شیخ‌الاسلام مولانا عبدالحمید ماں زاهدان ءِ نمازجمعه ءِ دیوان ءَ (۱۷ مهر ۱۴۰۵/ 9 اکتوبر 2026) وتی گڑتی ءَ شه دل ءِ جهلانکی ءَ مالزانشتی سکی ءُ جنگ ءِ چڑکه ءِ بابت ءَ درشان کرت ءُ په گپ ءُ تران ءَ ماں ته ءِ ءُ میان‌استمانی پڑاں، مردمانی لۆٹانی پجائێنگ، پاهوانی بند کنگ ءُ میان‌رۆدرآت ءِ جێڑهانی عادلانه ئێں گیشءُگیوار ءَ کڈن کرت.
🔹 جنگ ءِ چڑکه ءُ مالزانشت ءِ گرانێں سکیانی بابت ءَ ڈاه
په سنی‌آنلاین ءِ سرهال ءَ مولانا عبدالحمید گۆں اشاره به نونێں ناگێگێں جاور ءَ ءُ نۆکێں جنگے ءِ بوگ ءِ احتمال ءَ، درشان کرت: اے رۆچاں لهتے بن‌گپانی هال ءُ جنگ ءِ چڑکه انت. دگه بن‌گپے که مردمانی سکاں پرێشان کرتگ، نه سگۆکێں مالزانشتی سکی انت. دل پدرد کنۆکێں گواچن هست انت که بازێں مردمے هشکێں نان په ورگ ءَ نه دار انت، په سکی آئرا پجائێن انت ءُ گۆں سیاهێں آپ ءُ چاه ءَ ور انت ءُ دگه چیزے ءِ گرگ ءِ وس اش نێست.
واجه ءَ گێش کرت: مئے مردماں سکێں رۆچاں گوازێن انت. گرانی ءُ زر ءِ بےارزشتی ءَ مردمانی زندمان ءَ سکیانی آماچ کرتگ ءُ بازاراں ءُ کٹءُکاراں بےگراک انت، چیا که مردمان گرگ وس نێست ءُ شه دگه نێمگ ءَ جنگ ءِ هال انت. ماں گوستگێں دوئێں جنگ ءَ ملک ءَ مزنێں تاوانے دیست ءُ ملک ءِ بنیاتی ڈیلءُڈولاں بێران بوت انت ءُ نۆکێں جنگ المی بێران کنۆک انت.
زاهدان ءِ آدێنگ ءِ امام ءَ گپءُتران ءَ گهترێں توجیل په ایران ءِ مردمانی رکێنگ ءَ زانت.
🔹 هژدری ئێں چیز جوهری بن‌گپ ءِ پدّری ءُ بندشانی هلاس کنگ انت
مولانا عبدالحمید گۆں اشاره به میان‌استمانی جێڑهاں ایران ءِ جوهری بن‌گپانی باروا، ٹکاٹک گوشت: مخالفانی گپ جوهری سلاهانی باروا انت ءُ ایران ءِ کارمسترانی گپانی رد ءَ آ چۆشێں سلاهانی ساچک ءِ پد ءَ نه انت ءُ دنیا هم همێش ءَ لۆٹ ایت. اگں چێراندری ءَ دگه چیزے نه انت، توجیل آسان انت، گڑا ما گۆں آواں گپ جن اێں ءُ آواں دلجم کن اێں که ما جوهری سلاهانی پد ءَ نه اێں. درێگے کارمستراں دنیا ءِ حکومتانی لۆٹانی رد ءَ کرد کرتێں ءُ جوهری بن‌گپ ءَ گیشءُگیوار اش کرتێں.
واجه ءَ کڈن کرت: ماں اے جاور ءَ بائد مسترێں اولویت ایران ءِ رنج آماچێں استمان ءِ سۆب، بندشانی زورگ ءُ بند بوتگێں مڈیانی یله کنگ بیت. اول بائد ایران ءِ استمان ءِ لۆٹانی پجائێنگ ءُ پد ءَ میان‌رۆدرآت ءِ مسائلانی گیشءُگیوار بیت.
🔹 مردم ولی‌نعمت انت؛ تانسرپسنداں یله‌سر مه کن ات
واجه ءَ درائێنت: ملک ءِ ته ءِ مشکلاں بائد گۆں ترانکاری، مردمانی گپانی گۆش دارگ ءُ آوانی حقێں لۆٹانی منّگ ءَ گیشءُگیوار به انت. اے سرڈگار ءِ مسترێں مڈی گران‌مهذب ءُ منگه ئێں مردم انت. الله پاک ءَ اے مڈیاں ملک ءَ داتگ ءُ همک چیز همے مردمانی انت. مردماں کارمسترانی ولی‌نعمت انت ءُ همے مردماں شما را جاگه ءُ مقام ءَ رسێنتگ ءُ به شما رأی‌اش داتگ، بائد گۆں اے مردماں نند ات ءُ آوانی وشنودی ءَ کٹ ات.
مولانا عبدالحمید تانسرپسندانی یله‌سر کنگ ءِ بابت ءَ ڈاه دات ءُ گوشت ئی: تانسرپسندانی گپاں گۆش مه دار ات تاں ملک ٹوهترێں جنجالانی دۆچار مه بیت. اگں ملک ءِ جوانێناں اختیار دیگ به انت تاں میانجیگری کن انت، گڑا مسائلاں په جوانی گیشءُگیوار به انت، بلے اگه جنگ بیت هژدری بنیاتی ڈیلءُڈۆلاں بێران به انت ءُ ملک که نون دهاں سال پشت کپتگ گێشتر پشت کپ ایت.
🔹 شرگداری شه بازێں پاهواں ءُ کڈن په گپءُتراں گۆں سیاسی بندیگاں
زاهدان ءِ آدێنگ ءِ امام ءَ درائێنت: بندیگ کنگ ءُ پاهو دیگ توجیل نه انت. بازێں پاهواں که مرۆچی ملک ءِ ته ءَ بوگ ءَ انت، ماں اسلام ءِ راجدپتر ءَ ءُ آسمانی دیناں بےدرور انت. گۆں دلسۆچی ءَ گوش اێں که اے پاهواں استمان ءَ شه حکومت ءَ دورَ کن انت. سلّی ءُ پاهو دشمنی ءُ کێنگ ءِ سوب بیت؛ سلّی، سلّی کار ایت. توجیل، مردمانی لۆٹانی منگ، جوانی، مهروانی ءُ گپءُتران انت. ماں اے ناگێگێں جاور ءَ بائد گۆں سیاسی بندیگاں گپءُتران کن ات ءُ گۆں مردماں به ات.
🔹 هلاکه ءِ امنیت ءِ پهازگ ءِ بابت ءَ کڈن
واجه ءَ گۆں اشاره به سیستانءُبلوچستان ءِ بن‌گپاں کڈن کرت: تیوگێں راج ءُ مذاهب ماں اے هلاکه ءَ گۆں وت سیاد انت ءُ راجدپتری رهوت دار انت. اے براسی بائد پهازگ بیت. راهاں، مێتگاں ءُ مچێں مردمانی امنیت سک هژدری انت ءُ بائد پهکاں اے باروا کۆشست کن انت.
🔹 هیرمند ءِ آپ‌بهر ءِ لۆٹگ شه اۆگانستان ءَ
مولانا عبدالحمید گۆں اشاره به کشار ءِ مۆسم ءِ بنگێجی ءَ ءُ سیستان ءِ پدماں‌پدێں ڈکالاں گوشت: شه اۆگانستان ءِ اسلامی سرکار ءَ همے اۆمێتداری هست که آپ‌بندانی آپاں یله کنت تاں سیستان ءُ نیمروز ءَ سر بیت. اے دوئێں ڈیهانی مردم سیاد انت. گۆں منتواری ءَ شه اوگانستان ءِ سرکار ءَ گوستگێں همکاریانی بابت ءَ که سوب بوت آپ نیمروز ءِ چاه‌نیمه ئاں سر بیت، ما را امێت هست گۆں الله ءِ رحمتانی اێر آتن ءَ آپ‌بنداں پر بوتگ ءُ ماں اے مۆسم ءَ آپ اے ڈیه ءِ نێمگ ءَ تچ ایت.
واجه ءَ گێش کرت: گۆں کشار ءِ مۆسم ءِ بنگێجی ءَ، سیستان ءُ نیمروز ءِ مردماں په آپ‌بندانی آپانی یله کنگ ءُ آپ ءِ تچگ ءِ ودار انت.
چمشانک