شيخ الإسلام مولانا عبدالحميدءَ گوں إے چيزءِ بيان كنگ كه ” اسلام په حلاليں روزيگءِ در گيجگ وپه جائزيں تجارتءَ توصيهءِ كنت” په حلاليں تجارتءِ كنگ، خداءِ بندگيءِ گورءَ تأكيدي كت.
زاهدانءِ اهلسنتءِ جمعهءِ پيشنمازءَ (25بهمن1392 / 14 فروری 2014)ءِ جمعهءِ گپاں گوں إے آيت ءِ وانگءَ «رِجَالٌ لَّا تُلْهِيهِمْ تِجَارَةٌ وَلَا بَيْعٌ عن ذكر الله»[نور: آيه37] بنگيج كت وپرمائينتي: اسلام په نماز، روچگ، زكات وحجءَ دستور داتگ وتأكيد كنت كه انسان چه خدا شموشكار مبيت، اسلام پراه گور وسيعيں دينے كه انسانانءَ خير ونگبهتي ءِ نيمگا رهشوني كنت. اسلام رهبانيتءِ دين نهنت كه انسانءَ په غاراني تها نندگ وگوشه نشينيءَ دستور بدنت وچه اجتماعي زندگيءَ يك گور بكنت. اسلامءِ دستور إشنت كه خداءِ بندگيءَ بكن إت وپه جائزيں كار وحلاليں روزيگءَ گلائيش ببئيت وراحتيں زندگي إے شمارا ببيت. اسلام گوں كسے كه كار مكنت وبس په عبادتءَ گلائيش ببيت مخالف إنت.
واجهءَ گوں تأكيد په گلائيش بوگ په كشاورزي ومالداري وصنعتءَ، پرمائنيتي: اسلام په ورگ چه وتي دسترنجءَ باز تأكيد كتگ. پيغمبرءَ مدينهءِ تها جاڑجت كه وتي زميناں بكِش إت وكشاورزي بكن إت واگاں وت نتوان إت گڑا دگراني دست إش بديت تا كشاورزي بكن أنت. حلاليں روزيگءِ درگيجگ عبادت حساب بيت.
قرآن مجيد پرمائينيت: « يَا أَيُّهَا الرُّسُلُ كُلُوا مِنَ الطَّيِّبَاتِ» [مومنون: آيه 51]؛ اسلام په صنعتءَ تشويق كنت. شما مردم كارخانه بجن إت وسرمايه گذاري بكن إت ومردماني واستا كار پيداگ بكن إت.
زاهدانءِ اهلسنتءِ جمعهءِ خطيبءَ «حيا ولجءِ دارگ» ءَ چه اسلامي دستوراں زانت وپرمائينتي: اسلام په حيا وپاكدامنيءَ تأكيد كنت و پنڈگ يك پيميں بے حيائي إے تا جائيكه انسانءِ وس رسيت بايد كار بكنت و وتي دستءَ دگراني نيمگا دراج مكنت.
زاهدانءِ اهلسنتءِ جمعهءِ پيشنمازءَ پرمائينت: الله تعالي قرآن محيد تها هما تاجرءَ تعريف دنت كه آئيءِ تجارت آئيءَ چه نماز، روچگ، زكاتءِ ديگ وخداءِ ياتءَ شموشكار نكنت و په صحيحيں تجارتءَ گلائيش إنت. رسول اكرم پرمائينيت: «راست گوشين وامانت داريں تاجراں قيامتءِ روچءَ گوں پيغمبر وصديقاں حشر بنت.»
واجهءَ ديما پرمائينت: اسلام كنجوسي وبزدليءَ إير جنت و نمنّيت، پچے كه إے دوئيں صفت په مسلماناں باز بد أنت. مسلمان بايد فقير ومسكيناني چارگءَ بكنت.
دارالعلوم زاهدانءِ مديرءَ ما إے بهرءِ گپاني آسرءَ «ناروائين وناجائزيں تجارتاں» إيرجت و گوں تأكيد په دلگوش ديگ په سرمايه گذاريءَ پرمائينتي: مواد مخدر والكلي مشروباتءِ تجارت، جائز نهنت وچاگردءَ ضربه جن أنت. چاگردءِ مشكلاني مزنيں بهرے په مواد مخدرءِ معامله وناجائزيں تجارتءِ انجام ديگءَ پچتريت.
گروگان گيري و ناامني پيداگ كنگ، په اهلسنتءَ مزنيں ظلمے و إيرانءِ مهلوكءَ زيان و ضرر دنت
زاهدانءِ اهلسنتءِ جمعهءِ پيشنمازءَ ماں دومي بهر چه وتي گپاں گوں وتي وشحاليءِ درشاں كنگ چه ملكءِ هنوگيں جاور و حالاتءَ، إے چيزي انقلاب اسلامي و بيداري اسلاميءِ برورد زانت و پرمائينتي: اللهءِ شگرإنت كه ملكءِ هنوگيں جاور وحالات باز وش أنت و مردم نيك و بدءَ جاه كارأنت و مسايلءَ وشي سرءَ پچ ورچ كن أنت. ملت إے چيزءَ شري سرءَ سرپدإنت كه ماں نوكيں دولتءَ چه سرمايه گذاري و سرمايه گذارں پلامرزي و حمايت بيت. إے دولتءِ واهگ كارپيداگ كنگ، كارخانهءِ جَنَگ و تورمءِ دوركنگ إنت. پمشكا ما را إے دولتءِ سياستاني سرءَ بروسه هست إنت و اميدوارإيں كه مئي استان و ملك ديم په آباداني و ديمرويءَ گام جنان ببيت.
زاهدانءِ اهلسنتءِجمعهءِپيشنمازءَ په ملكءِ هسته اي مذاكراتءَ اشاره كت و پرمائينتي: هسته إيءِ موضوع يكے چه ايرانءِ مزنيں مشكلان أت كه گوں رنديگيں مذاكرات و گند وننداں گيشينگ بوت و ظاهر بوت كه ايران، هسته اي سلاحءِ رندءَ نه إنت؛ بلكيں ايرانءِ ملت صلح آميزيں هسته إيءِ رندءَ إنت. صلح آميزيں هسته إي ايرانءِ حق إنت و هچ واك وقدرتےءَ حق نيست كه ما را په إے چيزءِ رسگءَ مئيليت.
واجهءَ ديمءَ پرمائينت: نوكيں دولت إے چيزءِ رندءَ إنت كه راج و مذهباں ارزش بدنت و تبعيض و نابرابرياں دوربكنت و قانونءَ اجرا بكنت.
يكے چه ڈاكٹر روحانيءِ واهگاں إيش أت كه قانون، ملكءِ تها كاربندگ ببيت و پهكيں مردماں په يك چمے چارگ ببنت و درستاں ايرانءِ درجه يكيں باشنده ببنت.
دارالعلوم زاهدانءِ مديرءَ په “افرادءِ كاربندگءَ حَسبِ آياني توانمندياں” اشاره كت وپرمائينتي: مهلوك إے چيزءِ رهچارإنت كه تبعيض و نابرابرياں دوركنگ ببنت و چه پهكيں راج ومذهباني توانمند و كاربلداں كارگرگ ببيت. ماں افرادءِ كاربندگءَ، مذهب و قوم چارگ مبيت، بلكيں آياني توانمندي و كاربلدي چارگ ببيت و راجكماشءِ گپ و نوكيں دولتءِ سياست هں همش إنت كه إے سياست باز وشيں سياستے كه هميشگي امنيت و تپاكيءَ كاريت.
مولانا عبدالحميدءَ گوں هنوگيں گروگان گيريءِ محكوم كنگءَ كه لهتے مرزبان گروگان گرگ بوتگ أنت پرمائينتي: ماں پهكيں جاور و حالاتءَ خاصكار ماں هنوگيں وهدءَ كه ايرانءِ مهلوك په ملكءِ آبادي و ديمرويءَ باز اميد وار أنت، راهءِ بندگ وگروگان گيري و نا امنيءِ پيداگ كنگ رد إنت. گروگان گيري ماں هر جاور وحالے ءَ كه ببيت رد إنت ودرست نه إنت. نا امنيءِ كارگ، سرمايه گذاران نئيليت كه ماں استانءَ سرمايه گذاري بكن أنت كه إے چيز په استانءِ سرجميں مردم، چه شيعه و چه سني ضرر إنت.
واجهءَ پرمائينت: آ كسانے كه سيمسر ومرزاني إے ديمءُ وآديمءَ بمب تْراك و گروگان گيريءِ رندءَ أنت إشيءَ بزان أنت كه نا امنيءِ پيداگ كنگ په اهلسنتءَ مزنيں ظلمے وپه إيرانءِ مهلوكءَ ضرر وزيان كاريت. اهلسنتءِ مردم ماں سيستان وبلوچستان و تماميں إيرانءَ نا امني وگروگان گيريءَ نمن أنت وهركسيءَ كه گروگان گيري بكنت ونا امني بياريت محكومي كن أنت، آ كسانے كه گروان گيري كن أنت، دور چاري إش نيست.
زاهدانءِ اهلسنتءِ جمعهءِ پيشنمازءَ پرمائينت: مني نيكيں سوج په گروگان گيراں إشنت كه إے كارانءَ انگار بكن إت وبنديگاں آزات بكن إت، إشاں جمهوري اسلاميءِ مرزبان وسرمچاران أنت وآياني لوگءِ مردم وپهكيں ملت په آياں پريشان أنت. منيں عيدالحميد شمئي خير وصلاحءِ لوٹوكاں حتي كسانے كه مني مخالف أنت من آياني خيرءَ هں لوٹاں منءَ وتي غم نگپتگ، بلكيں من په إيرانءِ مهلوكءِ شري وصلاحءَ فكر كناں.
واجهءَ ديمترءَ ديم گوَر په مخالفان كت وگوشتي: ماں هنوگيں دورءَ إيرانءِ تها په مخالفاني گپاں دلگوش ديگ بيت و ملكءِ هنوگيں جاور، گپ وترانءِ جاور إنت، گڑا شما ماں هرجاهے كه هست إت توان إت كه گوں ذمه داراں گپ وتران بكن إت، بلے ماں ملك و استانءَ نا امني پيداگ مكن إت. ما امنيتءِ لوٹوك إيں ونا امنيءَ نمن إيں.
ذمه دار ومسئولاں مردماني سجلي مشكلاني بارهءَ فكرے بزور أنت
زاهدانءِ اهلسنتءِ جمعهءِ پيشنمازءَ ماں دگه بهرے چه وتي گپاں په “سجلي مشكلاں” و”مجوز ديگ په لهتے روستا وميتگاں” اشاره كت وپرمائينتي: ذمه داراں إے چيزءِ بارهءَ دلگوش بكن أنت كه ماں سيستان وبلوچستانءَ بازيں مردمےءِ سجلاني سرا “مشكوك التابعة” يا “ممنوع الخدمات” جنگ بوتگ كه لازم إنت ذمه داراں، استاندار وملكءِ وزارت إے بارهءَ فكرے بكن أنت وحقءَ چه باطل جدا بكن أنت. واجهءَ پرمائينت: ما جعلي سجلاني پلامرزيءَ نكنيں، بلكيں لوٹيں كسانے كه اصلي سجل ومدرك إش گون إنت گڑا آياني سرا ظلم وزوراكي كنگ مبيت. بازيں كسانے كه اصلي إيراني أنت، بلے لهتے مشكلءِ واستا كه ماں گوستگيں نظامءَ بوتگ أنت چوشكه چير بوگ چه سربازيءَ سجل إش نگپتگ، گڑا ذمه داراں په إشاں يك راهے در بگيج أنت.
زاهدانءِ اهلسنتءِ جمعهءِ خطيبءَ گونڈو وجنيناں بے محرمءَ دزگير كنگ وآياني برگ په اردوگاهاں إيرجت وإے كاري “اسلامي رهبنداني مخالف” زانت. مولانا عبدالحميدءَ دومي مشكلءِ بابتءَ پرمائينت: بازيں شكايتے موجود إنت كه منابع طبيعيءَ لهتے قديمي روستاياني بے مجوزيں ساخت وسازءِ بابتءَ گير داتگ كه إشي فقهي رهبند “القديم يترك علي قدمه” مخالف إنت، گڑا نبايد كوهنيں روستا و ميتگاني ساخت وساز گوں مشكلءَ ديم په ديم ببيت. همے پيما آ ميتگانے كه هنو بندگ بوتگ أنت نبايد ويران كنگ ببنت، منابع طبيعي پيسر چه إے ميتگاني بندگءَ بايد آيانءَ بگوشيت مجوز بگر أنت. مني توصيه په شهرداريءِ ذمه داراں إشنت كه پيسر چه لوگءِ بندگ مردمانءَ په مجوزءِ گرگ مجبور بكن أنت، نه إشي كه رند چه بندگءَ گوں آپ وبرقءِ كهت كنگ ولوگءِ ويران كنگءَ، پاترپ ديگ ببنت. واجهءَ په “سند ازدواج” و “سند املاك”ءِ گرگءَ تأكيد كت.
چمشانک