شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (18 آبان 1403) گۆں اشاره به ترامپ ءِ سۆبێں بیگ ءَ ماں امریکه ءِ راجمستری گچێنکاری ءَ، دموکراتانی پرۆش ءِ بنی سوب ءَ را آوانی «پله‌مرزی شه اسرائیل ءِ بےرحمی ئێں جنێن ءُ زهگ ءُ آزاورانی کشتار ءَ ماں غزه ءُ لبنان ءَ» زانت.
په سنی‌آنلاین ءِ سرهال ءَ مولانا عبدالحمید گوشت: دموکراتانی پرۆش ءِ باروا بازێں رێسءُپرێسے هست، لهتے آیرا گۆں مالزانشتی ءُ دگه دگه مسائلاں همگرنچَ زان انت، بلێں په منی دیدانک ءَ آیی بنی سوب دموکراتانی پله‌مرزی شه اسرائیل ءِ بےرحمی ئێں کشتار ءَ ماں غزه ءُ لبنان ءَ بوتگ ءُ اے چیز ءَ را کارزانتاں نادلگۆش کرتگ.
واجه ءَ گێش کرت: الله پاک مردمانی کرداران ءَ چار ایت، هرکس که آمید ءُ عدل ءُ رحم داشته بیت، آیرا مدت کنت پچےکه «الملک یبقی مع الکفر و لایبقی مع الظلم»؛ «حکومت گۆں کفر ءَ مان ایت، بلێں گۆں ظلم ءُ زۆراکی ءَ نه مان ایت.»
مولانا عبدالحمید درشان کرت: مئی سۆگه په ریپبلکن پارٹی/ جمهوریخواهاں همێش انت که دموکراتانی ردی ءَ پد ءَ مه کن انت ءُ غزه ءُ لبنان ءِ جنگ ءَ زوتر هلاس کن انت. مئے کلۆ په ٹرمپ ءَ همێش انت که وتی وعده ءِ رد ءَ که «جنگانی هلاس کنگ» بیت، غزه ءُ لبنان ءِ جنگ ءَ زوتاں زوت هلاس کنت.
🔹 دمگی استاندار/ هلاکه دار ءِ گچێن کنگ سیستان ءُ بلوچستان ءِ مردمانی لۆٹ بوتگ؛ اے چیز ءَ استان ءِ پهکێں راج ءُ مذهبان ءَ وشال کرتگ
واجه شیخ‌الاسلام ءَ ماں دگه بهرے شه وتی هبراں گوشت: دمگی استاندار ءِ گچێن کنگ ءَ استان ءِ مردمان ءَ وشال کرتگ، پچےکه دمگی استاندار گۆں مردمانی رنج ءُ مشکلاں درستی انت. کسے که په استانداری ءَ گچێن بوتگ بودیگ ءُ وسی ئێں مردمے.
واجه ءَ گێش کرت: من دێر انت که نه توانگ ما چۆشێں مراگشاں بهر زور آں، ماں استاندار ءِ پجارۆکی ءِ مراگش ءَ بهر زرتاں، پچےکه منی باور ءَ بائد انت شه چشێں کاراں پله‌مرزی بیت. وهدےکه ما دگران ءَ «آمید» ءِ نێمگ ءَ توار کن اێں، گڑا بائد هر جوانێں کار ءَ منّ اێں ءُ هر ردێں کار ءَ مه منّ اێں.
🔹 سیستانءُبلوچستان ءِ استاندار/گورنر شه «بودیگ ءُ پاکدستێں کارمستراں» کار گیت
مولانا عبدالحمید درّائێنت: مئے سۆگه په نۆکێں استاندار ءَ همێش انت که راج ءُ مذهب ءُ سیاد ءُ پاٹیانی دلگۆش ءَ مه کنت ءُ بس شه بودیگ ءُ پاکدستێں کارمستراں کار گیت. پچےکه اے چیز هم حکومت ءُ هم مردمانی سۆب ءَ انت.
🔹 سیستانءُبلوچستان ءِ مردماں گۆں همدلی ءُ یکویی ءُ پله‌مرزی شه استاندار ءَ ملک ءِ مشکلان ءَ جۆڑ کن انت
زاهدان ءِ آدێنگ ءِ امام ءَ گوشت: دمگی استاندار ءِ کارگرگ وارے تاں استان ءِ مردماں گۆں همدلی، یکویی ءُ پله‌مرزی شه استاندار ءَ که شه آوانی جند ءَ انت ءُ هاسێں اختیار ءِ واهند انت، ڈیه ءِ مشکلان ءَ گێشءُگیوار کن انت. منی دیدانک همێش انت که اے کارگرگ ءُ دگه کارگرگاں که ماں اے استان ءَ یا دگه استاناں بوهگ ءَ انت، مردمانی همدلی ءُ یکویی ءِ سر ءَ باز اثر دار انت.
واجه ءَ گوشت: سیستانءُبلوچستان ءِ مردماں یکے انت، بلوچ ءُ سیستانی ءُ شیعه ءُ سنی نه دار اێں. همےچیز هژدری انت که گۆں همدلی ءُ همگرنچی ءَ دمگ ءِ مشکلان ءَ جۆڑ کن انت ءُ استان ءَ دێمروی ءُ دۆستی ءِ نێمگ ءَ تێلانک دےانت. واجه پزشکیان ءِ سرکار ءَ هماپێم که وعده کرتگ جنێن ءُ راجانی میانجین ءِ نابرابریان ءَ دور کنت.
🔹 سیستانءُبلوچستان ءَ مالزانشتی مسائلانی باروا «هاسێں دلگۆشے» پکار انت
زاهدان ءِ آدێنگ ءِ امام ءَ گوشت: مئے لۆٹ اێش انت که تیوگێں ملک ءِ مالزانشتی مسائلاں دلگۆش به بنت، بلێں سیستانءُبلوچستان ءَ هاسێں دلگۆشی بیت، پچےکه اد ءَ بازێں مشکلے هست انت. ماں دریاب‌کر ءِ ڈیه ءُ آزاتێں ڈیه ءُ استان ءِ ته ءِ معدناں بائد انت دمگی مردمانی سۆباں دێماتر به انت، اێرنگ مه بیت که پهکێں سۆب ءُ نپاں هاسێں مردم ءُ کارگسانی کیتۆ ءَ مه رو انت.
زاهدان ءِ جمعه ءِ خطیب ءَ گوشت: سیمسراں هم پچ کنگ به انت ءُ کارمستراں په امنیت ءَ دلگران مه به انت، بلکه آوانی گڑتی مردم به انت. گامانے که مردمانی نێمگ ءَ زورگ به انت امنیت ءِ سوب به انت. پێسر ءَ په امنیت ءِ دارگ ءَ دگه رهبنداں آزمودگ بوتگ انت، بلێں مردمانی وشنودی ءِ کٹگ ءَ په امنیت ءَ جواب داتگ.
🔹 مردم ءُ پهازۆکی واکاں دوئێناں بائد امنیت ءَ سات انت
مولانا عبدالحمید دێمتر ءَ په «امنیت ءِ پهازگ ءَ» سک سۆگه کرت ءُ گوشتء: من دلجم آں که سیستانءُبلوچستان امنیت ءِ نێمگ ءَ روان انت. ناامنی ءُ مردمانی کُشگ هچ کس ءِ سۆب ءَ نه انت ءُ مردم ءُ حکومت ءُ سرکار شه امنیت ءَ سۆب بر انت.
واجه ءَ سک سۆگه کرت: مردم ءُ پهازۆکی واکاں ءُ سجهێں پاٹیاں امنیت ءَ سات انت. پهازۆکی واکاں په سار به انت که ماں دگ ءُ مێتگاں بےمیارێں مردماں شه آوانی نێمگ ءَ کشگ مه بنت ءُ مردم هم امنیت ءَ دار انت که هچ کس ءِ سر ءَ بێڑے مه بیت. اگاں کسے را مشکلے هست گڑا شه کانودی ءُ شرعی ءُ میان‌استمانی راهاں آیرا رندگیری کنت.
🔹 امێت دار اێں که سیستانءُبلوچستان «امنیتی ءُ لشکری بنجل» ءِ بدل ءَ «کارجاهی» ڈیهے بیت
مولانا عبدالحمید تچکاتچک گوشت: امێت دار اێں که سیستانءُبلوچستان «امنیتی ءُ لشکری بنجل» ءِ بدل ءَ «کارجاهی» ڈیهے بیت ءُ گۆں کارجاه ءُ کارخانهانی جۆڑێنگ ءَ مردمانی کٹءُکار جۆڑ به انت. گۆں کته‌کاری ءُ زانتے که من شه اے ڈیه ءَ دار آں، گوش آں که اگاں شما مردمانی سۆبانی نێمگ ءَ گامگێج کن ات، گڑا دلجم به ات که مردماں وت امنیت ءَ سات انت.
🔹 ملک ءِ ءُ استان ءِ مردماں لهتێں گوستگێں ملکاریانی برجاہ دارگ ءِ سر ءَ آزگ‌سما/ حساس انت؛ اے ملکاری بدل کنگ به بنت
شیخ‌الاسلام مولانا عبدالحمید گوشت: لهتے ملکاری انت که شه انقلاب ءِ اول ءَ تاں نون برجاه انت ءُ سوب بوتگ انت ملک ءُ مردمان ءَ چَٹی/ نقصان رس ایت. چۆشێں ملکاریاں بائد انت بدل به انت. اے چیز حکومت ءُ مردمانی سۆب ءَ انت. حکومت دلجم بیت که اگاں مردمانی لۆٹان ءَ منّ ایت هچ نقصانے نه گند ایت.
مولانا عبدالحمید ٹکاٹک گوشت: من اے گپ ءَ په ستک گوش آں که الله ءُ مردمان ءَ سک دلگۆش کن ات، پچےکه اے چیزاں سک باز المی انت ءُ ما اے دوئێں بُنداراں گۆں پنجگ ءُ دنتاناں به داریں ءُ په سار به اێں که «خدا» ءُ «مردمان» ءَ گار مه کن اێں.
چمشانک