شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (2 آبان 1404/ 24 اکتبر 2025) بنیادی کانود ءُ همےرنگ جوانێں رهبندانی نه بوگ ءَ ملک ءِ ملکاری ءُ مالزانشتی بنبستانی بنی سوب زانت ءُ ٹکاٹک گوشت: تاں وهدےکه بنیادی کانود ءُ اے کارمستری ءِ درۆشم ءِ ته ءَ بدلی مه یێت، کۆشستاں ءُ مردمانی گلگاں بےپۆک انت ءُ ملک شه اے بنبستاں نه رک ایت.
🔹ملک ءُ استان ءِ ته ءَ آپبنداں گۆں مارشتاں ءُ بےکارزانتی ءَ جۆڑ بوتگ انت
په سنیآنلاین ءِ سرهال ءَ مولانا عبدالحمید درشان کرت: مرۆچی ملک گۆں وڑوڑێں بنبستاں هاسکار مالزانشت ءِ پڑا دێم په دێم انت. شه بندساچی ءَ بگر داں کارجاه ءُ دگه مالزانشتی رهبنداں گۆں بنبست ءَ دێم په دێم انت.
واجه ءَ گوشت: بندساچی ملک ءُ استان ءِ ته ءَ مارشتانی رد ءَ بوتگ. آپبنداں بےکارزانتی ءُ جوانێں پٹءُپۆل ءَ جۆڑ بوتگ انت، پمێشا مرۆچی هۆرک انت. آوان هم که آپ داشتگ آپش باپ ءُ هشک بوتگ. اے آپبنداں کے ءُ گۆں کجام سیاست ءَ جۆڑ کرتگ؟!
🔹ملک گۆں «پوره ئێں ملکاری ءُ مالزانشتی بنبست» ءَ آماچ انت/ پرے مشکلانی جۆڑ کنگ ءَ جوانێں رهبند پکار انت
زاهدان ءِ آدێنگ ءِ امام ءَ درائێنت: ملک، ملکاری ءُ مالزانشتی بنبستانی آماچ انت. اے منی گپ انت ءُ من گۆں منانک ءَ گوش آں که ملک ءِ مالزانشت پوره ئێں بنبست ءِ آماچ انت ءُ هچ مالزانتے نه توانت اے مشکل ءَ جۆڑ کنت، پچے که راه ءُ درۆشم راست نه انت. مالزانشت ءُ سیاست گۆں وت همگرنچ انت ءُ یک توجیل همێش انت که سیاستانَ جۆڑ کن ات.
واجه ءَ گێش کرت: اگاں سیاست ءُ کارمستری ءِ درۆشم رد بیت گڑا شما هر زبردستێں کارزانتے را هم بیار ات نه توانت توجیل درگێج ایت. مشکلاں بس گۆں دعا ءُ کوشست ءَ جۆڑ نه بنت، بلکه بائد راه ءُ رهبند هم راست به انت. پاگواجهاں که قرآن ءَ زان انت ءُ زانشتجاهی ءُ دلسۆچاں بائد انت اے باروا پکر کن انت ءُ توجیل درگێج انت ءُ کارمستراں هم آوانی توجیلاں منّ انت.
🔹پنجاه سال ءِ کتهکاری ءَ نشان داتگ که بنیادی کانود مشکل دار ایت
مولانا عبدالحمید گوشت: پنجاه سال شه بنیادی کانود ءِ نزارگ ءَ گوستگ ءُ آئی گێشتری نزآرۆکاں پاگواجه بوتگ انت ءُ بازێں جایے شه دگه ملکانی کانوداں کارمرز اش کرتگ وهدےکه هر ملک ءُ ڈیهزانشے وتی هاسێں سیاست ءُ جاور ءَ دار ایت. هر ملک ءِ بنیادی کانود بائد انت هما ملک ءِ جاورانی رد ءَ ءُ شه گهترێں کارزانتانی نێمگ ءَ نزّآرگ بیت.
واجه ءَ کارمسترانَ ٹکاٹک گوشت: جمهوری اسلامی ءِ پنجاه سال ءِ کتهکاری ءَ نشان داتگ که بنیادی کانود مشکل دار ایت ءُ تاں وهدے که آئی مشکلاں جۆڑ مه بنت هرکس شه هرکجا کارگرگ بیت نه توانت ملک ءِ مشکلاں جۆڑ کنت. بائد پٹءُپۆل کن ات که هستێں مشکلانی رۆتگ که هچ زرد ءِواهندے نه توانت آوان نادلگۆش کنت، کجا انت.
🔹اگاں «عدالت» اێردارگ بوتێں مرۆچی ملک گۆں بنبست ءَ آماچ نه بوت
زاهدان ءِ آدێنگ ءِ امام ءَ درشان کرت: درێگے کارمستراں شه هما اول ءَ پگر کرتێں که گهترێں راه په حکومت ءِ دارگ ءُ مردمانی مشکلانی جۆڑ کنگ ءَ عدالت ءِ اێردارگ انت. عدالت ءِ اێر دارگ بزاں مڈیانی برابرێں بهر کنگ ءُ مچێں مردمانی بهر زورگ شه ملک ءِ مڈی ءُ آسراتیاں. مرۆچی ملک ءِ بازێں مڈی ئے ڈن ءَ برگ ءُ تباه بوتگ انت ءُ بازێنے شه اے راه ءَ وتی کیتوئاں پر کرتگ، وهدےکه پوریاگر ءُ کارنشت ءُ وڑوڑێں پاٹیاں گشنگ انت ءُ هررۆچ زهرشانیَ کن انت.
واجه ءَ گێش کرت: اگاں په تیوگێں مردماں پکر بوتێں ءُ پهکێں راج ءُ مذهبانی بودیگاں کارگرگ بوتێن انت گڑا ملک نونێں مشکل ءُ بنبستانی آماچَ نه بوت.
🔹آوان که بندشاں دادَ زانت کجا انت ءُ پچے وتی ردی ءَ نه منّ انت؟/ کارمسترانی میان ءَ ردی ءِ منگ ءُ گستائی نه انت
مولانا عبدالحمید گوشت: وهدے که بندش ملک ءِ سر ءَ اێر دارگ بوت انت، بازێنے گوشت که بندش «داد» انت ءُ ملک دێمرئیَ کنت. آوان که اے گپاں جت نون کجا انت، پچے وتی ردی ءَ نه منّ انت؟ بژن انت که مئے ملک ءِ ته ءَ هچ کس وتی ردی ءَ نه منّ ایت ءُ گستائی نێست. پاگواجه ءُ زانشتجاهی ءُ کارمستر وتی ردی ءَ نه منّ ایت ءُ اگه یک کارمسترے رد کنت انگت وتی کار ءِ سر ءَ برجاه انت، وهدے که ماں دێماشتگێں ملکاں جمهوری کماش ءُ مزن وزیراں هم گستا به انت.
واجه ءَ گوشت: من اگه لهتے کارمسترانی جاه ءَ بوتێں آں وتی ردی ءَ منّ ات آں ءُ یک گستائی ءِ بدل ءَ ده بر گستا بوت آں. تاں وهدےکه کارمستراں اے کاراں مه کن انت اے هشتاد، نود ملیونی ئێں ملک ءِ مشکلاں جۆڑ نه بنت.
🔹آمیدگس ملا کمال ءِ کۆشکاراں دزگر کنت ءُ سزا دنت
زاهدان ءِ آدێنگ ءِ امام ءَ ماں دگه بهرے شه وتی هبراں گوشت: ملا کمال رحمهالله یکے شه استان ءِ اسپےریش ءُ نامپرشتێں مردماں ات که مدام په سهل ءَ ءُ جێڑهانی گیشءُگیواری ءَ کۆشستے کرت. آ واجه همے زوتاں ترور ءُ شهید کنگ بوت که مردماں شه اے پێشامد ءَ سک متأثر بوت انت.
واجه ءَ کڈن کرت: منی سۆگه په کارمستراں همێش انت که پهدل ءُ زوت ملا کمال ءِ کۆشکاراں ودی ءُ مجازات کن انت. همےرنگ منی سۆگه په مردماں هاسکار آئی نزیکێں سیاداں همێش انت که اوپار کن انت تاں کارمستراں آ بیمکار ءَ دزگر ءُ کانود ءِ رد ءَ سزا دے انت.
🔹سرباز ءِ کرد گۆں دو پیرزال ءَ سک ظالمانه ءُ متکبرانه ات/ آمیدگس ءِ زوتێں پرمان پرایی دزگر کنگ ءُ سزا دیگ ءَ مردماں آرام کرت
مولانا عبدالحمید گۆں اشاره به یک سربازے ءِ کرد ءَ گۆں دو بلُک ءَ ماں میلک ئی سیمسر ءَ گوشت: همے زوت ءَ یک سربازے ءِ ظالمانه ءُ متکبرانه ئێں کرد گۆں دو پیرزال ءَ مردمانی دلاں سک پدرد کرت.
واجه ءَ گێش کرت: آمیدگس ءِ سرمستر ءِ جوانێں کرد که زوت آئی دزگر کنگ ءِ پرمان ءَ دات ئی ءُ گوشت ئی سزا دیگ بیت، سوب بوت مردماں آرام به انت. اگاں آمیدگس مدام زوت وتی اگده ءِ رد ءَ کرد کنت گڑا بازێں مشکلانی دێم گرگ بیت.
🔹«تیرگواری» ءُ «ماشینانی گروهتاچیاں» ماں آرۆساں بند کن ات
زاهدان ءِ آدێنگ ءِ امام ءَ گۆں اشاره به تیرگواری ءُ ماشینانی گروهتاچیاں ماں آرۆساں گوشت: تیرگواریی ءُ ماشینانی تاچێنگ ماں آرۆساں باز ردێں کارے ءُ باز بر ءَ آرۆساں به سوگ ءِ دیوان ءَ بدل بوتگ انت.
واجه ءَ کڈن کرت: منی لۆٹ شه پهکێں مردماں همێش انت که تیرگواری ءُ ماشینانی گروهتاچیاں ماں آرۆساں بند کن انت.
🔹هلائێنۆکاں «زنون» چراگاں کارمرز مه کن انت
مولانا عبدالحمید گۆں اشاره به «زنون» چراگانی کارمرز کنگ ءَ گوشت: زنون چراگانی کارمرز کنگ ماں دگاں بازێں مشکلانی سوب بوتگ. هلائێنۆکاں شه اے چراگاں کارمرز مه کن انت که دیمی هلائێنۆک ءِ دید ءِ دێم ءَ گیت. اگاں اے چراگانی کارمرز کنگ په دگراں چٹی ءُ نقصان داشته بیت، گڑا شه شریعت ءِ رد ءَ حرام انت.
چمشانک