شیخالاسلام مولانا عبدالحمید ماں زاهدان ءِ نمازجمعه ءِ دیوان ءَ (26 دی 1404/ 16 جنوری 2026) گۆں اشاره به ملک ءِ ته ءِ بوتگێں زهرشانیاں «هزاراں زهرشانی کنۆکے کشگ ءَ» سک اێر جت ءُ وتی همدردی ءَ گۆں آوانی لۆگماناں درشان کرت ءُ گوشت ئی: ما اے هلاکه ءِ مردماں ءُ ایران ءِ پهکێں مردماں گۆں دردمندێں کهولاں همدرد اێں ءُ شه اے بابت ءَ سوگیگ اێں.
🔷ایران ءِ استمان ءَ په «سکیانی بۆجگ» ءُ «نابرابرانی دور کنگ» ءِ امێت ءَ به «جمهوری اسلامی» ءَ رأی دات
په سنیآنلاین ءِ سرهال ءَ مولانا عبدالحمید درشان کرت: ایران ءِ استمان ءَ ماں سال 1357 ءَ گۆں اے امێت ءَ به «جمهوری اسلامی» ءَ رأی دات ءُ آیرا وتی حکومتی نظام اش گچێن کرت که آوانی دین ءُ دنیا ءِ مشکلاں بۆجگ به انت ءُ سیاستاں وڑے ردءُبند کنگ به انت که دنیا ءُ آخرت اش آباد بیت. مردماں آ سالاں واجه رسولالله صلیاللهعلیهوسلم ءُ صحابه ءُ اهلبیتانی دوران ءِ یات ءَ کپت انت ءُ امێتدار بوت انت که سجێں نابرابریاں دور کنگ به انت ءُ گوستگێں سکیءُسوریاں هم بۆجگ به انت.
واجه ءَ گێش کرت: ارمان که اے سالانی دراجی ءَ بازێں مسائلانی ته ءَ هرکس ءَ وتی دل ءِ رد ءَ کرد کرت که اے سکیاں پێش آت انت. مدتےانت که مردماں سیاسی ءُ مالزانشتی ءُ دگه مسائلانی باره ءَ اێراد دار انت ءُ گپَ جن انت. ایران ءِ مردماں 1398 ءُ 1401 ءِ سالاں هم وتی لۆٹاں جار جت ات.
🔷ایران ءِ مردماں شه ته ءِ ءُ ڈنی سیاستاں ءُ مالزانشتی ءُ رۆزیگی جاوراں ناوشنود انت
زاهدان ءِ آدێنگ ءِ امام ءَ گوشت: ایران ءِ استمان که شه دنیا ءِ باز جوانێں ءُ بےجۆڑهێں استمانان انت، اے سالاں اۆپار ئی کرت، بلے مدتے که مردمانی گلگ ءُ شکایت شه ناداری ءُ مالزانشتی مشکلاں گێش بوتگ. دێرێں بندشاں ءُ مالی فساد ءُ بدکارمرزیاں ملک ءِ مالزانشت ءَ گرانێں تاوان ءِ آماچ کرتگ ءُ بژن انت که اے درگت ءَ په بندشانی دور کنگ ءَ توجیلے درگێجگ نه بوت، پمێشا مردماں ماں زندگی ءَ گۆں گرانێں سکیاں آماچ بوت انت. نون ایران ءِ مردماں شه ته ءِ ءُ ڈن ءِ سیاستاں ءُ مالزانشتی ءُ رۆزیگی جاور ءَ ناوشنود انت.
🔷کارمستراں بائد انت گۆں مردماں گپءُتران کرتێں
مولانا عبدالحمید درائێنت: گهترێں سیاست همێش ات که کارمستراں سیاسی ءُ مالزانشتی مسائلانی بارهءَ گۆں مردماں گپ کرتێں. باز براں گوشگ بوتگ ءُ نون هم کارزانتاں اے بنگپ ءَ منّتگ که مالزانشت گۆں سیاست ءَ همگرنچ انت ءُ اگں سیاستاں اصلاح ءُ بدل کنگ به انت، ملک ءِ مالزانشتی مشکلاں وتپهوت بےمالزانت ءُ کارزانتانی کمک ءَ بۆجگَ به انت.
واجه ءَ گێش کرت: ما مدام گوشتگ که شما ته ءِ ءُ ڈن ءِ سیاستاں بدل کن ات. ما گوشت که کمتهکم ته ءِ سیاستاں اصلاح کن ات تاں استمان گۆں شما همراه بیت. اے پهکێن گپاں شه دلاسۆزی ءُ خیرخواهی ءَ گوشگ بوت انت. من باز براں گوشتگ ءُ هم مردماں ءُ هم کارمستراں زان انت که ما مقام ءُ جاگه ءِ لۆٹۆک نه اێں.
حاکم نه بائد «گرمسر» بیت بلکه مردمانی دێم ءَ هاکسار بیت ءُ مردمانی هبراں گۆش دار ایت
مولانا عبدالحمید کڈن کرت: الله ءِ حکم انت که حاکم مردمانی دێم ءَ هاکساری کنت. الله پاک واجه رسولالله صلیاللهعلیهوسلم ءَ گوش ایت: «واخفض جناحک لمن اتبعک من المومنین» الله پاک ماں اے پاگپ ءَ واجه رسولالله صلیاللهعلیهوسلم ءَ که حاکمے، امر کنت که گۆں مردماں ببے ءُ آوانی هبراں گۆش دار.
🔷مهتر حسن ءَ گوشت نه لۆٹ آں په حکومت ءِ ساتگ ءَ هۆنرێچی کن آں
زاهدان ءِ آدێنگ ءِ امام ءَ ٹکاٹک گوشت: وهدےکه ما وت ءَ گۆں مهتر علی ءَ لچێن اێں، گڑا اێشرا هم دلگۆش کن اێں که آ واجه ءَ گوشتگ اگاں عدالت ءِ اێردارگ مه بوتێں اے حکومت ءَ په من ذره ئے ارزشتَ نه داشت. مهتر علی زر ءُ مال ءِ پد ءَ نه شت، بلکه گۆں مردمان ات، مهتر حسن هم گۆں مهتر معاویه ءَ سهل کرت ءُ گوشت ئی نه لۆٹ آں که مسلمانان کشگ به انت، نه لۆٹ آں په حکومت ءِ ساتگ ءَ هۆنرێچی کن آں.
🔷ماں بوتگێں جنز ءَ گهترێں کار همێش ات که مردمانی توار اشکنگ بوتێں
شیخالاسلام ءَ وتی هبرانی دێمتر ءَ گۆں اشاره به ملک ءِ زهرشانیاں گوشت: اے ملک ءِ بنی واهند ءُ مئے ءُ کارمسترانی ولینعمت مردم انت ءُ مچێں مردماں سیده یا ناسیده گۆں همے مردمانی گچێن ءُ رأی ءَ کارگرگ بوتگ انت، پمێشا بائد انت مردمانی هبر اشکنگ ءُ وشنودی اش کٹگ بیت، بلے بژن انت که هچبر گپ اش گۆش دارگ نه بوتگ.
واجه ءَ گێش کرت: ماں بوتگێں زهرشانیاں گهترێں کار همێش ات که مردمانی هبر اشکنگ بوتێں، بائد په بدلی ءَ کوشست بوتێں که مردمانی ٹوهترێں لۆٹ انت، مردمانی لۆٹانی منگ الله ءِ وشنودی ءِ سوب انت. ما پهکاں ایران ءِ نندۆک اێں ءُ بائد گۆں وت همدردی ءُ دلاسۆچی کن اێں.
زاهدان ءِ آدێنگ ءِ امام ءَ گوشت: ما پهکان ایران ءِ نندۆک اێں، ما پهکانی تاوان یکے انت، بائد په همدگر ءَ رحم کن اێں، آوان که ملک ءِ سرۆک انت بائد دێم ءَ بیا انت ءُ مردمانی هبراں بشکن انت، اگاں مردمانی وشنودی کٹگ بیت، گڑا کسے نه توانت هبرے دنت.
🔷ماں بوتگێں زهرشانیاں هزاراں مردم کشگ بوت انت؛ ما وتی همدردی ءَ گۆں آوانی کهولاں جار جن اێں
مولانا عبدالحمید درائێنت: ماں اے زهرشانیاں هاسکار گوستگێں جمعه ءُ شمبی ءِ شپاں هزاراں نپر شه زهرشانی کنۆکاں کشگ بوتگ انت. ما اے کشتاراں سک اێر جن اێں ءُ اے گرانێں تاوان ءَ آوانی کهولاں تسلیت گوش اێں ءُ وتی همدردی ءَ گۆں آواں درشان کن اێں ءُ په ٹپیاں شه الله پاک ءَ زوتێں جاندراهی ءِ لۆٹۆک اێں.
واجه ءَ گوشت: ایران ءِ مردماں چۆ یک گس ءِ مردماں انت ءُ مچێں مردماں ماں اے پێشامد ءَ سۆگیگ انت. ما ءُ اے هلاکه ءُ ملک ءِ مردماں وتی همدردی ءَ گۆں آوان که ماں تهران ءُ ملک ءِ آدگه هلاکهاں کشگ بوتگ انت، جار جن اێں.
سیاسی بندیگاں ءُ آوانَ که ماں زهرشانیاں دزگر بوتگ انت، آزات اش کن انت
زاهدان ءِ آدێنگ ءِ امام همےرنگ دزگر بوتگێں مردمانی آزاتی ءِ لۆٹۆک بوت ءُ گوشت ئی: منی سۆگه همێش انت که آوان که ماں بوتگێں جنز ءَ دزگر کنگ بوتگ انت، آجو به انت تاں اے آزاتی آ کهولانی دلتسلایی سوب بیت که مردم اش ماں اے زهرشانیاں کشگ بوتگ انت ءُ همے ایران ءِ پهکێں استمان ءِ دلتسلایی ءِ سوب بیت. پرامَ کن آں که سیاسی بندیگاں هم آجو کن ات ءُ گپان اش گۆش دار ات.
🔷زۆرێں استه گرگ گۆں دیانت ءُ راستی ءَ چپ انت/ درۆگێں سرهال کار ءَ بدترَ کن انت
مولانا عبدالحمید زۆرێں استه گرگ ءَ هم سک اێر جت ءُ گوشت ئی: زۆرێں استه گرگ ءُ مردمانی لاچار کنگ که وتی گپانی چێر ءَ دزهت کن انت که هچ آ کاران اش نه کرتگ، گۆں دیانت ءُ راستی ءَ چپ انت ءُ اسلام اے داب ءَ نه منّ ایت.
واجه ءَ درّائێنت: ارمان که مهسا ءِ زهرشانیانی درگت ءَ ءُ پد شه زاهدان ءِ گرانێں ءُ تهلێں هۆنێں جمعه ءِ پێشامد ءَ لهتے گوشت که سلاهبندێں پاٹی ءُ وتمستری لۆٹاں مردماں کشتگ، بلے پد ءَ مردمانی اۆپار ءِ سوب ءَ، گواچن پدر بوت که ماں آ پێشامد ءَ هچ سلاهبندێں پاٹی ءُ وتمستری لۆٹے هوار نه بوتگ. پمێشا اگں ماں سرهالاں درۆگ بیت ءُ گواچناں گوشگ مه به انت، اے چیز کار ءَ بدتر ءُ دشمنیاں گێشتر کنت.
🔷پرایمنێں زهرشانیانی برجم دارگ مردمانی حق انت
مولانا عبدالحمید دوارگ پرایمنێں زهرشانیانی باره ءَ کڈن کرت ءُ گوشت ئی: من مدام گوشتگ که پرایمنێں زهرشانی مردمانی حق انت، البت نه بائد ماں اے زهرشانیاں ترۆندی بیت که دکاناں بن دےانت یا شیشگاں پرۆش انت یا کسے را لٹءُشاپ کن انت، بلکه وتی هبراں گوش انت ءُ وتی لۆٹاں درشان کن انت. آوانی گپ ءُ لۆٹاں هم بائد اشکنگ به انت.
چمشانک