شیخالاسلام مولانا عبدالحمید ماں زاهدان ءِ نماز جمعه ءِ دیوان ءَ (3 اسفند 1403/ 21 فبروری 2025) گوشت ء که هر کارمسترے ماں هر جاگهے که دار ایت بائد وتی اگده ءِ سر ءَ عمل کنت. واجه ءَ «استمان ءِ لۆٹ ءُ مشکلانی رندگیری ءَ» را شه هر حاکم ءُ کارمستر ءِ ٹوهترێں اگدهاں زانت.
🔹حاکم چاگرد ءِ درستێں پاٹیانی دێم ءَ ذمه وار انت
په سنیآنلاین سرهال ءَ مولانا عبدالحمید درشان کرت: رسولالله صلیاللهعلیهوسلم ءَ درائێنتگ: «کلکم راع و کلکم مسئول عن رعیته» بزاں ھرکس وتی زیردستێں مردمانی ذمه وار انت. سلاهبنداں، آمیدگس ءِ واکداراں، سیاسی کارمستراں چۆ جمهوری کماش، گورنر، دمگدار ءُ حتا هما که چاگرد ءِ رهشۆنی آیی ذمه ءَ انت، اے حدیث ءِ رد ءَ ذمه وار انت. هاسکار هما کارمستر که شه بیتالمال ءَ ماجب گیت بائد په جوانی وتی اگده ءِ سر ءَ عمل کنت.
واجه ءَ گێش کرت: ماں هر ملکے یکے شه حاکم ءِ ٹوهترێں اگدهاں همێش انت که استمان ءِ پکر ءَ بیت تاں مردماں وتی رۆزگار، جاندراهی، وانگ ءُ زانگ، ایمنی ءُ دگه کارانی ته ءَ ھترہ ءِ آماچ مه بنت. حاکم چاگرد ءِ درستێں پاٹیانی دێم ءَ ذمه وار انت ءُ آئی ءَ وتی سرجمێں دلگوش استمان ءِ مشکلانی گیشءُگیوار ءُ استمان ءِ وشنودی ءِ رسگ ءِ نێمگ ءَ به کنت.
🔹حاکم ءُ کارمستر بائد انت گشنگی ءَ سگ ایت تاں مردم سێر به انت
زاهدان ءِ آدێنگ ءِ امام ءَ سک سۆگه کرت: حاکم ءُ کارمستر بائد انت بےوابی ءَ سگ انت تاں مردم په تاهیر بوسپ انت ءُ گشنگی ءَ سگ انت تاں مردم سێر به انت. اگاں یک حاکم ءُ کارمسترے په جوانی وتی اگده ءِ سر ءَ عمل کنت، گڑا شه الله ءِ نێمگ ءَ آیرا مز ءُ داد رس ایت. قیامت ءِ رۆچ ءَ شه ھماواں یکے کہ بُرزترێں رُتبه ءَ سر بیت ءُ الله ءِ عرش ءِ ساهگ ءَ اێر کنگ بیت آ «عادلێن حاکم» انت. بلے اگه حاکم په جوانی وتی اگده ءِ سر ءَ عمل مه کنت، گڑا بائد قیامت ءِ رۆچ ءَ الله پاک ءِ بارگاه ءَ وتی کردارانی جواب ءَ دنت.
واجه ءَ گوشت: مهتر عمر رضیاللهعنه ءَ درائێنتگ: اگاں منی خلافت ءِ ته ءَ کچکے شه گشنگی یا تنگی ءَ مر ایت، قیامت ءِ رۆچ ءَ الله من ءَ انگڑێن ایت. مهتر علی وهدے اُشکت که ماں آیی خلافت ءَ یهودی جنێنے ءِ سر ءَ ظلم بوتگ، درائێنت ء وهدے منی خلافت ءِ ته ءَ یک مردمے ءِ سر ءَ ظلم بیت، گڑا زند ءُ حکومت په من چه سۆبے دار ایت! مهتر علی رضیاللهعنه ءَ مدام درائێنتگ که اگاں آمید ءِ بنگپ ءُ مظلوم ءِ حقانی گرگ مه بوتێں من هچبر حکومت ءَ نه منّ ات. پمێشا حکومت ءِ ارزشت گۆں عدالت ءِ اێر دارگ ءَ انت.
🔹بائد انچێں توجیل درگێجگ بیت که پێسر ءِ بندشاں زورگ به انت ءُ نۆکێں بندشانی دێم گرگ بیت
مولانا عبدالحمید گوشت: مچێں کارمستراں هر جاگهے که دار انت بائد مردمانی مشکلانَ رندگیری کن انت تاں استمان ءِ وشنودی کٹگ بیت. ماں نونێں سکێں جاور ءَ که ملک بندشانی آماچ انت ءُ نۆکێں بندشاں ودی انت، کارمستراں بائد انچێں توجیل درگێج انت که پێسر ءِ بندشاں زورگ به انت ءُ نۆکێں بندشانی دێم گرگ بیت.
🔹په کار ءُ دندا ءُ مردمانی رۆزیگی مشکلانی جۆڑ کنگ ءَ سالیگێں زرءُمالبندی اِلّگ بیت
زاهدان ءِ آدێنگ ءِ امام ءَ گوشت: نون سال ءِ گڈسر انت ءُ سالیگێں زرءُمالبندی هم همے درگت ءَ بیت. مئے سۆگه اێش انت که بازێں جاگه ءُ ادارهانی سالیگێں زرءُمالبندی کم بیت ءُ په مردمانی کارءُباراں ءُ آوانی مشکلانی جۆڑ کنگ ءَ دیگ به انت.
واجه ءَ گێش کرت: کارءُبار ءِ تیار کنگ حکومتانی اگده انت. اگه زر ءُ مڈی مه بیت ءُ چاگرد ءُ بازار گرانی ءِ آماچ بیت، گڑا کٹءُکاراں تاوان گند انت ءُ ماں چاگرد ءَ بےکاری بازَ بیت.
🔹دینی وانگجاهاں ءُ مذهبی کارانَ سالیگێں زر مه دےات/ دینی وانگجانی هرچءُدرچ بائد مردمانی بڈ ءَ بیت
مولانا عبدالحمید درشان کرت: ما گۆں دلسۆچی ءَ سۆگهَ کن اێں که ماں نونێں جاور ءَ دینی وانگجاهاں ءُ مذهبی کارانَ سالیگێں زر دیگ مه بیت. دینی وانگجانی هرچءُدرچ بائد مردمانی بڈ ءَ بیت. وختے مردم شه دینی وانگجاهاں رنج انت، گڑا آوانی کار ءُ جهداں هچ سۆبے نه دار انت ءُ بند کنگ اش گهتر انت.
واجه ءَ گوشت: دێرێں زمانے که گوستگێں سرکاراں لۆٹ اتگ که اهلسنتانی دینی وانگجاهانَ کمک کن انت، بلے گێشتری پاگواجهاں اێشرا نه منتگ که دینی وانگجاهانی هرچءُدرچ بائد مردمانی بڈ ءَ بیت ءُ اگه یک رۆچے مردم مه لۆٹ انت که دینی وانگجاهانَ کمک کن انت ما دینی وانگجاهانَ بندَ کن اێں. خیر ءُ سۆب همێش انت مسیت ءُ دینی بنجاه ءُ مذهبی کاراں گۆں مردمانی کمک ءَ دێم ءَ برگ به انت.
🔹«پاهو» اسلام ءِ اصل ءِ ته ءَ نه انت ءُ پیغمبر ءُ خلفای راشدینانی دۆر ءَ هم باز کم بوتگ
مولانا عبدالحمید ماں دگه بهرے شه وتی هبراں شه «پاهو ءِ گێش بیگ ءَ» ماں ملک ءَ شرگداری کرت ءُ گوشتء: سک بژنیگ اێں که دوارگ پاهو ملک ءِ ته ءَ باز بوتگ، وهدے که پاهو اسلام ءِ اصل ءِ ته ءَ نه انت پیغمبر ءُ خلفای راشدینانی دۆر ءَ باز کم بوتگ.
واجه ءَ گوشت: مرۆچی ئێں پاهواں لهتے پاگواجهانی اجتهادانی رد ءَ انت بلے گێشتری پاگواجهانی دیدانک ءَ اے اجتهاد رد انت. سیاسی پاهواں ءُ همےرنگ بازێں پاهواں که په نشه ئی موادانی نیمۆن ءَ بیگ ءَ انت، شریعت ءِ رد ءَ نه انت.
واجه ءَ همےرنگ گوشت: پاهوانی بند کنگ استمان ءِ لۆٹ انت. ماں آ ملکاں که استمان اصل انت، نه بائد کارے که گۆں استمان ءِ لۆٹ ءَ ءُ شریعت ءِ ٹکێں حکماں چپ انت، بیت. هاسکار ماں نونێں جاور ءَ که ملک ڈن ءَ گرانێں مشکلانی آماچ انت.
🔹مردماں شه نشه ئی موادانی بها کنگ ءُ دگه کاراں که په چاگرد ءَ تاوان دار انت، پهرێز کن انت
مولانا عبدالحمید دێمتر ءَ مردمانَ سۆگه کرت که شه نشه ئی موادانی بها کنگ ءُ انچێں کاراں که په چاگرد ءَ تاوان دار انت، پهرێز کن انت. نشه ئی موادانی باپاری هم ماں شریعت ءَ روا نه انت ءُ هم جانی نقصان دار ایت. شریعت ءِ روگه ءَ اگه چیزے چٹی هم مه دار ایت، بلے جانی نقصان داشته بیت، بائد شه آیی پهرێز بیت.
واجه ءَ گێش کرت: کهول ءُ اسپےریش ءُ پاگواجه ءُ وانندهاں ورنائانَ دلگۆش کن انت ءُ آوانَ زانت ءِ کٹگ ءُ بهر زورگ ماں کٹءُکار ءِ دربرگی مراگشانی نێمگ ءَ دلبڈی دے انت.
🔹نه بائد چاگرد ءِ ته ءَ اسراف بیت
زاهدان ءِ آدێنگ ءِ امام ءَ مردمانَ په «قناعت» ءُ «پهرێز شه اسراف» ءَ سۆگه کرت ءُ گوشتء: نه بائد چاگرد ءِ ته ءَ اسراف بیت. آپ ءُ لێن ءُ گێس ءُ اے رنگێں چیزاں په کساس کارمرز کن اێں.
واجه ءَ گێش کرت: منی کلۆه په جنێناں اێش انت که ماں نونێں جاور ءَ که مردێں ءُ سرپرستانی کٹاں کم بوتگ انت، قناعت کن انت ءُ ارزانێں پچ گورا کن انت تاں لۆگواجهاں ءُ کهولانی نانآرۆکاں لاچار مه بنت ناروائێں کارانی پد ءَ برو انت.
چمشانک