شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (6 شهریور 1405/ 27 اگست 2026) اهلسنتانی مقدساتانی بےشرپی کنگ ءَ سک اێر جت ءُ گوشت ئی: کارمستراں بائد تانسرپسندانی دێم ءَ گر انت که دێمءُدرا مذاهبانی مقدساتانی بےشرپی ءَ کن انت.
زاهدان ءِ آدێنگ ءِ امام ءَ ماں اے مراگش ءَ وتی پرێشانی ءَ بازێں گراننهادیانی باروا درشان کرت ءُ مردمانی وازمندیانی رندگیری ءَ شه حکومت ءِ هژدری اگدهاں زانت ءُ کڈن ئی کرت: تانسرپسندانی دیدانکاں نادلگۆش کن ات که ملک ءَ تباه ءُ استمان ءَ بدبخت اش کرتگ، مردمانی جاور ءَ چار ات ءُ سهل ءِ پد ءَ به ات.
🔹پهکێں مسلماناں بائد صحابه ءُ اهلبیتانی حرمت ءَ سات انت/ کارمستراں تانسرپسندانی دێم ءَ گر انت که دێمءُدرا مذاهبانی مقدساتانی بدزبانی ءَ کن انت
په سنیآنلاین ءِ سرهال ءَ مولانا عبدالحمید هوار گۆں یک بهرے شه واجه رسول الله صلیاللهعلیهوسلم ءِ صحابئانی ساڑایگانی بیان ءَ، هاسکار دومی خلیفه مهتر عمربن خطاب رضیالله عنه ءِ ساڑایگاں، لس مسلماناں په صحابه ءُ اهلبیتانی حرمتانی دارگ ءَ سۆگه کرت ءُ گوشت ئی: صحابه ءُ اهلبیتاں شه مسلمانانی مقدساتان انت. مچێن مسلمانان بائد آوانی حرمت ءَ سات انت. اگں مچێن صحابه ئانی حرمت ءَ نه دار ات، کمتهکم آوانی بدزبانی ءَ مه کن ات.
واجه ءَ ٹکاٹک گوشت: مئے لۆٹ شه کارمستراں همێش انت که تانسرپسندانی دێم ءَ گر انت که ماں وڑوڑێں مراگشاں صحابه ئانی بدگوشی ءَ کن انت. نه بائد کسے را مۆکل دےانت که دێمءُدرا صحابه ءُ گێشتری مسلمانانی مقدساتانی بدگوشی ءَ کن انت.
زاهدان ءِ آدێنگ ءِ امام ءَ گێش کرت: بدزبانی ماں هچ دین ءُ مذهبے روا نه انت. ما نامسلمان ءُ دگه استمانانی بدگوشی ءَ هم روا نه زان اێں. اگاں کسے هبرے دار ایت گۆں منانک ءَ گوش ایت نه گۆں بدگوشی ءُ جهلجنی ءَ.
🔹تانسرپسنداں ملک ءَ بێران ءُ استمان ءَ بدبخت کرتگ
مولانا عبدالحمید درائێنت: همے تانسرپسنداں که مرۆچی مذاهبانی مقدساتانی بدزبانی ءَ کن انت، ماں سیاسی پڑاں ملک ءَ گرانێں تاوان اش رسێنتگ. مزنێں بهرے شه ملک ءُ استمان ءِ بدبختیانی سوب همے تانسرپسند انت.
مولانا عبدالحمید همےرنگ گۆں اشاره به همپتی ءِ هپتگ ءَ گوشت: همپتی باز جوان انت ءُ پهکاں آیرا منّ انت، ما شه همپتی ءَ پلهمرزی کن اێں بلے اوگامی همپتی ءَ نه من اێں، مئے باور ءَ همپتی بائد ماں کردار ءَ بیت.
واجه ءَ گێش کرت: دێر انت که مچێں اهلسنتانی لۆٹ همے بوتگ که ماں تهران ءَ مسیت داشته به انت، تاں تهران ءِ اهلسنتان که دو، سه میلیون انت همۆدا نماز بوان انت. مئے باور ءَ مسیت ءِ بندگ بائد هرجا آزات بیت.
🔹نماز، مسیت ءُ اهلسنتانی هێلکاری «امنیتی» مه بیت؛ ادیان ءُ مذاهبانی پدگیراں بائد ملک ءِ ته ءَ آزات به انت
مولانا عبدالحمید کڈن کرت: یکے شه اهلسنتانی کانودی ءُ حقێں لۆٹاں همێش انت که آوانی نماز، مسیت ءُ هێلکاری امنیتی مه بیت. ماں بنیادی کانود ءَ مذاهبانی دینی آزاتی ءُ هێلکاری ٹک ءَ بیان بوتگ، بلے بژن انت که کانود ءِ رد ءَ کرد نه بوتگ، وهدےکه اگاں کانود ءِ رد ءَ کرد بوتێں اے چیز ملک ءُ استمان ءِ سۆب ءَ ات.
واجه ءَ ادیانانی آزاتی ءِ باروا هم کڈن کرت ءُ گوشت ئی: مسلماناں هوار نامسلماناں هم بائد وتی دین ءِ ته ءَ آزات به انت، همارنگ که ماں بنیادی کانود ءَ ٹکاٹک بیان بوتگ، هرچۆں که بنیادی کانود ءِ باروا اێراد هست ءُ بائد آئی ته ءَ بدلی بێت، بلے اگں همائی رد ءَ هم کرد بوتێں بازێں مشکلے جۆڑ بوت انت.
🔹گرانیانی سوب ءَ مردماں سک ءَ جنجال انت؛ هچ پاٹی ئے زندمان ءِ هژدری وازمندیانی پجائێنگ ءِ وس ءَ نه دار ایت
زاهدان ءِ آدێنگ ءِ امام ءَ درائێنت: گرانیانی زۆر رۆچپهرۆچ کهولانی زندمان ءِ سر ءَ گێش بیت که هچ پاٹی ئے شه زانتکار ءُ کارنده ءُ پوریاگر ءُ کاسب ءُ… وتی جن ءُ زهگانی هژدری وازمندیانی پجائێنگ ءِ وس ءَ نه دار ایت. کارنشت ءُ چاگرد ءِ وڑوڑێں پاٹیاں پرێشان انت ءُ هررۆچ زهرشانی کن انت.
واجه ءَ گوشت: ناداری ءُ بےکاری بازێنے شه گناه ءُ شیتانیانی سوب انت. مرۆچی یکے شه دزی، هلوچگری ءُ شیتانیانی سوباں ناداری ءُ گشنگی انت.
🔹پێش شه اێشی که مردمانی توار چست بیت، کارمستراں په دێمداری شه هلوچگری ءَ المیئێں گامگێجے زور انت/ راج ءُ ٹکاں په دێمداری شه هلوچگری ءُ باجلۆٹی ءَ چست به انت
زاهدان ءِ آدێنگ ءِ امام ءَ په دێمداری شه هلوچگری ءَ کڈن کرت ءُ گوشت ئی: هوار گۆں کۆشستے که بوگ ءَ انت، بژن انت که هلوچگری انگت هست انت. کاسب ءُ بازاریاں وتی کٹءُکارانی بابت ءَ پرێشان انت که مردمانَ رۆچ ءَ دێم ءُ درا هلوچ کن انت، پهازۆکی واکانی سۆج نه انت ءُ شهر ءِ شتءُآت ءِ راهاں وێل انت.
واجه ءَ گێش کرت: کارمستراں بائد المیئێں گامگێجے زور انت پێش شه اێشی که مردمانی توار چست بیت، همےرنگ مئے سۆگه په اسپےریش ءُ کماشاں اێش انت که هلوچگری ءُ باجلۆٹیانی بگیر ءَ چست به انت تاں شهر ءِ امنیت برگرد ایت.
🔹په حکومت ءَ هچ کردے مهمتر شه مردمانی وازمندیانی رندگیری ءَ نه انت/ مۆکل مه دےات تانسرپسنداں ملک ءَ بێرانی ءِ نێمگ ءَ تێلانک دےانت؛ کارمستراں سهل کن انت ءُ بندشاں هلاس کن انت
مولانا عبدالحمید ٹکاٹک گوشت: کامستراں مردمانی رۆزیگی جاور ءَ پهجوانی دلگۆش کن انت. من په حکومت ءَ هچ کردے را مهمتر شه مردمانی مالزانشتی ءُ رۆزیگی جاور ءِ زندگیری ءَ نه زان آں. پێسر ءَ هم باز بر ءَ کڈن بوتگ که په مردم ءُ ملک ءِ جاور ءِ گهبودی ءَ بائد سهل کن ات تاں بندشاں زورگ به انت.
واجه ءَ درشان کرت: مۆکل مهدےات تانسرپسنداں ملک ءُ استمان ءَ بێرانی ءِ نێمگ ءَ تێلانک دےانت. منی سۆگه په کارمستراں اێش انت که بس وتی اێشکءُآشک ءَ مه چار انت، بلکه چاگرد ءِ ته ءَ بیا انت ءُ وڑوڑێں پاٹیاں چۆ زانشتجاهی، زانتکار ءُ مزنسسائانی دیدانکاں گۆش دار انت ءُ گۆں آوان شور کن انت، هرچیز ءَ که گێشتری مردم آئی لۆٹۆک انت، آیرا منّ انت.
واجه ءَ وتی هبرانی گڈسر ءَ گۆں اشاره به مزنشهدربرجاه ءِ زانتلۆٹ ءُ استاذانی درکنگ ءَ گوشت: زانتلۆٹ ءُ استاذانی درکنگ پرێشا که زهرشانی اش کرتگ، په ملک ءَ مزنێں تاوانے دار ایت ءُ سوب بیت ملک زانتی شۆهاز ءُ پٹءُپۆل ءِ پڑا پشت کپ ایت. واجه ءَ کڈن کرت که زانتلۆٹ ءُ استاذان برگردێن ات ءُ آوانی لۆٹاں دلگۆش ءُ هبران اش گۆش دار ات.
چمشانک