مفتی محمدقاسم قاسمی، ماں زاهدان ءِ جمعه نماز ءِ دیوان ءَ (13 مرداد 1402) مسلمانانَ سک سۆگه کرت که شه اسلام ءِ حکماں پوره پدگیری کن انت ءُ گوشت ئِے الله پاک شه مسلمانانَ لۆٹ ایت که داخل به ات ماں اسلام ءَ پوره ءُ اسلام ءِ پهکێن حکمانی سر ءَ عمل کن ات.
په سنی‌آنلاین ءِ سرهال ءَ مفتی محمدقاسم قاسمی پد شه اے آیه ءِ وانگ ءَ: «يَا أَيُّهَا الَّذِينَ آمَنُوا ادْخُلُوا فِي السِّلْمِ كَافَّةً وَلَا تَتَّبِعُوا خُطُوَاتِ الشَّيْطَانِ إِنَّهُ لَكُمْ عَدُوٌّ مُبِينٌ» [بقره: 208]، درشان ئِے کرت: الله پاک ایماندارانَ، بزاں آوان که شه «کفر» ءُ «شرک» ءُ «بنڈ» ءَ دور بوتگ انت، گوش ایت که ماں اسلام ءَ پوره داخل به ات ءُ پراستی ئێں مسلمان به ات. انچێن مسلمان هم هست که لهتێن حکمانی سر ءَ عمل کن انت.
مفتی صاحب ءَ گێش کرت: مفسر ءُ پاگواجهاں گوشتگ که اسلام پنچ نام‌پرشتێن ٹال دار ایت؛ عقیده، عبادت، سوداگری، معاشرت ءُ اخلاق. اے پنچ چیز بائد اسلامی ءُ قرآن ءُ سنت ءِ رد ءَ بےانت. مئے عبادتاں بائد په الله ءَ ءُ قرآن ءِ رد ءَ بےانت. مسلمان ءِ سۆداگری هم بائد اسلامی شریعت ءِ رد ءَ بیت. معاشرت ءُ زندگی ءِ رهبند ءُ کردار گۆں لۆگمان ءُ همسایگ ءُ سیاداں ءُ دگه پاٹیاں هم بائد اسلامی بےانت. واجه رسول الله صلّی‌الله‌علیه‌وسلّم ءَ ماں حدیثے درائێنتگ: «المسلم من سلم المسلمون من لسانه و یده» پوره ئێن مسلمان کسےانت که آدگه مردماں شه آیی دست ءُ زبان ءَ رنج ءُ آزار مه گند انت. بائد مئے اخلاق هم اسلامی ءُ قرآنی بیت.
دارالعلوم زاهدان ءِ فقه ءُ حدیث ءِ استاد ءَ گێش کرت: اگه هر مسلمانے یکے شه اے پنچ چیزانی سر ءَ عمل مه کنت آ پوره ئێن مسلمانے نه انت. مسلمانے که زرشۆدی کنت، مۆک بوارت، ماں سۆداگری ءَ حلال ءُ حرام ءَ هۆر کنت، ظلم کنت ءُ … اێشی بزانت اێش انت که آ پوره ئێں مسلمانے نه انت ءُ الله هم چشێن مسلمان ءَ دۆست نه دار ایت. الله پوره ئێن مسلمان ءُ پوره ئێں اسلام لۆٹ ایت.
مولانا محمدقاسم گوشت: الله پاک ماں مبارکێن سوره بقره ءِ اۆلی آیاتاں «مسلمان (پهریزکار)»، «کافر» ءُ «منافقانی» صفتان بیان کنت. اۆد ءَ الله منافقانی صفتانی باروا گێشتر شه آ دۆ پاٹی دگر ءَ گپ کنت، پچےکه همے منافقاں گێشتری ٹپان مسلمانان ءُ اسلام ءَ جتگ. ارمان که مرۆچی مسلمانانی کردار ءُ اخلاق ءُ سۆداگری ءُ زندگی ءِ رهبنداں سبب بوتگ انت که بےایماناں مسلمان مه بےانت.
مفتی صاحب ءَ گێش کرت: ما مسلماناں بائد مدام ءُ هرجا ءُ هر وخت مسلماں به اێں. اگاں مئے سۆبمندی گۆں نقصان ءَ دێم‌په‌‌دێم بوت انت، اگاں مئے لۆگمان ءُ سیاداں گۆں جٹی ءَ آماچ بوت انت، اگاں زرے رست یا بیهار دیگ بوت اێں، انگت بائد مسلمان مان اێں. مزن‌زانت ندوی رحمه‌الله ماں آیه «یَا أَيُّهَا الَّذِينَ آمَنُوا ادْخُلُوا فِي السِّلْمِ كَافَّةً» ءِ تفسیر ءَ گوش ایت: «السِّلم» دۆ بزانت دار ایت: «اسلام» و «صلح»؛ بزاں پوره مسلمان به ات یا اگه الله ءِ حکمانَ نادلگۆش کرت ات که اے یک رنگێن جنگے گۆں الله ءَ گڑا گۆں الله ءَ «صلح» کن انت ءُ شه شیطان ءَ پدگیری مه کن ات.
🔹آوان که قرآن ءِ بےشرپی ءَ کن انت لۆٹ انت مسلمانانی ایمان ءُ کردار ءَ آ پاکێن کتاب ءِ باروا سنج انت
درالعلوم زاهدان ءِ دارالافتا ءِ سرمستر ءَ گوشت: آوان که الله ءِ کتاب یا واجه رسول الله یا صحابه ئانی بےشرپی ءَ کن انت دو مراد دار انت؛ یا لۆٹ انت مسلمانانی ایمان ءُ غیرت ءَ آزمود کن انت یا گۆں مسلمانانی کردارانی گندگ ءَ گت کن انت که شه قرآن ءَ دور بوتگ انت ءُ آیی حکمانی سر ءَ عمل نه کن انت.
مفتی صاحب ءَ گێش کرت: ما آ بدێن کردار ءَ سک اێر جن اێں ءُ جهد کن اێں نۆکێن دیدے قرآن ءِ باروا داشته به اێں ءُ گۆں جان ءُ مال ءَ قرآن ءِ هزمت ءَ کن اێں. من شه پهکێن پاگواجهانی نێمگ ءَ شه شما لۆٹ آں که هررۆچ قرآن ءَ بوان ات ءُ آیی حکمانی سر ءَ عمل کن ات. مهتر عمر رضی‌الله‌عنه قرآن ءَ را وتی سێنگ ءِ سر ءَ هشت ءُ گوشت ئِے: اے الله ءِ کتاب ءُ پنت انت ءُ وشبهتی ءُ عزتے کتاب انت. مهتر عثمان رضی‌الله‌عنه ءَ مدام قرآن ءَ تلاوت کرت ءُ گوشت ئِے: دلے که سالم بیت شه قرآن ءِ وانگ ءَ سێر نه بیت.
🔹«ندای اسلام» تاکبند ءِ سرشۆنکار ءَ وتی هبرانی گڈی سر ءَ گوشت: رندگیریاں زاهدان ءِ هۆنێن جمعه ءِ باروا روان انت. آ شهید ءُ ٹپیانی لۆگماناں که انگت وتی پروندهانَ پوره اش نه کرتگ په سرءُسۆج ءَ دارالعلوم ءَ بیا انت. امێت دار اێں که کارمستراں هم اے پروندهانی کاران زوت جۆڑ کن انت.
استاد قاسمی همےرنگ پاکستان ءِ علمای اسلام ءِ دیوان ءِ تراک ءَ را سک اێر جت ءُ په آ پێشامد ءِ شهیداں دعای مغفرت ءُ په ٹپیاں جاندراهی ءِ دعای کرت.
چمشانک