مولانا عبدالحمیدءَ گوں إے چیزءِ بیان کنگءَ ” نباید ماں پاکیں مردمانی بوتن روچءَ گوں گناهءُ ردیں کاراں شاتکامی کنگ ببیت ” په پیغمبرءِ زندگیءِ پٹءُ پول کنگءُ عمل کنگ آئیءِ سنتانی سرءَ تاکید کت.
زاهدانءِ اهلسنتءِ جمعهءِ پیشنمازءَ ماں جمعهءِ گپاں (20- دی-1392)ءَ رند چه إے آیتءِ وانگءَ «لقدکان لکم فی رسول الله اسوة حسنة لمن کان یرجو الله والیوم الاخروذکرالله کثیرا» پرمائینتی: ربیع الاولءِ ماه، پیغمبرءِ پیداگ بوگءِ ماه إنت؛ بلئے گوں مهتر عیسیءِ بوتن روچءَ که مسیحیاں جشنی گرأنت باز فرق داریت. فرق إشنت که مسلماناں ماں پاکیں پیغمبرءِ میلادءَ آئیءِ سیرتءِ نیمگءَ دلگوش کن أنتءُ گیشتر په مهترءِ سنتانی سرءَ عمل کن أنت.بلئے ماں حضرت عیسیءِ بوتن روچءَ، کریسمسءِ عیدءَ جشن گرأنت که اودءَ ناچءُ ردیں کارءُ فحشاء انجام گیرت. ماں جاورے که نباید ماں پاکیں مردمانی بوتن روچءَ گوں گناهءُ ردیں کاراں شاتکامی کنگ ببیت.
الحمدلله مسلمانان گوں دلگوش کنگ په پیغمبرءِ هیلءُ عادتءُ آئیءِ سیرتءِ تذکرهءُ عمل کنگ په آئیءِ سنتاں شاتکامی کن أنت. هما پیمءَ که واجه دوئیں عیدانءَ گوں دعاءُ پریاتءَ جشن گرأنت.
واجهءَ پرمائینت: حضرت رسول اکرم هنچیں شخصے إنت که قیامتءِ روچءَ سرجمیں نبیاں گوں وتی امتیاں، آئیءِ بیرکءِ چیرءَ قرارگرأنتءُ مهتر په پهکاں شفاعت کنت. واجه پیغمبر، شفاعت کبریءُ مقام محمودءِ واهندإنت.
پیغمبر پهکیں نبیانی پهرإنت؛ حضرت آدمءُ ابراهیم خلیل الله په إشی که پیغمبر چه آیانی نسل إنت پهر کن أنت. پیغمبر هماإنت که هچ مٹءُ درورے نیستیپیغمبر هماإنت که هچ مٹءُ درورے نیستی ماں ظاهریءُ باطنی وشرنگیءُ ماں اخلاقءُ سیرتءَ بے مٹ أت.
حضرت حسان واجهءِ بارهءَ پرمائینیت: خلقت مبرأ من کل عیب کانک خلقت کما تشاء.
حضرت انس پرمائینیت: من ده سالءَ مهترءِ خدمتءَ کت، هچ چیزےءَ نرمتر چه مهترءِ دستءَ ؤ هچ عطرےءَ وشبوتر چه مهترءِ عطرءَ من ندیت.
دارالعلوم زاهدانءِ کارمسترءَ پرمائینت: مردم وتی رهشوناں بیارأنتءُ گوں پیغمبرءِ سیرتءَ مقایسه بکن أنت؛ گڑا گندأنت که امکان هست آیانی رهشونانی توکءَ هر وڑیں عیبے ببیت.؛ بلئے پیغمبرءِ سیرت چه هر عیبءُ ردیءَ پاک إنت. حضرت عایشه مهترءِ اخلاقءِ بارهءَ پرمائینیت: ک«ان خلقه القرآن.» پهکیں قرآن ماں پیغمبرءِ زندگیءُ عملءَ موجودأت.
مولانا عبدالحمیدءَ پرمائینت: مهتر رسول اللهءَ پرمائینتگ: من اللهءِ بندگءُ آئیءِ پیغامانی آروک أوں، منءَ مسیحیانی وڑءَ بالا مبرإتءُ گوں خداءَ برابر مزان إت.
پیغمبر انسانانی سردارءُ نبیانی امام إنت. رسول اللهءَ په رسولءُ پیغمبر توصیف کنگ وش إنت؛ بلئے اللهءِ صفات بس اللهءِ وتیگ أنتءُ نباید ما دگرےءَ گوں آئی شریدار بکن إیں. حتی پیغمبرءَ هں بس اللهءِ بندگءُ رسول بزان إیں.
شیخ الاسلامءَ پیغمبرءِ زندگیءِ بارهءَ پرمائینت: پیغمبرءِ زندگیءِ مهمتریں بهر حقوق العبادإنت. دلگوش کنگ په جنینانی حقاں یکے چه حقوق العبادءِ مهمتریں بهران إنت.
پتءُ ماتءِ آروس دیگ وتی جنیں چوکانءَ یکے چه إے مواردإنت.
رسول الله پرمائینیت: وهدے که شما لوٹ إت جنوزاماں آروس بده إت؛ گڑا چه آیاں اجازه بگرإتءُ اگاں شما لوٹ إت که وتی جنیں چوکانءَ آروس بده إت؛ گڑا گوں آیاں مشوره بکن إت. بے مشوره کنگ گوں آیاں، آروس إش مده إت.
پتءُ ماتءَ إے حق نیست إنت که جنیں چوکانءَ په زور آروس بده أنت. اگاں یک مردینءُ جنیں چوکے لوٹ أنت که گوں وتءَ آروس بکن أنت گڑا نباید پتءُ مات آیانی دیمءَ بگرأنت.
البت اگاں آیان گوں یکادگرءَ برابرءُ هم کفو نه إتنت یا دینداریءُ نسبءِ لحاظءَ گوںیکادگرءَ برابرءُ نزیک نه إتنت گڑا پتءُ ماتءَ ایرادءِ گرگءِ حق هست.
چاگردءِ مردم، شیعهءُ سنی إیں ترندی کنوکانءَ یله دینت
مولانا عبدالحمیدءَ ما ں وتی جمعهءِ گپانی دومی بهرءَ گوں اشاره په «تپاکیءِ هپتگ»ءِ آیگءَ پرمائینتی: پیغمبرءِ بوتن روچءِ هپتگءِ نام إیرکنگ په «تپاکیءِ هپتگ»ءَ چه امام خمینی، اسلامی انقلابءِ رهشونءِ نیمگءَ په إے معنا إنت که مهترءِ وجود په اسلامی امتءَ وحدتءُ تپاکیءِ آروک إنت، حتی په سرجمیں انسانیتءُ آ دینانے که گوں اسلامءَ همگرنچی إش هست تپاکیءِ آروک إنت.
زاهدانءِ اهلسنتءِ جمعهءِ پیشنمازءَ دیمءَ پرمائینت: پیغمبرءَ ایوکءَ گوں همایاں جنگ کتگ که په مسلمانانی جنگءَ آتکگ أنتءُ تجاوز إش کتگءُ إے دگه انسانانی حقان إش جاه نیارتگ. رسول اللهءَ گوں زوران سریں بادشاهءُ سرداراں جنگ کتءُ په درستیں کافرانی جنگءَ نشتگ. گوں بازیں کافرے چه عرباں صلحی کت. همے واستا مهتر په بشریتءَ تپاکیءُ وحدت، اخوتءُ براتیءِ پیغمبرأت.دارالعلوم زاهدانءی مدیرءَ گوں اشاره په اشی که مروچی اسلامی امتءَ گیش چه پیشءَ په وحدتءَ نیاز داریت، پرمائینتی: وحدتءُ تپاکی یک سیاسیءُ مقطعی چیزے نه إنت، بلکیں چه قرانءُ حدیثءُ زورگ بوتگ. قرآنءِ تاکید په اشی إنت که: «واعتصموا بحبل الله جمیعا ولا تفرقوا»
واجهءَ پرمائینت: اسلامءُ مسلمانانی دژمنان که چه اسلامی آگاهیءَ بیم إش هستءُ گندگاأنت که اسلام په چاگردءِ رهشونیءُ رهدربریءَ پچترگءَ إنت إے بارهءَ سک دلگران أنت؛ پچے که آیاں تهاریءُ گمراهیءِ لوٹوک أنتءُ وتی منافعءِ فکرءَ أنت.
مولانا عبدالحمیدءَ پرمائینت: اسلامی ملکانی مروچگیں أڑءُ جنجالانی سوب، اسلامءِ دژمنان أنت که لوٹ أنت گوں اختلافءُ ناتپاکیءِ پیداگ کنگ مسلمانانی میانجیءَ، آیانی تپاکیءُ همدلیءَ گارءُ بیگواه بکن أنت.
مولاناءَ پرمائینت: پچے مسلماناں اجازه دینت که روسیهءُ روکپتی ملکاں په آیاں تصمیم بگرأنت؟ پچے اسلامی رهشونءُ زانتکاراں وت وتی مشکلاں حل نکن أنت؟ اشیءِ سوب إشنت که مسلمانان إش چه یکادگرءَ جداکتگءُ مسلماناں گوں یکادگرءَ زهرأنت.
واجهءَ گوشت: مسلمانانی عزت ماں تپاکیءُ یکدلی إنتءُ بایدإنت که مسلماناں یکادگرءَ برداشت بکن أنت.
واجهءَ چه راجکماش ڈاکٹر حسن روحانیءِ گپاں ماں استاندارانی مچیءَ وتی وشحالی درشان کتءُ پرمائینتی: ماں هنوگیں شرایطءَ که ملکءِ ذمه دار اعتدال دوست أنت بایدإنت سرجمیں کسانے که ترند روی إش کتگ پدا اعتدالءِ کشکءِ سرءَ بیاینت.
چمشانک