شیخالاسلام مولانا عبدالحمید ماں زاهدان ءِ نمازجمعه ءِ دیوان ءَ (9 مرداد 1405/ 31 جولای 2026)، وتی گڑتی ءَ شه اسلامی ملکانی جێڑهاں ماں میانرۆدرآت ءَ ءُ یکے دومی ءِ چپ ءَ اۆشتگ ءَ درشان کرت ءُ اێشی بابت ءَ ڈاه دات که مغربی ءُ مشرقی زۆرآوانی کۆشست همێش انت که میانرۆدرات ءَ جنگ ءِ میدان جۆڑ کن انت. واجه ءَ همےرنگ شه مچێں اسلامی ملکاں ءُ ایران ءَ لۆٹ ات که په جێڑهانی گیشءُگیوار ءُ عادلانه ئێں سهل ءَ جهد کن انت.
🔹میانرۆدرآت ءِ اسلامی ملکانی میان ءِ جنگ بدترین جنگَ بیت
په سنیآنلاین ءِ سرهال ءَ مولانا عبدالحمید درشان کرت: اے رۆچاں میانرۆدرآت ءِ جاور سک نگێگ انت. میانرۆدرآت ءِ اسلامی ملکاں که گێش شه سیاسی سۆباں، ماں بازێں تهرتهرێں سۆباں هوار انت، یکے دۆمی ءِ چپ ءَ اۆشتاتگ انت تاں یکے آدگر ءِ سۆب ءُ بنیاتی ڈیلءُڈۆلاں نشانگ کن انت.
واجه ءَ گێش کرت: اگه میانرۆدرآت ءِ اسلامی ملکانی میانجین ءَ جنگ بیت، گڑا اے بدترین جنگ بیت ءُ آئی چپدێمێں پدگرد تاں دێر ءَ مان ایت ءُ اے جێڑه ماں راجدپتر ءَ نبشتگ بیت ءُ آیۆکاں آئی باروا گیشواری کن انت. پمێشا اسلامی ملکانی کارمستراں ءُ پهکێں سرکاراں که ماں میانرۆدرآت ءَ سۆبانی واهند انت اے باروا سسا کن انت ءُ په عادلانه ئێں توجیلے کۆشست کن انت.
🔹دنیا ءِ زۆآوراں لۆٹ انت که میانرۆدرآت ءَ جنگ ءِ ءُ بێر ءِ میدانے بدل کن انت
زاهدان ءِ آدێنگ ءِ امام ءَ گێش کرت: دنیا ءِ زۆرآوراں ءُ ٹوهێں ملکاں ماں رۆدرآت ءُ رۆاێرشت ءِ نێمگ ءَ که گوں وت چپ انت ءُ ماں سیاسی پڑاں رقابت کن نت، لۆٹ انت میانرۆدرات ءَ جنگ ءِ ءُ بێر ءِ میدانے بدل کن انت.
واجه ءَ ٹکاٹک گوشت: ماں میانرۆدرآت ءِ اسلامی ملکانی یکے دومی ءِ چپ ءَ اۆشتگ ءَ ھچ وڑێں سۆب ءُ سیتے په اسلام ءَ ءُ ڈیه ءَ ءُ مردمانی دنیا ءَ نێست. پمێشا اے جێڑهاں بائد گۆں عادلانه ئێں سهل ءَ هلاس کنگ به انت.
🔹جمهوری اسلامی ءِ کارمستراں تانسرپسندانی دێم ءَ گر انت ءُ په جێڑهانی گیشءُگیواری ءَ کمک کن انت
مولانا عبدالحمید وتی هبرانی دێمتر ءَ جمهوری اسلامی ءِ کارمستراں سۆگه کرت که: ایران ءِ مردماں گۆں مچێں استماناں هاسکار همسایگاں هوارێں سۆب ءُ سیت دار انت، پمێشا امێت انت که په جێڑهانی گیشءُگیوار ءَ تانسرپسندانی دێم ءَ گر انت.
🔹هلوچگری ءِ بابت ءَ کارچ به هڈ ءَ رستگ؛ مردماں باپشت ءِ رپکءُمندرانی باروا مشکوک انت
مولانا عبدالحمید ماں دگه بهرے شه وتی هبراں گۆں شرگداری شه کارمسترانی کۆتاهی ءَ وتی اگدهانی باروا په دێم په دێمی گۆں هلوچ گری ءَ گوشت: بژن انت که شهر ءِ امنیت گار بوتگ ءُ پهازۆکی کارمستراں مردمانَ په آوانی جند ءَ یله کرتگ ءُ وتی اگده ءِ رد ءَ کرد اش نه کرتگ، وهدےکه مردمانی وڑوڑێں پهناتانی امنیت ءِ پجائێنگ شه حکومت ءُ سرکارانی بنی اگدهاں انت.
واجه ءَ گێش کرت: پراستی بهمانگ اێں که یک رۆچ ءُ دۆ رۆچ ءِ ته ءَ چنکه مردم ءَ هلوچ کن انت ءُ باج لۆٹ انت. اے کے انت که مردماں هلوچ کن انت؟ پچے بائد ڈیه اےرنگ ویل بیت؟ پلیس ءُ پهازۆکی واکاں کجا انت؟ مردم اے هلوچگریانی بابت ءَ مشکوک انت که باپشت ءَ رپکءُ مندر هست.
🔹گۆں آ آسراتیاں که امنیتی ءُ پهازۆکی واکاں دار انت، هلوچگرانی پجارگ ءُ دزگر کنگ گرانێں کارے نه انت
زاهدان ءِ آدێنگ ءِ امام ءَ کڈن کرت: پراستی کارچ به هڈ ءَ رستگ. اگه پێسر ءَ هزگارێں مردماں هلوچ اش کرتگ، بلے نون هما مردمانَ که انچائێں کارانی واهند انت، هم هلوچَ کن انت. هشتادسالگێں پیرمردے را هلوچ اش کرتگ که چنکه ماه انت آئی زهگاں شه آئی جاور ءَ سهی نه انت ءُ سک پرێشان انت. پراستی کے بائد اے باروا پسۆ دنت؟!
واجه ءَ ٹکاٹک گوشت: پهکێں مردمانی اگده انت، هاسکار هما کارمستر ءُ واکاں که په مردمانی امنیت ءَ شه بیتالمال ءَ ماجب گر انت. بائد آوان وتی اگده ءِ رد ءَ کرد کن انت. اگه په ستک لۆٹ انت، گۆں آ آسراتیاں که امنیتی کارمستراں ءُ پهازۆکی واکانی دست ءَ انت، هلوچگرانی پجارگ ءُ دزگر کنگ گرانێں کارے نه انت.
🔹اگاں شه کارمسترانی وس ءَ کارے نه بیت، مۆکل دےانت تاں مردماں وت په دێمداری شه هلوچگیری ءَ گامگێج کن انت
مولانا عبدالحمید ٹکاٹک گوشت: اگاں شه کارمسترانی وس ءَ کارے نه بیت، مۆکل دےانت تاں مردماں وت په دێمداری شه هلوچگیری ءَ گامگێج کن انت ءُ وتی امنیت ءَ پجائێن انت. 1357 ءِ انقلاب ءِ اول ءَ که جاور نگێگ ات، همے مردماں وتی دمگ ءُ شهرانی امنیت ءَ پجائێن انت. نون هم جاور هما جاگه ءَ سر بوتگ که مۆکل دے انت تاں مردم وت وتی دمگ ءُ شهرانی امنیت ءَ پجائێن انت، پچےکه مردمانَ اے وس ءُ تۆک هست. البت گۆں لٹ ءُ مشت ءُ لگت ءَ نه بیت گۆں هلوچگراں دێم په دێم به انت، بائد جوازدارێں توپک دیگ به انت تا هلوچگر ءُ دزانی دێم ءَ شه وت دێمپانی کن انت.
چمشانک