مروچی : 10 دی , 1392

عدالتءِ اجراءُ درستاں په یک چمے چارگ، راجءُ مذهبانی بُندری واهشت إنت

عدالتءِ اجراءُ درستاں په یک چمے چارگ، راجءُ مذهبانی بُندری واهشت إنت

واجه مولانا عبدالحمیدءَماں دیدار گوں حجت الاسلام علی یونسی، راجکماشءِ خاصیں دستیار ماں راجءُ دینی اقلیتانی امورءَ په سرجمیں حقیقیءُ حقوقی اشخاصءِ پایبندی په اساسی قانونءِ رهبنداں تاکید کتءُ عدالتءِ اجراءُ درستاں په یک چمے چارگءَ چه راجءُ مذهبانی اصلی واهگءُ لوٹ شمارکت.

په سنی آنلاینءِ حالرسانی سایتءِ حالکاریءَ، مولانا عبدالحمیدءَ ماں دیوانے که شنبهءِ بیگاه(30-آذرماه-1392)ءَ ماں سیستانءُ بلوچستانءِ استانداریءِ جاگاهءَ گوں حجت الاسلام علی یونسیءِ حضورءَ برجم دارگ بوت، اول سرءَ حجت الاسلامءُ آئیءِ همراهانی وشاتک گوشتءُ چه إے که په إے سفرءَ وت إش زحمت داتگ وتی منتواریءُ قدردانی درشاں کت.
واجهءَ ماں وتی گپانی ادامهءَ سیستانءُ بلوچستانءِ مردمانی« مردمدار، مهمان جلءُ مزن اوپار» توصیف کت أنتءُ پرمائینتی: هما وڑءَ که إے استان مزنءُ پراه گورإنت، إے استانءِ مردمانی دل همے پیمءَ مزن إنت.
إے استانءِ مردم مڑادار، میاردار، مزن اوپار، مهمان جلءُ دین دوست أنتءُ اسلامءِ دوستی إے استانءِ مردمءِ دلانی تها پابرجاه إنت.
زاهدانءِ اهلسنتءِ جمعهءِ پیشنمازءَ دیمءَ گوشت: إے مردم هما کساسءَ که دینءَ دوست دارأنت، په وتی وتی ڈیهءَ هں دوستیءُ مهر کن أنت.
محبت، براتیءُ اخوت، تپاکیءُ وحدت إے استانءِ مردمانی میانجیءَ هست إنت.
دارالعلوم زاهدانءِ مدیرءَ ماں وتی گپانی بهرےءَ په إے مردمءِ مشکلاتءُ نگیگیانءُ سکیانے که برداشت إش کتگ أنت اشاره کتءُ درائینتی: استانءِ مردم ماں تاریخءِ دراجیءَ سکیءُ سوریانی آماچ بوتگ أنتءُ رند چه انقلابءَ هں گوں مشکلاتے دوچارکپتگ أنت، البت چیزوکے خدمت إش هں دیتگ.
واجهءَ استانءِ مردمءِ خصوصیاتءِ بارهءَ پرمائینت: استانءِ مردم مدام ماں انقلابءِ مختلفیں تکءُ پهناتاں هوربوتگ أنت. اسلامی انقلابءِ سروکءُ هنوگیں رهشونءُ إے دگه ذمه داراں چه إے مردمءَدلگراں نبوتگ أنتءُ انقلابءِ رهشون مدام إے مردمءَ «دلیریں مرزداراں» یادکنت.
واجهءَ پرمائینت: استانءِ مردم ماں راجمستریءِ گچینکاریءَ هں مزنیں بهرے زرت  اگاں چه ڈاکٹر حسن روحانیءَ باز پجاروک نه إتنت بلے چه آجاهے که آئیءِ فکرءُ هیالءُ سساإش پسند کت گڑا وتی گیشتریں ووٹ په روحانیءَ دات.
زاهدانءزِ جمعهءِ پیشنمازءَ په مردمءِ امیتءُ واهگاں چه واجه یونسی که راجمسترءِ خاصیں دستیارإنت  چمے شانک داتءُگوشتی: راجءُ مذهبانی واهگ چه ِ جنابعالیءَ همش إنت که برابری إجرا بیتءُ درستاں په یک چمے چارگ ببنت. مئے لیکه إشنت که تپاکی گوں جار جنگءَ دست نکپیت، بلکیں گوں برابریءُ عدالتءِ اجرا ءُ تبعیضانی دورکنگءَ مارا رسیت.
واجه ءَ إے پست(راجمسترءِ خاصیں دستیار ماں اقوامءُ دینی اقلیتانی امورءَ) چه دولتءِ مهمیں رکنانءُ چه تدبیرءُ امیتءِ مُهریں پادگاں جاه یارتءُ پرمائینتی: چه وهدے که تدبیرءُ امیتءِ دولت کارءِسرا آتکگ ، ملکءُ سر زمینءَ یک خاصیں آرامشے مان پوشتگ .
مولانا عبدالحمید چه لهتے سایتانی توهینءُ بدیں کرداراں گله کتءُ گوشتی: لهتے رسانکاں انگتءَ په بازیں مذهبءُ واجهاں توهین کنگءَ أنت ءُ آیانءَ إیرجن أنت . مارا امیت هست که إے وڑیں سایتءُ  رسانکاں گارکنگ ببنتءُ سرجمیں رسانکاں ماں راستیں راهءَ گام بجن أنت.
زاهدانءِ اهلسنتءِ جمعهءِ پیش نمازءَ چه حجت الإسلام علی یونسیءَ دزبندی کت که إے کله چه استانءِ مردماں چه علماءُ زانوگرانءُ اسپیت ریشانءُ کماشاںءُ راجءُ مذهبانی نیمگءَ په مزنیں ذمه دارءُ سرکاراں برسینیت که إے استانءِ مردم مرزدارأنتءُ هچ پاٹءُ حزبےءَ گوں هر تفکرءُ هیالے که ببنت اجازه ندینت که سرزمینءَ ناامن بکن أنت ، گڑا إشانی زحمتانی مقابلءَ تدبیرءُ امیتءِ دولت په إے استانءِ مردماں گیشتر دلگوش بکنت.
 واجهءَ ماں وتی گپانی آسرءَ دیم گور په استانءِ مردمان کتءُ گوشتی: تا زمانے که استانءِ مردم تپاکءُ همدل مبنت آبادیءُ دیمرویءِ رنگءَ نگندأنت گڑا بایدن که یکادگرءَ برداشت بکن إتءُ إشیءَ بزان إت که دنیاءِ پستءُ مقاماں هچ ارزشءُ بستارے نیست، بلکیں دوستیءُ صداقت  محبتءُ تپاکی ارزش دارأنتءُ په مدام ما ن أنت


چمشانک

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *