بزرگواریں استاد حضرت الشیخ عبدالصمد جمالزئیؒ ماں سرباز نسکنتءِ اطراف پیرء سنہ ۱۳۶۶ہجری مطابق ۱۹۴۶ء ماں دنیاء اہت، واجہؒ وتی خاندان علمی و جنزی کٹم و خاندانے اَت، پمشا ابتدائی تعلیم چہ وتی بزرگواریں برات واجہ مولانا شمس الدینؒ در برت،
رندا چو رواجء مطابقء وتی علمء دیما برگء خاطرا کراچیء شت، وادا وتی زمانگء مشہور و کوہنیں دینی ادارہ احرار الاسلامء واجگ بنا کرت، چیزے سالء رند کراچیء نامداریں ادارہ دارالعلوم کراچیء داخلہ زرت، چیا کہ آروچاں شہرء شرترین عالم درہا ہمودا جمع اتنت، و مفتی محمدشفیعؒ ء علمی کمال و کرامات تاں دورء سربوتت انت، استاد جمالزئیؒ ہم دارالعلومء طالبانی کاروانء ہور بوت۔
درس نظامیء توام و سرجم کنگء رند واجہء پی گیشتریں تعلیمء نیتء سرزمین حجازء سفر کرت و اودا ماں جامعہ اسلامیہ مدینہ المنورہء وانگ شروع کرت، و چہ جامعہ اسلامیہ کلیہ شرعیہء لیسانسء علمی رتبہ دست گپت۔
چہ مدینہ منورہء علمی سفرء توام کنگء رند واجہء تدریسی و استادی سفر شروع بوت کہ اے مبارکیں سفرء اول گام چہ مدرسہ احرار الاسلامء شروع کرتنت، بزان چہ ہما ادارہء کہ واجہء وت وتی سفرءِ آغاز و شروعات چہ ہمودا کرتت،۔
پدا پہ ہمے نیتے کہ مکران زمین چہ اے واجہء مبارکیں خدماتاں نیازمندتر انت، استاد محترمء وتی خدمات وتی وقتء غزالیؒ شیخ الاسلام مولانا رحمت اللہؒ ء پیش کرتنت، و اے پیما واجہ چہ کراچیء پنجگور منتقل بوت، مولانا رحمت اللہؒ ء مردم شناسیں نظرء اے گوہر قیمتیء را شردر چت، و اے پیما اے واجہء وتی ادارہء بند و بست، و انتظام استاد جمالزئیء دستء داتنت کہ کمے وہدء گوزگء رند، واجہ مولانا رحمت اللہؒ ء اداری ابید پنجگوری تمام مدرسہ و طالب و عالمانی زندگیء تہا انقلاب اہت، خاص مدرسہء طالبانی طبیعت و مزاج ہم بدل بوت، یک اعتمادے ہنچیں پیدا بوت کہ چہ استاد جمالزئیء ساری نیست ات۔
علاقہء طالب و عالم و دیندارانی تہا رابط و ہمبستگی ے پیدا بوت کہ اشی برکتء مدرسہانی رونق گیش بوت، ہمے دورانء پہ پنجگورء مرکز چتکانء مزنیں جامع مسجدء مناسہیں مردمےء حاجت محسوس بوت کہ پہ اے اہمیں جاہء چہ استاد عبدالصمد و مناسب تریں مردم دگہ کسے نیستت، پمشا واجہ استاد جمالزئیؒ مرکزی مسجدء امام و امام جمعہ نام گپت بوت، و تان ہفتدہ سال اے مسجدء منبر و محرابء رازینت دات، رند کراچی شہرء متصلین شہر حبء دگہ مزن شانیں دارہےء بندات ایر کرت، کہ اے ادارہء مروچی بلوچستانء دراجی و پراہیء ’’جامعہ علوم شرعیہ‘‘ء نامء زانگ بیت، ہمے پیما گوں ہمے ادارہء ہمراہیء دگہ شش جاگہ دینی تربیتی ادارہ قائم انت،۔
ہمے پیما استاد جمالزئیؒ ء سماجی خدماتانی یک بلاہیں شوق و واہگے ہستت، وتی پنجگورء جاہمنندیء دورانء مرکزی مسجدء نزیکء یک عالیشانیں کتابجاہےء انتظام کرت کہ آئی تہا درچتگیں کتاب چہ درودور آورت و ایر کرت کہ کسے کہ مطالعہء واہگ دارات آیانء شریں علمی دستاویز فراہم ات، ہمے پیما بلوچستانء ہنچیں جاہان سک ضرورت ات، ۲۸ مساجد و ۷۸ چاتء انتظام کنائینت، گوں شیخ الاسلام مولانا رحمت اللہؒ ہمراہیء مولانا قاضی عبدالصمد سربازی و مولانا خیرمحمدندویء بلوچیء ترجمہ کرتگیں قران کریمء تصحیح و چاپ و شنگء بند و بست کرت، ہمے پیما واجہء دگہ بازین مزن و کسانیں مضامین و کتاب نبشتہ کرت۔
واجہ استاد جمالزئیؒ ء استادانی تہا بلوچانی نامیئین خطیب مولانا محمدعمر و آئی بزرگواریں بات مولانا محمدعلیء علاوہ مفتی اعظم مفتی محمدشفیعؒ مولانا قاری رعایت اللہؒ شیخ الحدیث حضرت مولانا سحبان محمودؒ حضرت مولانا سلیم اللہ خان و مفتی رشیداحمدؒ ہورانت۔
استاد محترم شیخ جمالزئیء خدمتء علم و تربیت حاصل کنوکیں طالبانی حساب سک بازانت کہ چی آیانی تہا اے لہتے نام ہورنت، حضرت مولانا شیخ غلام اکبر صاحب، مولانا ولی اللہ محمدحسنی، مولانا قمرالدین جمالزئی، مولانا شیخ عبدالغفار ربانی و عبدالسلام عارف۔
اخر کہ کل من علیہا فان، علم و دانشء اے تپناکیں استار شوال المکرم ۱۴۲۱ہجری مطابق ۷ جنوری ۲۰۰۱ء فجر نمازء وہدء پہ وتا دائمی منزلء سفر کرت، رحمہ اللہ رحمۃ واسعۃ
سرچمگ: راستیں راہ
چمشانک