مولانا عبدالحمید گوں إے مطلبءِ پرمائینگءَ « مئی زندگی گوں اللهءِ یادءَ ارزش دار بیت » په مدام اللهءِ یادءَ بوگءُ هنچو چه مهترءَ الگو گرگ ماں زندءِ سرجمیں تکءُ پهناتاں تأکید کت.
زاهدانءِ اهلسنتءِ پیشنماز، آذرماهءِ 22/92 13جمعهءِ وازاں گوں : آیهءِ « أطیعواالله والرسول لعلکم ترحمون» بنگیج کتءُ پرمائینتی: اللهءِ تعالی ءَ ماں بازیں آیتےءَ مردمانی په وتی اطاعت کنگءُ مهتر رسول اللهءِ رندگیریءُ تابع داری لوٹ داتگ.
پاکیں خدا وتیگءُ مهترءِ اطاعتءَ کامیابیءِ نشانی زانتگ.
هما وهدءَ اللهءِ رحمت مارا مان پوشیت که چه آئیءُ مهتر رسولءَ تابع داری بکن إیں.
الله عز وجل ماں دگه جاهے پرمائینیت: «قل أطیعوا لله والرسول فإن تولوا فإن الله لایحب الکافرین» کسانے که الله ءُ آئیءِ رسولءِ اطاعتءَ نمن أنت ءُ آیانی اطاعتءَ بے ارزش زان أنت، إے وڑیں مردم ماں کافرانی رِد أنتءُ الله کافراں دوست نداریت.
واجهءَ دیمترءَ «شریعتءِ پرمانانی اطاعت کنگ»ءَ، چه مسلمانءِ ظاهریں نشانیاں زانتءُ پرمائینتی: مسلمان هما إنت که اللهءِ دیمءَ دست ببندیتءُ اللهءِ پرماناںءُ مهترءِ سنتاں ارزش دار بزانت.
الله تعالی مهتر محمدءَ بهتریں الگو په ما قرار داتگ.اگاں چه ماں تاریخءِ دراجیءَ بازیں نیکمرد چه انبیاءُ اصحابءُ امتءِ إے دگه صالحاں په وشی زندگی کتگءُ مئی الگو أنت، بلے هچ الگوإے مزنتر چه مهترءَ په ما نیست؛ گڑا باید ما مهترءِ زندگیءَ ماں وتی زندگیءِ سرجمیں پهناتاں بیار إیں. مهترءَ چینچو اللهءِ راه ءَ سکی برداشت کتگ ءُ پدا هں صبرءُ اوپاری کتگ؟ چینچو وتی نمنوکانی گپی گوش داشتگ؟ چینچو مسکینءُ دزگٹّانی کمک کتگ؟ سحراں پاد آیگ ، ذکر، عبادت، تواضع، سنگینی، بکششءُ
در گوز کنگ، با مردیءُ دلیری، ورگءُ نندگءُ وپسگءِ طریقهءُ مهترءِ سرجمیں رپتار په ما الگو أنت.
اهلسنتءِ جمعهءِ خطیبءَ ادامه دات : نماز ، حج، روچگءُ مهترءِ عبادتاں پهکاں په ما الگو أنت .
مئی نمازءُ حج تا وهدے که مهترءِ نمازءُ حجءِ وڑءَ مبنت قبول نبنت. مئی نماز ایوکءَ ظاهری لحاظءَ ناں، بلکیں باطنیءُ خشوعءُ خضوعءِ لحاظءَ باید یک تصویرے چه مهترءِ نمازءَ ببیتءُ هنچو مهترءِ روچگءُ ذکر په ما الگو أنت .
حضرت بی بی عایشه صدیقه رضی الله عنها روایت کنت: کان رسول الله صلی الله علیه وسلم یذکر الله فی کل أحیان. الله ءِ ذکرءُ یاد مهترءِ سرجمیں زندءَ مان پوشتگ أت .چه إے روایتءَ سمجگ بیت که آجاهے که زبانی ذکرءِ جاگه نه إنت مهترءَ گوں وتی دلءَ اللهءِ یاد کتگءُ چه آئیءَ شموشکار نبوتگ .
گڑا ما هں دلگوش بکن إیں که مئی زندگی گوں اللهءِ یادءَ ارزش دار ءُ بها دار بیت .
واجه مولانا عبدالحمیدءَ پرمائینت: هرکسے که چه الله تعالیءَ شموشکار ببیت گڑا وتی نفع ءُ سوتءَ بے هیال کتگ همے واستا الله ءِ یاد مئی شپءُ روچءِ سرجمیں پاساں مان پوشیت خداوندءِ متعال گیشتریں تأثیرءَ ماں وتی ذکرءُ یادءِ تها هشتگ . الله تعالیءِ نام مئی زندگی سر تاسرءَ تأثیر داریت . بندگ اللهءِ ناءَ بگریتءُ په اللهءِ یادءَ گلائیش ببیت إے عملءِ تأثیر آ جاها ظاهرءُ پدر بیت ءُ آجاهءَ پر برکتءُ نورانی کنت إے تأثیر په آجاهءِ رسیت که اگه یکے چه آجاهءَ بگوزیت ، وتءش وت الله ءِ یادءش کپیت وهدے ک هانسان مدینه منورهءَ مان بیت همے چیزءَ ماریت که إے شهرءِ مٹ ماں دنیاءَ نیست إنت إے شهر هما إنت که نیکیں انسانان آئیئِ تها زند گوازینتگ مدینه، ذاکران، قرآنءِ وانوکانی ، ءُ مجاهدانی شهر إنت بلے اگاں انسان ماں آ جاهاں که گناه انجام گپتگ انسان گوشیگءَ سنگ دل إنت ماں تهاریاں گام إیر کنگ إنت.
دارالعلوم زاهدانءِ کارمسترءَ پرمائینت: پیغمبرءِ اطاعت بازمهمءُ لازم إنتءُ آئیءِ سنتانی تابعداری کنگ، مزنیں کامیابی إے هست إنت.
زاهدانءِ اهلسنتءِ جمعهءِ پیشنماز ماں وتی گپانی اولی بهرءِ آسرءَ، پهکانی په اللهءِ یاد، وانگءِ رندءَ روگ گوں دینداری، بهرزورگ ماں نمازانی جماعتءَ، خاصکار صبحءِ نمازءَ ءُ جنیناں ماں جمعهءِ نمازاں هِلَّگ توصیهءُ تاکیدکت.
افراطگرانی مرادءُ واهشتءَ پوره کنگ، په شیعهءُ سنیءِ براتیءَ زیان داریت.
واجه مولانا عبدالحمید ماں وتی گپانی دومی بهرءَ گوں اشاره په استانءِ کارمستری تبدیلیاں پرمائینت: نوکیں استاندارءُ اطلاعاتءِ نوکیں مزن کارمسترءُ هنچو زاهدانءِ نوکیں شهردار، هرسه یاں کارزانتءُ پهته کارأنت. اشی یکے چه تدبیرءُ امیتءِ دولتءِ بَروردان إنت که کته کارءُ شهزانتاں کاربندیت.
زاهدانءِ اهلسنتءِ جمعهءِ پیشنماز وتی امیت واری درشاں کت که ماں زاهدانءُ إے دگه شهراں، کاربلدءُ تجربه داراں کارءِسرءَ بیاینت تا که په مردماں وشتر زحمت بکش أنت
واجهءَ دیمءَ گوشت: اللهءِ رضایت ماں مردمانی رضایت إنت. ءُ مردماں راضی کنگ آیاں گیشتر گوں حکومتءَ نزیک کنتءُ گیشتر نظامءِ سرءَ بروسه کن أنت.
واجهءَ پرمائینت: برے ما إشکنٻں که ماں حکومتءِ بنجاه(مرکز)ءَ بازینے سکسری کن أنتءُ اهلسنتءِ کارزانتءُ واکدارانی دیمءَ گرأنتءُ روحانی دولتءَ زورپردینت تاکه چه اهلسنتءِ واکاں بهرمزوریت.
زاهدانءِ اهلسنتءِ جمعهءِ پیشنمازءَ پرمائینیت: مردم اجکّه بیت که خدا چونیں انساں زمینءِ سرءَ پیداگ کتگ. خدا هنچیں انساں أڈکتگ که أبید چه وتی گروپءُ پاٹءَ دگه کسءَ نگندأنتءُ برداشت کت نکن أنتءُ حقءُ عدالتءَ نمن أنت؛ ذے اشخاص گمان کن أنت که راستیں راهءِ سرءَ أنت بلے اشاں – چه شیعه ببنت چه سنی _ افراطگرأنتءُ همشاں ماں تاریخءِ دراجیءَ مزنتریں ضربه په اسلامءُ حتی په وتی مذهبءُ تفکرءَ جتگ إش.
دینی وانگجاهانی شورای هماهنیءِ کارمسترءَ پرمائینت: ماں دنیاءِ هرجاهے که مذهبیءُ فرقه ای جنگانی آس روک إنت افراطگرانی پادءِ پد گنگ بیت.
واجهءَ گوشت: راستیں سَسّاءُ اللهءُ مهتر رسول اللهءِ پرماں إشنت که سرجمیں انساناں گوں یک چمے بچارإٻںءُ وتی فکرءَ مزنءُ پراه گور بکن إٻں.
دارالعلوم زاهدانءِ کارمسترءَ پرمائینت: مئی لوٹ چه محترمیں راجکماشءَ إشنت که إے افراطگرانی إیردستءَ مبیت؛ پچے که آیانی واهشتاں پوره کنگ په شیعهءُ سنیءَ زیان داریت. همے مردمان إتنت که نلوٹ إت إش
روحانی سوبیں ببیت؛ ماں گچینکاریءَ گوں روحانیءَ مخالف إتنت.
مئی امیت همش إنت که إشانی شور إشکنگ ببیت بلے کاربندمبیت.
زاهدانءِ اهلسنتءِ جمعهءِ پیشنمازءَ پرمائینت: مئی واهشت چه انقلابءِ رهشوں که راجءِ پت إنتءُ مدام ملکءِ کارگشادءُ رهدربرإنت إشنت: واجه، روحانی دولتءِ رهدربریءُ پَلّامرزیءَ بکنت تاکه وتی داتگیں وعده یاں پوره کت بکنتءُ راجءُ مذهبانی حقءَ بدأنت.
واجهءَ گوشت: رهشونءِ پلامرزی چه روحانی سبب بیت که افراطگراں په وتی بدیں مراد که اهلسنتءِ گارءُ بیگواه کنگ إنت مرس أنت.
ءُ همے وڑءَ عدل ماں ملکءَ تالاں ببیت؛ پچے که ایرانءِ همدلی إے دگه راجانی همدلیءِ سبب بیت.
زاهدانءِ اهلسنتءِ جمعهءِ پیشنمازءَپرمائینت: مردم تپاکیءِ شعارءَ نمن أنت آیاں عملی تپاکیءِ رندأنت.
واجهءَ آسرءَ گوشت: عدالتءِ تالاں کنگ، تپاکیءِ برجاه دارگءُ تبعیضاں دورکنگ ماں ملکءِ امنیتءَ باز تاثیر داریت. زمانے امنیت پیداگ بیت که عدالت بے روءُ ریا اجرا ببیت؛ گڑا خداءِ غیبی کمکاں کاینتءُ الله راضیگ بیت.
چمشانک