شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (21 دی‌ماه 1403/ 10 جنوری 2025) گۆں اشاره به «ملک ءِ تهے ءُ ڈن ءِ مشکلاں» پرے مشکلانی گیشءُگیوار ءَ «ترندێں کارمستری» ءُ «پرزۆرێں بدلی ماں سیاستانَ» ضروری زانت.
🔹ایران ءِ مردماں انگت په «عدالت ءِ اێر دارگ»، «نابرابریانی دور کنگ» ءُ «بدلی آرگ» ءَ چمءُچاری انت
په سنی‌آنلاین ءِ سرهال ءَ مولانا عبدالحمید گوشت: ایران ءِ مردماں اے رۆچاں بازێں مشکلانی آماچ انت. لهتے شه مشکلاں شه پێسر ءَ منتگ انت ءُ کارمستراں نه توانتگ پراوان تۆجیلے درگێج انت ءُ مشکلاں مچ بوتگ انت.
واجه ءَ گێش کرت: ماں گوستگێں سالاں ایران ءِ مردماں شه مرد ءُ جن ءُ راج ءُ مذهب ءُ وڑوڑێں پاٹیاں زهرشانی کرت ءُ عدالت ءِ اێر دارگ، نابرابریانی دور کنگ ءُ سیاسی، مذهبی ءُ رسانکدری آزاتیانی لۆٹۆک بوت انت. همےرنگ بازێنے چۆ پوریاگر، کارنشت، پرستار ءُ وانێنۆکاں په وتی ماجبانی کمی ءَ زهرشانی کرت که اے زهرشانیاں انگت برجاه انت. ایران ءِ مردماں انگت په وتی لۆٹانی منگ ءُ بدلی آرگ ءُ مشکلانی گیشءُگیوار ءَ ودار انت.
🔹مالزانشتی مشکلاں هررۆچ بدتر به انت ءُ کارمستراں نه توانتگ که تۆجیلے درگێج انت
زاهدان ءِ آدێنگ ءِ امام ءَ دێمتر ءَ گۆں اشاره به ملک ءِ «مالزانشتی گپچل» ءَ گوشت: مالزانشتی ءُ رۆزیگی مشکلاں شه هما مشکلان انت که ملک ءِ تیوگێں مردماں شه شهرنندۆک ءُ هلک نندۆکاں آوانی آماچ انت. کهولانی سرپرستاں پرێشا که نه توان انت وتی زندگی ءِ هرچاں تیار کن انت جنءُزهگانی دێم ءَ سرجهل انت.
واجه ءَ گێش کرت: مالزانشتی مشکلاں رۆچ په رۆچ بدتر به انت ءُ ارمان که شه کارمسترانی نێمگ ءَ پرے مشکلاں تۆجیلی درگێجگ نه بوتگ. شاید کارمستراں شه اے مشکلانی گیشءُگیوار ءَ بےوس انت.
🔹درملکی جێڑهاں په ملک ءَ «ترندێں پاترپ» جۆڑ بوتگ انت.
مولانا عبدالحمید «درملکی مشکل ءُ جێڑهانَ» هم شه ایران ءِ مردمانی گڑتیاں زانت ءُ درشانء کرت: ایران ءُ درملکانی جێڑهاں مرۆچی سکێں پاترپ انت. ملک ءِ نونێں مشکلاں گپچل جۆڑ بوتگ انت که مهتر علی ءِ رنگے باهێماتێں مردمے نێست که توانت آوانَ گیشءُگیوار کنت.
واجه ءَ ٹکاٹک گوشت: ملکی ءُ درملکی مشکل ءُ مسائلانی گیشءُگیوار ءَ ترندێں کارمستری ءِ پکار انت که ملکی مشکلانَ گۆں مردمانی لۆٹانی منگ ءُ درملکی مشکلانَ گۆں پراهدلی ءُ دورچاری ءَ گیشءُگیوار کنت.
🔹پێسر ءِ سیاستانَ چپدێمێں آسرے بوتگ؛ اے سیاستاں بائد «زوت» ءُ «سرجم» ءَ بدل به انت
زاهدان ءِ آدێنگ ءِ امام ءَ گێش کرت: نونێں درملکی جێڑهاں په ملک ءَ پاترپ انت. خدا مه کنت که ملک ءِ جوهری بنجاهانی سر ءَ بێڑ بیت که ملیارداں دلار په آوان هرچ بوتگ. جوهری ءُ سلاهی ءُ مالزانشتی بنجاهاں ءُ بنیاتی ڈیلءُڈۆلاں ملک ءِ مڈی انت که اگاں آوانی سر ءَ بێڑ بیت ماں نونێں جاور ءَ که یک بهرے شه ملک ءِ مڈیانَ لهتے مردماں برتگ ءُ یک بهرے هم کارگس ءُ ادارهانی دست ءَ انت، مردمانَ ٹوهێں نقصانے رس ایت ءُ په ملک ءَ ٹوهێں مشکلے جۆڑ بیت.
واجه ءَ درشان کرت: ما گۆں دلسۆچی ءَ کارمسترانَ سۆگه کن اێں که اے باروا پکائێں تۆجیلے درگێج انت ءُ گۆں مردم ءُ زانتکاراں شۆر کن انت. پێسر ءِ سیاستانَ چپدێمێں آسرے بوتگ که بائد انت زوت ءُ سرجم ءَ بدل کنگ به انت.
🔹موه باز کم انت؛ سوریه ءِ چستءُاێراں نه بائد ڈالچار به انت
زاهدان ءِ آدێنگ ءِ امام ءَ گوشت: وار باز کم انت ءُ نون بائد انت سیاستاں بدل به انت. زانگ نه بیت که آیۆک ءَ وارے په سیاستانی بدل کنگ ءَ بیت یا نه. سوریه ءِ چستءُاێراں که لهتے آیرا نادلگۆش کن انت، باز ٹوهێں پێشامدے ات که نه بائد ڈالچار بیت.
واجه ءَ گێش کرت: سوریه ءِ چستءُاێراں شه هچ کس ءَ چێر نه انت. ماں سوریه ءَ اۆلی رند ءَ مردماں حکومت ءِ هلاس کنگ ءَ نه لوٹ اتگ، بلکێں بدلی لوٹ اتگ اش، بلے مردمانی گپاں گۆشدارگ ءُ آوانی لوٹانی منّگ ءِ بدل ءَ گۆں مردماں جنگ اش کرت. مردم هم چست بوت انت ءُ حکومت ءَ را پرۆش اش دات ءُ سوریه ءِ زر ءِ ارزشت هم برز شت، پچےکه سوریه ءِ نۆکێں حکومت ءَ مردمانی لۆٹ ءُ بدلیانَ منّ ات.
مولانا عبدالحمید دێمتر ءَ گوشت: ما را امێت هست که کارمستراں تۆجیلے درگێج انت ءُ شه بێران کنۆکێں جنگ ءَ دێمداری کن انت. پچےکه اگاں مئے دێمپانی نزور بیت گڑا مزنێں تاوانے ملک ءُ استمان ءَ رس ایت.
🔹مولانا جلیل‌الله رحمه‌الله ءِ بێرانی نه تهنا په اۆگانستان ءِ مردماں، بلکه په اسلامی دنیا ءَ هم یک تاوانے ات
زاهدان ءِ آدێنگ ءِ امام ءَ ماں یک بهرے شه وتی هبراں گۆں اشاره به مولانا جلیل‌الله مولوی‌زاده ءِ بێرانی ءَ گوشت: مولانا جلیل‌الله مولوی‌زاده زبردستێں پاگواجه ءُ مزن زانت ءُ دلسۆچێں مردمے ات که ماں وڑوڑێں زانتی پڑاں آیرا بازێں نبشته ءُ کتابے هست انت. آیی لهتێں وختے زاهدان ءَ زند گوازێنتگ ءُ آیرا نزیکێں رهوتے گۆں مولانا عبدالعزیز رحمه‌الله [دارالعلوم زاهدان ءِ بن‌هشت اێر کنۆک] ءُ دارالعلوم مکی ءِ آدگه باسکاں بوتگ.
واجه ءَ گوشت: مولانا جلیل‌الله رحمه‌الله ءِ بێرانی نه تهنا په اۆگانستان ءِ مردماں، بلکه په اسلامی دنیا ءَ هم یک تاوانے ات.
🔸زاهدان ءِ آدێنگ ءِ امام ءَ وتی هبرانی گڈسر ءَ گوشت که دارالعلوم زاهدان ءِ طالبانی زانت‌دربری ءِ دیوان همے سال ءِ بهمن ءِ یازدمی روچ (30 جنوری) ءَ برجم دارگ بیت. واجه ءَ گۆں اێشی که شه مردماں دعا ء لۆٹ ات، لس مردمانَ سۆگهء کرت که دیوان ءَ مالی کمک کن انت.
چمشانک