🔷 پزشکیان ءِ سرکار ءَ درے سیاستانی پڑا گێشترێں اختیار دیگ بیت
شیخالاسلام مولانا عبدالحمید ماں زاهدان ءِ نمازجمعه ءِ دیوان ءَ (25 آبان 1403) گێش شه اێشی که کارمسترانَ په «نرمێں ءُ حکیمانه ئێں لبزانک ءِ کارمرز کنگ» ءُ «مدارا ءَ گۆں دنیا ءِ مردماں» سۆگه کرت، گوشتء: ایران ءِ استمان گێشترێں بندشاں سگ ات نه کنت ءُ جوانێں حکمت ءُ تدبیرَ توانت شه جنگ ءَ ءُ گێشترێں بندشاں دێمداری کنت.
زاهدان ءِ آدێنگ ءِ امام ءَ همےرنگ وتی وشالی ءَ شه نونێں سرکار ءِ کارمسترانی لبزانک ءَ درشان کرت ءُ لۆٹ اتء که «پزشکیان ءِ سرکار درے سیاست ءِ پڑا گێشترێں اهتیار دیگ بیت.»
واجه ءَ گێش کرت: مئے لۆٹ همێش انت که پزشکیان ءِ سرکار ءَ درے سیاستانی پڑا کێشترێں اهتیار دیگ بیت تا گۆں مدارا ءُ تدبیر ءَ مشکلانَ حل کنت. ما بائد گۆں دنیا ءَ مدارا کن اێں. اے قرآن ءِ حکم انت ءُ هم ایران ءِ دۆدءُربێدگ ءِ رد ءَ انت.
🔹 بدترێں گپ ءُ کردار همێش انت که مردمانَ شه دین ءَ دور کنت
په سنیآنلاین ءِ سرهال ءَ مولانا عبدالحمید وتی هبرانی اۆلی سر ءَ په پهرێز شه هر گپ ءُ کردارے که مردمانَ شه دین ءَ جنت ءُ بێزار کنت، سک سۆگه کرت ءُ گوشتء: بدترێں گپ ءُ کردار هما انت که بےانصافی ءُ زۆرے بیت ءُ مردمانَ شه الله ءَ دور ءُ شه دین ءَ بدبین کنت. ماں حدیث ءَ هست که دو صحابی ءَ سهب ءُ خپتن ءِ نماز ءِ امامت ءَ را دراج کرت ات که لهتے شه نمازوانۆکاں اێراد گپت. واجه رسولالله صلیاللهعلیهوسلم شه آ دو صحابی ءِ کردار ءَ انچۆ هژم گپت که پێسر ءَ آ رنگ ءَ هژمی نه بوت ات؛ گڑا ماں یک گشتانکے آ بنگپ ءِ باروا اشاره کرت ءُ گوشتء: «إنَّ مِنكُم مُنَفِّرِينَ»؛ «لهتے شه شما مردمانَ شه دین ءَ دور کن انت.»
واجه ءَ دێمتر ءَ گوشت: اے باز هژدری انت که ما گۆں وتی کردار ءَ مردمانَ شه دین ءَ دور مه کن اێں، بلکه گۆں وشتبی ءُ جوانێں کردار ءُ محبت ءُ مردمانی حرمتانی ساتگ ءَ آوان الله ءِ دین ءِ نێمگ ءَ لۆٹ اێں. گواچنی اسلام هم همێش انت که مئے گپ ءُ کرداراں عدالت ءُ آمید ءِ رد ءَ به انت. درۆگ مه گوش اێں، پچےکه درۆگ ماں هبر ءَ ٹوهترێں چۆٹی انت ءُ یک بےانصافی ئێں گپے.
🔹 وتکشی ملک ءِ ته ءَ باز بوتگ
مولانا عبدالحمید وتی بژن ءَ شه بازێں وتکشیاں درشان کرت ءُ گوشتء: ارمان که مرۆچی وتکشی ملک ءِ ته ءَ باز بوتگ. دلگۆش کن اێں که اسلام رحمت ءِ دین انت ءُ واجه رسولالله رحمت ءِ پێغمبر انت. نه بائد مردمانی کردار انچۆ کسے را شه دین ءَ دور ءُ بێزار کنت که آ وتکشی کنت یا دگه بدێں ءُ کفری ئێں کارے کنت.
واجه ءَ گێش کرت: ما مسلماناں بائدانت که اسلام ءِ پرمانان ءَ رنگے شنگ ءُ تالان کن اێں که چاگرد ءِ ته ءَ بدکایگ ءُ دوری شه دین ءَ جۆڑ مه بیت. نه بائد آ رنگ کردار کن اێں که مردم هژم گر انت.
🔹 یورپ ءُ دنیا ءِ آدگه ملکاں پد ءَ «گوست ءِ ردێں راه ءَ» مه رو انت
مولانا عبدالحمید ماں دگه بهرے شه وتی هبراں گوشت: میانرۆدرهت ءِ جنجالانی سوب اسرائیل انت که فلسطین ءِ ٹگارانی په زۆر گپتگ. منی سۆگه په دنیا ءَ همێش انت که پێسر ءِ ردێں راهان ءَ پد ءَ مه رو انت. من ٹکاٹک گوش آں که یورپی ءُ دنیا ءِ ملکاں ءُ میان استمان ردێں راهے را رو انت. میانرۆدرهت ءِ هپتادسالگێں جنگاں ءُ اسرائیل ءِ زۆرگریاں ما فلسطین ءَ همے ردێں راه ءِ برورد انت.
واجه ءَ درائێنت: راستێں رێسءُپرێسانی رد ءَ میاناستمانی بیمکاری ءُ میانرۆدرهت ءُ بازێں جاهانی ناامنیانی سوب همے هپتادسالگێں جنگءُجنجال انت که ماں فلسطین ءِ سرڈگاراں بوهگ ءَ انت. امریکا ءُ میانرۆدرهت ءِ ملکاں اے باروا بازێں هرچے کرتگ، پچے که ردێں راه ءَ روان بوتگ انت.
🔹 گهترێں تۆجیل په میانرۆدرهت ءِ جێڑهاں «اسرائیل ءِ ملگری ءِ هلاس کنگ» ءُ «فلسطین ءِ جتائێں ملک ءِ جۆڑ کنگ» انت
زاهدان ءِ آدێنگ ءِ امام ءَ تچکاتچک گوشت: گهترێں راه په پهکێں پاٹیاں شه اسرائیل ءِ پلهمرز ءُ فلسطین ءِ پلهمرزاں همێش انت که مارشتانی بدل ءَ کۆشست کن انت اسرائیل ءِ ملگری ءَ هلاس کن انت تاں فلسطینیاں وتی جتائێں ملک ءَ داشته به انت. پورپ ءُ امریکا بائد انت اسرائیل ءَ پرنچ انت تاں فلسطینیانی حق ءَ پد ءَ آوانَ دنت ءُ تیوگێں دنیا فلسطین ءِ ملک ءَ منّ ایت. اے چیز دنیا ءُ میانرۆدرهت ءِ امنیت ءَ پجائێن ایت.
🔹 استان/هلاکه ءِ امنیت بائد پهازگ بیت
مولانا عبدالحمید وتی هبرانی گڈسر ءَ په استان ءِ امنیت ءِ پهازگ ءَ سک سۆگه کرت ءُ گوشتء: ارمان که اے رۆچاں ناامنی ءُ جنجالے استان ءِ ته ءَ پێش آتگ. منی سۆگه په مچاں همێش انت که استان ءِ امنیت ءِ باروا جهد کن انت.
واجه ءَ گێش کرت: استان بائدانت امن بیت ءُ اگاں کسی لۆٹے دار ایت گڑا آیرا شه ترانکاری ءِ راهاں رندگیری کنت. پهکاں بائد جوانێں شرگداری ءُ دیدانکان ءَ منّ انت تاں مئے استان امن بیت. من تأکید کن آں که مچاں استان ءِ امنیت ءَ سات انت تاں سیمسرانی ته ءَ نامنی مه بیت.
چمشانک