مروچی :جمعه, ۱۰ فروردین , ۱۴۰۳

پاكيں قرآن أفضل الذكر و آئيءِ وانگ عبادت إنت

پاكيں قرآن أفضل الذكر و آئيءِ وانگ عبادت إنت

شيخ الإسلام مولانا عبدالحميدءَ ماں جمعهءِ نمازءِ گپاں گوں إے مطلبءِ پرمائينگءَ « پاكيں قرآن أفضل الذكر و آئيءِ وانگ عبادت إنت»، صدر اسلامءِ مسلماناني عزت وشرفءِ دليل، عمل كنگ په قرآن و سنتي زانت.

زاهدانءِ جمعهءِ پيشنمازءَ ماں (2 اسفند 1392)ءِ جمعهءِ گپاں گوں إے آيهءِ وانگءَ«إِنَّ هَذَا الْقُرْآنَ يِهْدِي لِلَّتِي هِيَ أَقْوَمُ وَيُبَشِّرُ الْمُؤْمِنِينَ الَّذِينَ يَعْمَلُونَ الصَّالِحَاتِ أَنَّ لَهُمْ أَجْرًا كَبِيرًا»[آيه: 9 إسراء]بنگيج كت أنت وپرمائينتي: “قرآن كريم بهتريں دستور ورهبند إنت كه خداءَ په انساناني هدايتءَ ديم داتگ، اگاں مسلماناں إے رهبند وقانون وپيغمبرءِ سنتاني سرا عمل بكن أنت گڑا دنيا وآخرتءِ عزت آيانءَ رسيت.” تاريخ گواه إنت كه مسلماني ديمرويءِ دَور هما وهد أت كه مسلماناں قرآنءِ سرا عامل إتنت ورسول اللهءِ سنتان إش وتي الگو كتگ أت، مسلماناں ماں آ دَورءَ همينچو ديمروي كت كه آئيءِ درور رندا نياتك، پچے كه قرآن ماں آياني سرجميں زندگيءَ أت ، آدورءِ مردم اسلام إش مُهر داشتگ أت و نمازءِ سرا پايبند إتنت، حلاليں روزيگ إش وارت وچه حرام ودروغءَ وت إش دور داشت. مسلمان أمانت دار، راست گوش وپرهيزگار أت وخداءِ خالص وصالحيں بنده أت وچه پيغمبري تابعداري كت وهمے پيمءَ مزنتريں تمدن ودود ربيدگ ءِ واهند أت.
زاهدانءِ جمعهءِ پيشنمازءَ ديما پرمائينت: مسلماناں هما وهدءَ گوں بربادي وپد منتگيءَ ديم په ديم بوت أنت كه وت إش چه دينءَ دورداشت ومنكرات وگناه ونفسءِ واهشاني نيمگءَ شت أنت وآسرءَ وتي دنيائي ومعنوي سرمايه إش چه دست دات و وار زبون بوت أنت.
مولاناعبدالحميدءَ گوں اشاره په قرآنءِ رهبندان و اللهءِ دستوراں پرمائينتي: قرآنءِ رهبندان، انسانءَ اڈنكتگ أنت، بلكيں چه خداءِ نيمگءَ أنت. إے كتاب بهتريں ذكر و آئيءِ وانگ عبادت إنت.
پاكيں قرآن مارا بهتريں اخلاق و صفات و اعمال پيش داريت. قرآنءَ غيبت و پشت گوشيءَ حرام جاڑجتگ، گڑا ما هں چه غيبتءَ‌پرهيز بكن إيں. يك روچے صحابه چه پيغمبرءَ جست كت كه اگاں يكےءِ تها عيبے ببيت و ما آئيءِ‌پشتءَ گپ بجن إيں گڑا پدا هں غيبت حساب بيت؟ پيغمبرءَ‌پرمائينت: اگاں آ عيب آئيءِ‌تها ببيت گڑا غيبت إنت و اگاں آئيءِ تها مبيت گڑا بهتام حساب بيت كه چه غيبتءَ هں مزنترإنت.
زاهدانءِ اهلسنتءِ‌جمعهءِ پيشنمازءَ ديمءَ په شريعتءِ‌رهبنداني سرءَ عمل كنگ تاكيد كت وپرمائينتي: اللهءِ‌كمك ومدد هما وهدءَ مسلمانانءَ رس أنت كه قرآن و پيغمبرءِ‌سنتاني سرءَ عمل بكن أنت. مني توصيه و سوج په مسلمانان خاصكار عزيزيں حافظان إشنت كه شپاني تها قرآنءَ ماں نمازاں بوان أنت. مسلماناني ديمروي ماں قرآنءِ‌رهبنداني سرءَ عمل كنگ و آياني پدمنتگيءِ‌ سبب، گناه ومنكراتي نيمگءَ‌ روگ إنت. گڑا مسلمانان هر چينچو كه ٹكنولوجيءِ لحاظءَ‌ديمءَ‌بروأنت پدا هں نبايد وتءَ‌چه قرآنءَ دور بدارأنت.
واجهءَ گوں تاكيد په اسلامي حجابءِ رعايت كنگءَ‌پرمائينتي: مسلمانان بايد اسلامي پوشاك وحيا و پاكدامنيءِ‌نيمگءَ دلگوش بكن أنت و چه بديں نگاه و بديں بهرزورگ چه انٹرنٹ و ماهوارهءَ پرهيز بكن أنت و مواد مخدر و الكلي مشروباتءِ نيمگءَ مروأنت.
مولانا عبدالحميدءَ آسرءَ گوں اشاره په پانزدهمي سراسري نمايشگاه كتابءِ‌برجم دارگ ماں زاهدانءَ، ‌چه پهكيں شنگكاراں كه ماں إے نمايشگاه إش بهرزرتگ أت وتي منتواري وقدرداني درشان كت وهمے پيمءَ‌چه «فرهنگ و ارشادءِ‌اداره»ءَ كه په إے نمايشگاهءِ دارگءَ كوششي كتگ أت منتواري و قدرداني كت و په إے كارگس وادارهءِ‌سوبمندي ماں «اسلامي دود و ربيدگءِ شنگ كنگ»ءَ‌دعائي كت.

 

 

 

 

 

 

 


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *