتگ جدا نبوتگ أنت.

تفسیر و گیشوار
ماں إے آيتءَ، مراد چه عصرءَ سئے چيز بوت كنت:
– 1 زمانگ كه ماں زمانگءَ انسانءِ عمر هم شامل إنت و خدا په خاطرءِ وقتءِ اهميت ديگءَ په آئيءَ سوگند يادكنت
– 2 يا مراد چه عصرءَ،‌ نماز عصرإنت كه بخاطر ءِ آئيءِ مزنيں فضيلت خداوند متعال په آئيءَ سوگند ياد كنت.
 -3 یا سوگند إنت مئی مبارکیں پیغمبرءِ زمانگئے.

مستریں تاوان
زمانگ، انسانءِ عمرإنت، هر دم و نفسے که انسان کشّیت، چه إے دنيا دوربيت و په موت و قبرءَ نزدیکتر بیت.
هر روچ و ساعتے که انسان په غفلت و ناهودگیں کاراں بگوازینیت، گوشيگا که آ وت گوں وتی دستاں، مبارکیں نعمتے که الله تعالیءَ، آئی نصیب کتگ تاوان  و زوال کنگاإنت. سال، ماه، روچ و ساعت، مزنین سرمایه أنت که انسان، گوں إشاں په دنیا و آخرتءِ کامیابیءَ رسیت و اگاں په نسیان و غفلتءَ گوازینگ ببنت، په انسانءَ وبالے بنت؛ همے واستا الله تعالی په  وقتءَ قسم یادکنت تا که انساناں هوشیار ببنت.

وش نصیبیں انسان
وش نصیب و نگبهت هما کس إنت که ماں إے كميں عمرءَ وهد و ساهتانءَ غنيمت زانت و چه ٹيم و زمانءَ وشي سرءَ كٹ و سوب گيرت و وتي آجهانءَ آبات كنت و په سعادت و كمالءِ رسگءَ، وتی کوششان جاری داريت.
په إشي كه انسان چه خسارت و ناكاميءَ بركّيت چار چيزي پكارإنت:
اول إشي خدا و رسولءِ سرءَ ایمان بیاریت و آیانی هدایات و وعده يانی سرءَ _ توری آیانی تعلق به دنیاءَ به بیت یا گون آخرتءَ _ پوره یقین بکنت. دومی إے كه آئيءِ یقینءِ اثرل محض داں قلب  و دماغءَ محدود مبیت بلکیں هم ماں جوارح (اعضایان) ظاهر به بیت و آئیءِ عملی زندگی، آئیءِ قلبی ایمانءِ آدینک ببیت.
سومی إے كه محض وتی جندءِ فلاح  و اصلاحءِ سرءَ قناعت مکنت بلکیں قوم و راج و إے دگه انساناني صلاحءِ خیالءَ هم بداریت. چارمی إے كه هر یکے، دومیءِ فكرءَ ببيت و آئيءَ سوج و نصيحت بكنت و اگاں ماں إےراهءَ هر چينچو سكي و سوري بگنديت، صبر و اوپاربكنت. هر کسے که إے چاریں وصفانی سرا عمل کنوک  به بيت آئيءِ نام زمانهءِ تا کدیمانی سرءَ په مدامی پشت کپیت.

دو پیمین وصیت
ادءَ دو پيميں وصيت ذكر بوتگ، یکے وصیت په حق و دومی وصیت په صبرإنت. مراد چه حقءَ قرآن إنت و مراد چه صبرءَ پرهیز کرتن چه گناه و معصیت إنت.
گڑا اولي لبزءِ حاصل امر به معروف و  دومی لبزءِ حاصل نهی چه منکرإنت و إے دوئینای حاصل، ایمان و عمل صالح إنت که انسان وت اختیار بکنت و دگران ءَ هں تاکید و وصیت بکنت.

مزنین ارشاد و نصیحت
چه إے سورهءَ زانگ بيت كه انساں بايدإنت وتي زندگيءَ، قرآن و پيغمبرءِ سنتاني طريقهءَ بگوازينيت و پدا إے چيز تهنا كافي نه إنت؛ بلكيں إے دگه مسلمانانءَ هں دیم په ایمان  و عمل صالحءَ وتي توانءَ دعوت بدنت، پر چے که تهنا عمل په وتی نجاتءَ بس نه إنت و اگاں انسان وت نيكيں كار بكنت بلئے آئیءِ اهل و عیال و دوست و قوم بديں كار بکن أنت و آئي هں دعوت إش مدنت گڑا آ وتی راه نجاتءَ تباه و بربادکنت، پرچے که آ په قرآن و حدیثءَ عمل نکتگ.
الله تعالی پهکین انسانانءَ، إے سورهءِ سرءَ عامل بگردائینیت( آمین )

عبدالرئوف قلندرزهی
سرچمّگ: اسلامءِ توار

 

 

 


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *