عراق کے مختلف شہروں میں عسکریت پسندوں کی جانب سے کار بم دھماکوں، راکٹ حملوں اور فائرنگ سے 11 پولیس اہلکار ہلاک جبکہ سیکیورٹی فورسز کی جوابی کاروائی کے نتیجے میں 3 عسکریت پسند بھی مارے گئے۔
غیر ملکی خبر رساں ایجنسی کے مطابق عراق کے مشرقی صوبے انبارکے علاقے حدیثا میں کاروں پر مشتمل عسکریت پسندوں کے قافلے نے پولیس چیک پوسٹ میں داخل ہونے سے قبل سیکیورٹی پر مامور اہلکاروں پر اندھا دھند فائرنگ کر دی جس کے نتیجے میں 6 پولیس اہلکار ہلاک ہو گئے، اس کے بعد عسکریت پسندوں نے پولیس چیک پوسٹ میں گھس کر 2کار بم دھماکے کئے جس کے نتیجے میں 3 مزید پولیس اہلکار ہلاک ہوگئے، عسکریت پسندوں کی جانب سے حدیثا میں فوج کے ہیڈ کوارٹر پر راکٹوں سے حملہ بھی کیا گیا تاہم کوئی جانی نقصان نہیں ہوا۔
عراق کے دار الحکومت بغداد کے شمال مشرقی علاقے حرمین میں عراقی فوج اور عسکریت پسندوں کے درمیان جھڑپ کے نتیجے میں 2 اہلکار ہلاک جبکہ 3 حملہ آور مارے گئے، جھڑپوں میں عراقی فوج کا ایک ہیلی کاپٹر بھی تباہ ہو گیا۔
ایکسپریس نیوز
آپ کی رائے