مولانا عبدالحمیدءَ ماں جمعهءِ نمازءِ گپاں گوں تاکیدپه پهریزگ چه اسرافءَ ماں هرتکءُ پهناتے، مالءِ خرچ کنگ ماں گناهءِ راهءَ بدتریں اسرافی زانت.
زاهدانءِ جمعهءِ پیشنمازءَ (13-دیماه-1392)ءِ جمعهءِ نمازءِ گپانی گوں إے آیهءِ وانگءَ «وآت ذاالقربی حقه والمسکین وابن السبیل ولا تبذر تبذیرا » بنگیج کتءُ پرمائینتی: قرآن مجیدءَ اسراف کنوکاں «اخوان الشیاطین» (شیطانءِ براتاں) گوشتگ. هانیں که اسراف یک وڑیں ناشگری إے په نعمتان إنتءُ کسے که اسراف کنت، شیطانءِ وڑءَ ناشگرءُ بے منتے هست إنت.لهتے مفسرءَ إے آیت إے وڑءَ گیشوارکتگ که هما پیمءَ که شیطان وتی عقل وشیءِ سرءَ کارنگپت، انسانے که اسراف کنت آئی هں وتی عقل شریں راهاں کاربندنکنت.
واجهءَ دیمءَ پرمائینت: گوں اپسوزیءَ مرچاں ماں زندگیءِ پهکیں تکءُ پهناتاں اسراف بوگءَ إنت. مهترعثمان رضی الله عنه ءِ ونی لوگءَ دو روشنیں چراگ دیت، واجه گوں اشی که سیریں مردے أت؛ بلئے پرمانی دات که یکیں چراگ کشگ ببیت.
زاهدانءِ اهلسنتءِ جمعهءِ پیشنمازءَ په بے پرواهی ماں آپءُ برقءِ کارمرزکنگءَ ماں لوگانی تها اشاره کتءُ پرمائینتی: إے آپءُ برق رند چه بازیں زحمتاں په ما رس أنتءُ ما وت هں چینچو په إشاں زر ریچ إیں، پدءَ هں ماں إشانی مصرفءَ بے پرواهی کن إیں. گوں اپسوزیءَ چه سرجمیں راجانی تها، ایرانءِ مردم گیشتر اسراف کن أنت.
واجهءَ دیمءَ پرمائینت: اسراف، ناداریءُ تنگدستیءُ مشکل کاریت. بدتریں اسراف مالءِ خرچ کنگ ماں گناهءِ راه إنت.
دارالعلوم زاهدانءِ مدیرءَ «میانه روی ماں زندگی»ءَ چه سوبمندیءُ کامیابیءِ سوبءُ علتاں جاه یارتءُ پرمائینتی: اقتصاد یک اسلامی تعبیرے که میانه رویءِ بزانتءَ دنت؛ هانیں انسان ماں مالءِ خرچ کنگءَ نئے بے پرواهی بکنتءُ نئے بخیلیءُ کنجوسی بکنت. اسلامءِ سوج اشنت که ماں صدقهءُ خیراتءِ دیگءَ نئے باز خرچ کنگ ببیتءُ نئے إے وڑءَ ببیت که آئیءِ لوگءِ مردم چه آئیءِ مالءَ بے بهر ببنت.
اسلامءِ تعلیم إشنت که شخص بایدإنت په وتی وسءَ خرچ بکنت.
مولانا عبدالحمیدءَ ماں وتی گپانی إے بهرءِ آسرءَ په اسراف ماں گدءُ پچءُ لوگءِ ساماں هں اشاره کتءُ چه اسرافءُ بے پرواهی ماں إے بارهءَ هں منعی کتءُ پهکانی چه اسراف کنگ ماں زندگیءِ تکءُ پهناتاں مکن کت.
بصیرتءِ بزانت، آگاهیءُ میانه روی إنت
واجه مولانا عبدالحمیدءَ ماں وتی گپانی دومی بهرءَ گوں اشاره په تشبیهے که پیسرتریں هپتگءَ ماں تهرانءِ جمعهءِ نمازءَ، سال 88ءِ جنجالانءُ جنگ جملءِ میانءَ دیگ بوتگ أت، إے تشبیهی بصیرتءُ عقلءُ اعتدالءِ خلافءَ زانت.
زاهدانءِ اهلسنتءِ جمعهءِ پیشنمازءَ پرمائینت: گوستگیں هپتگءَ لهتے دیوان په «بصیرتءِ دیوانانی» نامءَ دارگ بوت. ماں إے دیوانءُ مراگشاں هنچیں گپ پیش کنگ بوتگ، ما همے مارإت که لهتے بصیرتءِ بارهءَ افراط کنگءَ إنت، بصیرتءِ بزانت، آگاهیءُ میانه رویءُ عدالت إنتءُ چه افراطءُ تفریطءَ درإنت؛ بلئے گوں اپسوزیءَ لهتے ماں وتی گپاں هنچو دگرانی سرءَ ارش کن أنت که افراطءُ ترندرویءَ دچار کپ أنت.
مولانا عبدالحمیدءَ په یکے چه تهرانءِ جمعهءِ نمازءِ بیان کنوکانی گپءَ که سال88ءِ جنجالءُ گرءُ چیلانی په جنگ جملءَ تشبیه داتگ أت اشاره کتءُ پرمائینتی: یکے چه تهرانءِ جمعهءِ نمازءِ بیان کنوکاں، گوستگیں هپتگءَ، سال88ءِ جیڑهءُ جنجالانی په جنگ جملءَ که اسلامءِ بدواهءَ یهودءُ عیسائی یاں، واجه رسول اللهءِ اصحابءَ گوں یکادگرءَ میڑینت، تشبیه داتءُ ام المؤمنین عایشهءِ نامی گپت. ماں جاورے که إے دوئیں واقعه یانءَ گوں یکادگرءَ هچ همگرنچی نیست.
زاهدانءِ اهلسنتءِ جمعهءِ پیشنمازءَ یک لمبے چه حضرت عایشهءِ مناقبءُ فضیلتاں اشاره کتءُ پرمائینتی: إے قران مجیدءِ ٹِکیں گوشگ إنت که: « وازواجه امهاتهم » حضرت عایشهءُ مهترءِ إے دگه لوگ بانکاں، مومنانی مات أنتءُ هچ مسلمانے حضرت عایشهءِ ماتیءَ ردکت نکنت.
واجهءَ دیمءَ گوشت: إے وڑیں تشبیهانی آرگ، عقلءُ راستیں فکرءُ اعتدالءِ خلافءَ إنتءُ افراط زانگ بیت. انقلابءِ مزن رهشونءَ هں هر پیمیں ایرجنگءُ بدگوشی په ازواج مطهرات، پیغمبرءِ اصحابءُ اهلسنتءُ إے دگه اسلامی پاٹاں حرام جارجتگ.
گڑا منی سوج په کسانے که فرقه إیءُ جناحی اختلاف إش هست إشنت که إے مسایلءِ هیالداریءَ بکن أنتءُ وتی اختلافءُ جیڑه یاں گوں اسلامءِ اولی بزرگاں بندوک مکن أنت.
دارالعلوم زاهدانءِ مدیرءَ دیم گور په سرجمیں جناحءُ پاٹاں کتءُ پرمائینتی: ما را گوں هچ پاٹءُ گَلےءَ همگرنچی نیست، بلکیں ما پهکیں پاٹءُ حزبءُ مسلمانانی خیرءِ لوٹوک إیں.
همے واستا منی جرندءِ سوج په سرجمیں پاٹاں، چه اصلاح لوٹءُ اصول پسنداں إشنت که إے جناحی جیڑهءُ جنجالاں یک کرءَ کن إتءُ په ملکءِ آباتیءُ اسلامءِ دیمرویءَ دلگوش کن إت. بایدإنت که جیڑهءُ جنجالاں گوں عقلءُ منطقءُ قانونءَ حلءُ فصل ببنتءُ نباید ما براتیءُ تپاکیءَ بشموش إیں.
چمشانک