شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (24 آذر 1402/ 15 دسمبر 2023) گۆں ترۆندێں انتقاد ءَ شه اسرائیل ءِ جنایتاں ماں غزه ءَ، سک سۆکه ئِے کرت که میان استمانی هۆربنداں فلسطین ءِ بنگپ ءَ گۆں گۆں آمید ءَ گێشءُگیوار کن انت.
🔹غزه ءِ جنگ، بێرانکنۆکێں جنگے
په سنیآنلاین ءِ سرهال ءَ شیخ الاسلام مولانا عبدالحمید درشان کرت: ما پهکان شه غزه ءِ مردمانی جاور ءَ سهی اێں. ابید شه آ جنگاں که ماں آوان جوهری سلاه کارمرز بوتگ انت، هچ کس غزه ءِ جنگے رازے بێرانکنۆکێں جنگے را نه اشکتگ ءُ نه دیستگ انت.
واجه ءَ گێش کرت: اسرائیل شه وتی تیوگێں وس ءُ تۆک ءَ غزه ءِ مردمانی بگێر ءَ کارمرز کرتگ، آ پێم که نون اسرائیل ءِ پلهمرزاں هم شه آیی کرداراں ناوشنود انت. اسرائیل ءَ باز تندروی کرتگ ءُ ٹوهێں فاجعه جۆڑ کرتگ. اگاں شه اسرائیلیاں نزیک به هزارءُپنصد مردم کشگ بوتگ، بلێن اسرائیل ءَ ماں غزه ءَ نزیک به بیست هزار فلسطینی ءَ را کشتگ که گێشتری لس مردم بوتگ انت. پمێشا یهودیاں هم اسرائیل ءِ سر ءَ ایراد گپتگ ءُ ماں امریکا ءَ زهرشانی کرتگ.
واجه ءَ وتی هبرانی دێمتر ءَ گوشت: مئے لۆٹ شه میاناستمانی هۆربنداں ءُ دنیا ءِ تیوگێں آزات سسائێں مردماں همێش انت که هچ کس ءِ پلهمرزی ءَ مه کن انت، وهدے کسے انسانی حقان ءَ پادمالیَ کنت بائد په ترندی اێرجنگ بیت.
🔹 هچ راهے ابید شه فلسطینانی زۆرگپتگێں ڈگارانی دیگ ءُ فلسطین ءِ جتائێں حکومت ءِ جۆڑ کنگ ءَ نه انت
زاهدان ءِ آدێنگ ءِ امام ءَ ٹکاٹک گوشت: نون په گرداں درا بوتگ که هچ تۆجیلے ابید شه فلسطینیانی زۆرگپتگێں ڈگارانی دیگ ءُ فلسطین ءِ جتائێں حکومت ءِ جۆڑ کنگ ءَ نه انت. اسرائیلی ءُ فلسطینی ءُ دنیا ءِ تیوگێں مردماں اے چیز ءَ سرپد بےانت که اے پاکێں ڈگار ءِ مردماں گۆں وت پرایمنێں زندگی ئے داشتگ بےانت، همدگر ءَ مه کش انت ءُ هلوچ مه کن انت ءُ همدگر ءِ گسان ءَ مه ڈالێن انت. بائد اے بنگپ گۆں آمید ءَ گێشءُگیوار بیت تاں هردو نێمگے مردماں گۆں سهل ءَ زندگی کن انت.
واجه ءَ گێش کرت: امریکا که اسرائیل ءِ بےسرءُسۆجێں پلهمرز انت ءُ اسرائیل ءَ زر ءُ سلاه داتگ، نون باید آیی رڈێں کارانی دێم ءَ گیت. اروپا ءُ رۆاێرشتی زۆرآوراں ءُ ٹوهێں حکومتاں بائد اے بنگپ ءَ گێشءُگیوار کن انت، اے پهکێں استمانانی لۆٹ انت.
🔹وتی همدردی ءَ گۆں راسک ءِ پێشامد ءِ شهیدانی لۆگماناں درشانَ کن اێں
🔹استان ءِ امنیت ءِ ساتگ باز هژدری انت
زاهدان ءِ آدێنگ ءِ امام ءَ ماں دگه بهرے شه وتی هبراں به راسک ءِ پێشامد ءَ اشاره کرت که سلاهبنداں راسک ءِ واکانی بنجل ءِ سر ءَ بێڑ برت ات. واجه ءَ گوشت: پێشامدے که ماں راسک ءَ کپت ما را باز دلگران ئِے کرت ءُ ما شه اے پێشامد ءَ بژنیگ اێں. آ پێشامد ءِ شهیدانی لۆگمانان ءَ تسلا دےاێں ءُ وت را گۆں آوانی غم ءَ هوار زان اێں.
واجه ءَ گێش کرت: استان ءِ امنیت ءِ ساتگ باز هژدری انت. ما پهکێں پاٹی ءُ رمبان ءَ سۆگهَ کن اێں که امنیت ءَ سات انت.
🔹«راستی» یکے شه اخلاق ءِ ٹوهترێں براهاں ءُ رکگ ءِ مهمێں بنداراں انت
شیخالاسلام مولانا عبدالحمید وتی هبرانی گڈی بهر ءَ ماں زاهدان ءِ آدێنگ ءِ نماز ءِ دیوان ءَ «راستی» ءَ را شه اخلاق ءِ مهمێں بنداراں په رکک ماں دنیا ءُ آخرت ءَ زانت ءُ پهکان ءَ په «راستی ءُ امانتداری ءِ کمار ءَ» ءُ «پهرێز شه بَنڈانی رهبنداں» سک سۆگه کرت.
مولانا عبدالحمید تچکاتچک گوشت: درۆگ په تیوگێں مردماں بد ءُ ناپسند انت، بلێن په پاگواجه، پسءُماس، اسپےریش ءُ کارمستراں بدتر ءُ رڈتر انت، پچے که آوانی سر ءَ برۆسه هست.
واجه ءَ درشان کرت: راستی باز هژدری ءُ اثر دار انت. ما پهکاں بائد صداقت ءُ راستی داشته به اێں. مردمانی آبرو ءُ برۆسه گۆں راستی ءَ ساتگ بیت ءُ اگاں مردم درۆگ بند ایت وتی آبرو ءَ باهێن ایت. منی سۆگه به پهکێں پاٹیاں همێش انت که مدام راستگوش ءُ امانتدار به ات ءُ شه مردمانی حقانی پادمالی ءَ سک پهرێز کن ات.
چمشانک