شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (21 مهرماه 1402/13 اکتوبر 2023) ءَ گۆں اشاره به فلسطین ءُ اسرائیل ءِ جنگ ءَ «پرعدل ءُ آمیدێں منگنامه» ءُ «فلسطین ءِ جتائێن حکومت گۆں قدس ءِ بنجاهی» ءَ را گهترین تۆجیل په اے هپتادءُپنچ سالگێں جنگ ءُ جێڑه ئانی بند کنگ ءَ زانت.
🔹فلسطین ءِ پێشامد ءَ تیوگێن دنیا ءَ را جسکێنتگ
🔹فلسطین ءُ اسرائیل ءِ گێشتری پله‌مرزاں وتی جندے سۆبانی پد ءَ انت
په سنی‌آنلاین ءِ سرهال ءَ شیخ الاسلام مولانا عبدالحمید درشان کرت: فلسطین ءِ بےرحم ءُ دلبرێجۆکێن جنگ ءَ پهکێن دنیا ءَ را جسکێنتگ. انچێن پێشامد اۆد ءَ بیگ انت که هر آگاه ئێں مردمے که ذره ئے انسانیت داشته بیت گۆں آوانی گندگ ءَ جسک ایت.
واجه ءَ گێش کرت: هپتادءُپنچ سال انت که اسرائیلی ءُ فلسطینی جێڑه انت ءُ ارمان که تاں نون اے جێڑه گێش ءُ گیوار نه بوتگ ءُ هردو نێمگ کوشست کن انت تاں یکدگر ءَ زیان کن انت. هرچۆن که کوشست بوتگ تاں صلح کن انت بلێن پرێشی که لهتے شه مزنێن حکومتاں شه اسرائیل ءَ ءُ لهتے شه سست ترێن حکومتاں شه فلسطین ءَ پله‌مرزی کرتگ اے کوشستاں بےپوک بوتگ انت.
زاهدان ءِ آدێنگ ءِ امام ءَ درشان کرت: گێشتری حکومتاں که شه اسرائیل ءَ یا شه فلسطین ءَ پله‌مرزی کرتگ وتی جندے سۆبانی پد ءَ بوتگ انت. فلسطین یکے شه استراتژیک ءُ مهمێن ملکاں انت ءُ آوان که شه اسرائیل ءَ پله‌مرزیَ کن انت لۆٹ انت شه اے راه ءَ ماں میان رۆدرهت ءَ به وتی سۆبان رس انت. شه دگه نێمگے فلسطین ءِ سستێن پله‌مرزاں هم وتی سۆبانی پد ءَ انت، باز کم انت آ حکومتاں که په دلسۆچی شه فلسطین ءَ پله‌مرزیَ کن انت. اگه اے پله‌مرزیاں په الله ءِ خاطر ءَ بوتێن انت اے جێڑه چنکه دهگ دێم ءَ گێش ءُ گیوار بوت.
🔹په ما انسانیت هژدری انت؛ هردو نێمگ بائد جنگ ءِ میان استمانی کانودان کمار کن انت
واجه شیخ‌السلام درائێنت: په ما انسانیت هژدری انت؛ ما مسلمان اێں بلێن حق ءُ آمید ءِ دۆزواه اێں. ما چم بستک ءَ شه کسے پله‌مرزیَ نه کن اێں. ترندی ءُ جنێن ءُ زهگانی کشگ شه هر نێمگے که بیت رد انت ءُ ما آیرا نه من اێں. ماں اسلام ءِ شریعت ءَ ءُ همےرنگ ماں میان‌استمانی کانوداں جنگ دابے دار ایت. اگه مسلمان اسلامی ءُ میان‌استمانی جنگ ءِ کانودانَ کمار مه کن انت گڑا ما شه آوان پله‌مرزیَ نه کن اێں. هم فلسطینی ءُ هم اسرائیلیاں نه بائد جنگ ءِ میان‌استمانی کانودان نادلگۆش کن انت.
🔹پچے فلسطین ءِ هپتادءُپنچ سالگێن جێڑه حل نه بیت ؟!
🔹دنیا ءِ مردماں یک‌نێمگی ئێں پله‌مرزیانی بدل ءَ مدد کن انت تاں فلسطین ءِ مشکل جۆڑ بیت
زاهدان ءِ آدێنگ ءِ امام ءَ گێش کرت: اے منی گپاں نه کسے ءِ جواب انت ءُ نه کسے شه من لۆٹتگ که اے گپانَ جن آں؛ بلکه لهتے گواچنی گپان بیان کن آں، بیت‌کنت بازێنے شه مسلماناں هم شه اے گپاں وشنود مه بےانت، بلێن من لۆٹ آں هبرے را که آیرا حق ءُ په انصاف زان آں، درشان ئِے کن آں. یهودی ءُ فلسطینی دو استمان انت که کم‌ته‌کم هپتادءُپنچ سال انت که گۆں وت همسایگ انت هرچۆن هردوئاں شه همدگر ءَ لٹ وارتگ ءُ لٹے که فلسطینیاں وارتگ سک تر بوتگ، پچےکه اسرائیلیانی سامان ءُ امکانات گێشتر بوتگ انت ءُ مسلمانانی جتگ. منی گپ اێش انت که اے دو استمان تاں کدێن لۆٹ انت گۆں وت جنگ کن انت؟! آ نبائد وتی زهگ ءُ پدرێچانی پکر ءَ بےانت تاں گۆں تاهیر ءَ زند گوازێن انت؟! پچے هپتادءُپنچ سالگێن جێڑه ئاں که ماں اے مقدسێن ڈگار ءَ هست، گێش ءُ گیوارَ نه بیت؟!
زاهدان ءِ جمعه ءِ خطیب ءَ گوشت: هردو نێمگ باید په تۆجیلے پکر کن انت؛ پرێشی که به عادلانه ئێں تۆجیلے رس انت بائد بازێن چیزے را یله دےانت. اێشی بدل ءَ که مسلماناں په یهودیانی زیان کنگ ءَ ءُ یهودیاں په مسلمانانی در کنگ ءُ آوانی شهرانی بێران کنگ ءَ پکر کن انت، بائد گۆں وت نند انت ءُ دنیا ءِ مردماں هم شه آوان پله‌مرزی کن انت تاں آوانی جێڑه گێش ءُ گیوار بیت.
واجه ءَ درشان کرت: ماں اسلام ءِ راجدپتر ءَ واجه رسول الله صلّی‌الله‌علیه‌وسلم ءَ گۆں سک ترێں دشمناں که مکه ءِ مردم بوتگ انت، نشتگ ءُ صلح کرتگ ءُ همے سۆبمندی ءِ سبب بوت، درحالےکه مکه ءِ مردماں واجه رسول الله صلّی‌الله‌علیه‌وسلم ءُ صحابه ئانَ شه مکه ءَ درانڈیه کرت ات گۆں آوان جنگ اش کرت ات. فلسطین ءِ باروا هم بائد عادلانه ءُ منصفانه ئێں تۆجیلے درگێج اێں.
🔹فلسطین ءِ حکومت گۆں بیت‌المقدس ءِ بنجاهی ءَ جۆڑ بیت
مولانا عبدالحمید گوشت: شاید بازێنے شه اے هبر ءَ من ءَ اێر جن انت ءُ گوش انت که اسرائیل بائد بێران بیت، اسرائیلیاں شه دگه جایے آتگ انت ءُ بائد برگرد انت، بلێن گواچن اێش انت که نه مسلمانانَ توان انت اسرائیلیان زیان کن انت ءُ نه اسرائیلیانَ توان انت مسلمانان زیان یا در کن انت، اگه وس اش رستێن تاں نون اے کار ءَ اش کرت ات. وهدے اے کار بیگی نه انت پچے زۆر جن ات؟! پمێشا گۆں وت نند انت ءُ دو جتائێں ملک جۆڑ کن انت ءُ دو جوانێن همسایگ بےانت. اے منی دیدانک انت.
مولانا عبدالحمید شه میان استمانی گلاں لۆٹ ات که شهرانی بێران کنگ، هاس غزه ءِ بێرانے دێم ءَ گر انت. جنگ بےپۆک انت، هچ کس آدگرے زیان کنگے پکرا مه بیت، بلکه گۆں دورچاری ءَ آیۆکێن پدرێچانی زندگی ءِ سسا ءَ کن انت.
🔹چاگرد گۆں جبر ءُ زۆر ءَ اصلاح نه بیت؛ بائد مردمانَ قانع کن انت که دین ءِ سر ءَ عمل کن انت
مولانا عبدالحمید وتی هبرانی گڈسر ءَ گۆں اشاره به ملک ءِ مسائلاں گوشت: ماں قرآن مجید ءَ الله پاک ءَ درائێنتگ که دینے تها هچ جبرے نێست. هدایت گۆں منانک ءَ بیان بوتگ، پمێشا الله پاک ءَ واجه رسول الله صلّی‌الله‌علیه‌وسلم ءُ آیی صحابیانَ امر کرتگ که حق نه دار ات په زۆر مردمانَ مسلمان کن ات. واجه ءَ گوشت بائد مردمانَ قانع کن اێں تاں دینے احکامانی سر ءَ عمل کن انت نه که په زۆر آوان لاچار کن اێں. گهترێن راه همێش انت که آمید ءُ برابری ءَ مردمانی میانجین ءَ اێر دار ات.
واجه ءَ همےرنگ به هرات ءِ زمین چنڈ ءَ اشاره کرت ءُ سۆگه ئِے کرت که آوان مدد کن انت.
چمشانک