شیخ‌الاسلام مولانا عبدالحمیدا اِے هپتگِ جمعه‌یِ گپاں (5 آذر 1395)، گوں اشاره په لهتے گسانی هراب کنگ مَں زاهدانِ کِرّ ؤ گوراں، اِے کاری ردیں کارے زانت ؤ چه منابع طبیعیِ کارمستراں لوٹت که کانود/قانونِ اجرا کنگا هور، په مردمانی هالا هں دلگوش کننت.
په سنی‌آنلاینِ هالکاریا زاهدانِ جمعه‌یِ پیشنمازا مَں یک بهرے چه وتی جمعه‌یِ گپاں گوشت: زیگیں روچا چنت نفر چه زاهدانِ کرّ ؤ گوراں منی گورا یهتنت ؤ گوشتش که مَے گس همے سارتیں روچا هراب کنگ بوتگنت. منابع طبیعیِ اِے کارا بِلّی که ملکِ کانودِ لحاظا عیبے مان نیست، بلے من چه وتی منابع طبیعی دوست ؤ آ واجهیں قاضی یے که اِے گسانی هراب کنگِ حکمی داتگ، جست کناں وهدے که مردمانی گس اِے سارتیں موسما هراب کنگ ببنت، اِے گڑا باید کجا برو اَنت؟
واجها گیش کت: منابع طبیعی همے ملت ئیگ اِنت، اِے مردم که گس اِش هراب کنگ بوتگنت، آ هں همے ملتِ بهرے اَنت، کم سه کم انسان اَنت. گڑا نباید آوانی گس، اِے سارتیں موسمِ تها هراب کنگ ببنت.
مولانا عبدالحمیدا دیما گوشت: اِے شرّیں/جوانیں کارے نهنت که کانودِ اجرا کنوک، بے اِشی که په مردمانی واستا گس ؤ جاهے آماده بکننت، بیاینت آیانی گسانا هراب کننت. الله تعالی ؤ ملکِ ٹوهیں مسئول ؤ ذمه‌دارانی رضایتِ اِشی تها نهنت که اِے سارتیں موسما مردمانی گس هراب کنگ ببنت. اِے اخلاقی لحاظا هں رد اِنت.
مروچی :جمعه, ۷ اردیبهشت , ۱۴۰۳
چمشانک