مولانا محمد حسین گرگیج،اهلسنتءِ آزادشهرءِ جمعهءِ پیشنماز، ماں زاهدانءِ جمعهءِ نماز وانانی اجتماعءَ گوں آیه: یأیهالناس إنا خلقناكم من ذكر وأنثی وجعلناكم شعوبا وقبائل لتعارفوا إن أكرمكم عند الله أتقاكم إن الله علیم خبیر.(حجرات: آیه13) وانگءَگوشت:وحدتءُ یكدلیءِ حفظ كنگ باید گوں عقیدهءُ مذهبءِ دارگءَ ببیت.
ماں إے آیتءَ كه یكے چه اسلامءِ رهبندی آیاتان إنت الله تعالیءَ مردمانءَ پرمان دنت كه شما باید گوں وتی راج داریءُ قوم داریءِ حفظ كنگءَ بایدں دینیءُ مذهبی حكمان، ءُ تقواءُ خدا ترسیءَ رعایت بكن إت، پچے كه اللهءِ گورءَ تهنا پهریزكاریءُ دینداری، عزتءُ وشنامی ءِ نشان إنت.
دارالعلومءِ فاروقیهءِ گالیكشءِ كار مسترءَ دیما گوشت: هما پیمءَ كه اسلامیءُ ملی وحدت ضروری إنت، همے پیمءَ “عقیدهءِ حفظ كنگ”، “وتی قومی رسمءُ لباسءِ دارگ”،”ملكءِ دارگ”، “مردمانی حقءِ دیگ”، “پهریز چه ظلم”ءُ “دیری چه ظلمءِ كنگ” لازم أنت كه ما باید شانی سرءَ توجه بكنن.
واجهءَ گوشت: هما پیم كه ما اسلامیءُ ملی وحدتءِ لوٹوكن، همے پیمءَ ظلمءُ ناحقیءُ تبعیضءَ په هچكسءَ روا نزانیں.
واجهءَ دیمءَ برزءِ مسائلی گیشتر گیشءُ گیوار كت أنتءُ گوشتی: ما په وتی مسلمانیءَ پهر بندینءُ اسلام مئے بالاتریں افتخار إنت، الله تعالیءَ گوشتگ: ومن یبتغ غیر الإسلام دینا فلن یقبل منه وهو فی الآخرة من الخاسرین.[آل عمران:85]
گڑا عقیدهءُ مذهبءِ دارگ چه هرچیزے مئے واستا لازمتر إنتءُ دینءُ عقیدهءِ چه دست دیگ هنچیں مصیبتے كه هچكس آئیءَ جبران كت نكنت، بلے گوں إشیءَ باید مئے قومیت، زبان، پچءُ إے دگه قومی باوراں حفظ كنگ ببنت؛ بلوچءُ بلوچستان، تركمنءُ تركمن صحرا، لرءُ گیلكیءُ إشانی ملكءُ زبان باید حفظ كنگ ببنت، پچے كه شان كشورءِ ملی سرمایه أنت. ءُ بایدں پهكیں ایرانیاں گوں تمامیں قومءُ زباناں كه ملكءِ تها هست أنت آشنا ببنتءُپجاهش بیار أنت.
راج داریءُ زبان داری، ملی گرایی نهنت، بلكیں وتی اصلیتءِ دارگ إنت
واجهءَ گوشت: منی توصیه په شما إشنت كه وتی چكانءَ په ماتی زبانءِ یادگرگءَ تشویق بكنتءُ همے پیم مسئولءُ دولت مرداں باید په ملكءِ قومءُ راجانی زبان ءِحفظ كنگءَ كوشش بكن أنت. قرآن مجید، ماں سوره رومءِ سیزدهمی آیتءَ رنگءُ قبیلهءِ مختلف بیگءِ كرا زبانءِ اختلافءَ هں یكے چه اللهءِ قدرتان بیان كنت.
واجه گوشت: هچكس نباید مجبور كنگ ببیت كاریءَ بكن كه آئیءِ عقیدهءُ مذهبءَ جائز نهنت.
دیمءَ واجهءَ په وحدتءُ ملیتءِ حفظ كنگءَ تأكید كتءُگوشتی:ما باید وحدتءُ یكدلیءَ حفظ بكن إنت، اگه مارا وڑوڑیں زبان، قومءُ مذهب هست إنت، بلے شیءِ بزانت شی نهنت كه ما په یك دگرءِ نیستءُ نابود كنگءَپاداین، بلكیں باید گوں صلحءُ نرمی گوں وت زندگی بكنبں، باید مئے پهكانی مقصد وحدتءِ حفظ كنگ ببیت.
الله تعالیءَ قرآن مجیدءِ تها په وحدتءِ حفظ كنگءَ تاكید كتگءُ گوشتگی:واعتصموا بحبل الله جمیعاً ولاتفرقوا. بلے افسوزی گپ إشنت كه لهتے سلیقه ای كار كن أنت ءُ لوٹنت دگرانءَ وتی راهءَ بیار أنت. اهلسنتءِ دانش آموزاں بایدإنت إے إجازه دیگ ببیت كه وتی پنچیں وقت نمازاں ٹیم سرا بواننتءُ آیاں نباید مجبور كنگ ببنت كه په یك دیوانءُ محفلے شركت بكن أنت كه آیانی مذهبءَ روا نهنت.
وحدت ءِ دارگ باید گوں مذهبءِ حفظ كنگءَ ببیت
واجه مولانا گرگیجءَ گوشت: عقیدهءُ مذهب چه وحدتءَ مقدم إنت، من باز جار جتگ آ مذهبانے كه قانون اساسیءَ رسمی بیتگ أنت باید ماں وتی تمامیں اعالءُ عبادتءُ عقیده یاں آزاد ببنت چو مبیت كه جمعهءُ عیدءِ نماز وانگ یا مسجد ءِ بندگ جرم ببیت، پچےكه شاں هر یك مردمی حق انت.
اهلسنت هر دابیں نا امنی ماں كشورءَ قبول نكنت
فاروقیه گالیكشءِ كار مسترءَ گوشت: هما پیم ءَ كه مئے وحدت حفظ إنت باید مئے حق هں حفظ كنگ ببیت، ما وتی آپءُ خاكءُ وطنءُ جمهوری اسلامی كه منتگن ءُ ماں پهكیں انتخاباتاں شركت كتگ، حفظ كننءُ هچ دابیں نا امنیءَ ماں كشورءَ قبول نكنن.
اهلسنت امانت داریں مرزدار أنت ءُ حاضر نهنت یك بچیلے چه وتی سرزمینءَ شرقی یا غربی دشمنان بدینت، مئے پهكیں مردم عامءُ خاص دشمنانی دیمءَ اوشتنت بلے گوں إشی ما وتی حقءَ لوٹ إیں.
اهلسنتءِ عالمانی گپاں نباید گوں امنیتیءُ منفی چمءَ چارگ ببنت
مولانا گرگیجءَ گوشت: اگه برے برے لهتے چه واجهاں مذهبیءُ مسایلاں بیان كن أنتءُ چه تبعیضءُ نابرابریءَ گله كن أنت نباید إے گپاں گوں امنیتیءُ منفی چمءَ چارگ ببنت، بلكیں واجهانی گپ دلسوزیءُ خیر خواهی سرا بیان كنگ بنت.
اهلسنت هچبر گوں هچ ڈن ملكیءَ دست نداتءُ گوں آیاں ارتباط بر قرار نكنت، بلے بایدں ماں ارتشءُ انتظامی واكاں ماں پهكیں پستان قومءُ مذهبانی حق دیگ ببیت.
چمشانک