شیخالاسلام مولانا عبدالحمید، ماں زاهدان ءِ جمعه نمازے دیوان ءَ (15 بهمن 1400/ 4 فبروری 2022) گۆں اشاره به اسلامی انقلاب ءِ پیروزی ئے چلءُسےمی سالرۆچ ءَ به راج ءُ مذهبانی امێتداریاں شه انقلاب ءَ اشاره کرت ءُ گوشت ئِے که اهلسنتاں انگت «بودێنانی کار گرگ»، «مذهبی آزاتی» ءُ «نابرابریانی» بارو ءَ گڑتی دار انت.
په سنیآنلاین ءِ سرهال ءَ شیخالاسلام مولانا عبدالحمید درشان کرت: وهدے که شه قرنانی گوزگ ءَ پد اسلامی انقلاب ماں ایران ءَ پێروز بوت، امێتداری اێش ات که عدالت هنچۆ ملکے تها پراه بیت که ملکے تیوگێں راج ءُ مذهباں ءُ بےدیناں گۆں هر فکرے به وتی حق ءَ رس انت ءُ په جوانی ملکے تها زندگی کن انت.
واجه ءَ گێش کرت: انون که چلءُسے سال شه انقلاب ءِ عمر ءَ گوستگ، انگت بازێں گڑتی ئے هست. اهلسنتاں که هم گۆں نقلاب ءَ همراه بوتگ انت ءُ هم په یکّویی ءُ ملکی امنیت ءَ تأثیرش داشته ءُ دار انت، گۆں نابرابریاں آماچ انت ءُ امێت دار انت که اے نابرابریاں دور بے انت.
زاهدان ءِ جمعه ءِ امام ءَ درشان کرت: اے اهلسنتانی دێری ئێں لۆٹ انت که شه آوانی بودێناں ماں ملکے مزنێں پستاں کار گرگ بیت. هرچۆں که اهلسنتاں اێشرا منّ انت که ماں لس هزمتاں به ملکے وڑ وڑێں ڈیهاں کم یا باز، شیعه ءُ سنیانی نیام ءَ بازێں دگری ئے نبوتگ ءُ اے بارو ءَ شکایتے هم نبوتگ، اگاں شکایتے بوتگ شیعه و سنیاں هور شکایت کرتگ.
مولانا عبدالحمید سکّ سۆگه کرت: ارماں که شه اهلسنتانی بودێناں ماں ملکے مزنێں پستاں ءُ همےپێم اهلسنتانی استاناں کار گرگ نبوتگ و عدالت ماں سنی نندۆکێں ڈیهاں اجرا نه بوتگ ءُ اے بارو ءَ بازێں گڑتی ئے هست.
واجه ءَ گێش کرت: مئے امێتدرای اێش ات که ذمهواراں اهلسنتان ءَ انچۆ دلگۆش کن انت که شه آوانی حق ءَ گێشتر دیگ بےانت. اگاں کاراں مئے دست ءَ بوتێن انت، شیعه ئانی جا مئے سرے سر ءَ ات، آگاں آوان اقلیت بوتێں انت ما آوانَ شه آوانی حق ءَ گێشترَ دات. همے امێتداری ءَ هم شه ذمهواراں، اهلسنتانی بارو ءَ دار اێں. بازێنے شه اقلیتاں ماں لهتێں ملکاں مظلوم انت، بلێں ماں بازێں دێم ءَ شتگێں ملکاں اقلیتانی حقاں گێشتر کمارَ بےانت تاں گلگ مه کن انت.
🔹 «بودێنانی کار گرگ» و «مذهبی آزاتیانی دیگ» شه اهلسنتانی بُنداتی ئێں لۆٹان انت
مولانا عبدالحمید ٹکاٹک گوشت: اهلسنتاں شه ایرانے کهنێں جاهمنندان انت ءُ امێت دار انت که حق اش دیگ بےانت. ارمان که انقلابے اول ءَ لهتێں نانبشتگێں سیاست اهلسنتانی بارو ءَ جۆڑ اش کرتگ که انگت روان انت، پمێشا هر جهدے که اهلسنتانی حقانی بارو ءَ بیت، بروردے نه دار ایت.
واجه ءَ گوشت: هرچۆں که په اهلسنتان هزمتے بیگ انت، بلێں اهلسنتانی بنداتی ئێں لۆٹ اێش انت که آوانی مذهبی آزاتیان پوره دیگ بےانت ءُ شه بودێناں کار گرگ بیت که انگت اے بارو ءَ بازێں کارے نه بوتگ.
دارالعلوم زاهدان ءِ سرمستر ءَ سکّ سۆگه کرت: مئے لۆٹ اێش انت که اهلسنتانی مذهبی آزاتیاں پوره دیگ بےانت تاں هرجا توان انت په جوانی الله ءَ عبادت کن انت و ماں آ شهراں که اهلسنت هست انت مۆکل دیگ بےانت تاں مسیت جۆڑ کن انت.
مولانا عبدالحمید همےپێم په اهلسنتانی مذهبی وتواجهی ءَ سکّ سۆگه کرت ءُ گوشت ئِے: اے اهلسنتانی لۆٹ انت که آوانی مذهبی مسائلاں جندے دستےاش بیت ءُ حکومت بس چارۆک بیت.
🔹نیاز انت که سیاستاں دوارگ چارگ بےانت
زاهدان ءِ جمعه ءِ امام ءَ وتی هبرانی دێمتر ءَ درشان کرت: ما گۆں ترندی ءُ خشونت ءَ مخالف اێں. اےکه ترۆندێناں نه توانت ملک ءِ تها جاے ودی کن انت، تهنا په دولت ءُ حکومتے مخالفت ءَ نه ات، بلکه به خاطر سنی ءُ شیعه یانی مخالفت ءَ گۆں ترۆندی ءُ خشونت ءَ ات.
واجه ءَ گێش کرت: مئے راه اعتدال ءُ میانه ءُ براسی انت. مئے سۆگه به تیوگێں ملکاں اێش انت که راج ءُ مذهبانی حقان ءَ کمار کن انت ءُ همے سۆگه ءَ هم په وتی جندے ملکے ذمهواراں دار ایں.
زاهدان ءِ جمعه ءِ خطیب ءَ گوشت: ارمان که استماں چه شیعه ءُ چه سنی باز شه حکومت ءَ دلسیاه بوتگ انت، پرے واستا نیاز انت که سیاستانی بارو ءَ دوارگێں چارگے بیت. مئے سۆگه به تیوگێں ملکاں اێش انت که وتی بستار ءَ برز کن انت ءُ په مردمانی دلے دست آورتن ءَ جهد کن انت.
🔹نشه ئی موادانی سۆدا شریعت ءِ رد ءَ حرام انت
🔹 من گۆں بازێں پاهواں که ماں ملک ءَ دیگَ بےانت مخالف آں
شیخالاسلام مولانا عبدالحمید ماں دگه بهرے شه وتی هبراں ماں زاهدان ءِ جمعه ءِ دیوان ءَ نشه ئی موادانی باپاری ءَ بد زانت ءُ گوشت ئِے: راستی اێش انت که نشه ئی موادانی باپاری که لۆگمان ءَ سۆچ ایت ءُ جنێں ءُ مردێنان ءَ بێران کنت، حرام انت.
واجه ءَ گوشت: من گۆں بازێں پاهواں مخالف آں ءُ شه اے بابت ءَ بژن ور آں، بلێں وهدےکه قاضیاں مئے هبر ءَ گۆش نه کن انت، مردماں باید مئے هبر ءَ گۆش کن انت ءُ نباید نشه ئی موادانی سۆدائے پد ءَ برئو انت. بیت کنت لهتێں گوش انت که گڑا ما شه کجا نان بور اێں، بلێں باید زان انت که الله پاک چۆ آدگه انساناں که اے کار ءَ نه کن انت، شما را هم روزی دنت.
زاهدان ءِ جمعه ءِ امام ءَ درشان کرت: پچے مئے ورنائاں په نشه ئی موادانی خاطر ءَ پاهو دیگ بےانت؟! ماں لهتێں لۆگماناں وهدےکه یک براسے په نشه ئی موادانی سۆدا ءِ بارو ءَ پاهو دیگ بیت، آدگه براس هما باپاری ءَ بنگێج کنت. ماں لهتێں لۆگماناں سه براس په همے واستا پاهو دیگ بےانت. درێگے قاضیاں اے بارو ءَ فکر کرتێں که وهدے سه براسے بارو ءَ پاهو ءِ حکم دیگ بیت، دو نفرے بارو ءَ رحم اش کرتێں.
واجه ءَ گوشت: قیامتے رۆچ ءَ یا همے دنیا ءَ آ لۆگمان ءُ جنێں ءُ زهگان که په پاهو ءِ سبب ءَ بےکسترپاد ءُ جنۆزام بوتگ انت، کے آوانی جواب ءَ دنت؟ اے لۆگماناں هم ایرانی ءُ مئے هم ملکی انت. آیا دولت اے لۆگمانانی اگده ءَ زور ایت که زهگان اش درس بوان انت ءُ بےراه مه رو انت ءُ ماں آیۆک ءَ په ڈیه ءَ پاترپ مه بےانت؟
مولانا عبدالحمید وتی هبرانی گڈسر ءَ ٹکاٹک گوشت: نشه ئے موادانی سۆدا گۆں انسانی تب ءُ اسلامی کانوداں رد ءَ نه انت، پرے واستا انچێں سۆدا ئے کن ات که په چاگرد ءَ ضررے مه دار ایت.
چمشانک