مروچی :دوشنبه, ۴ تیر , ۱۴۰۳

بلوچ کلب بھرن (نادی البلوش بحرین)

بلوچ کلب بھرن (نادی البلوش بحرین)

سید گْوش اِیت

دژمن پہ تئی زبان ءَ اگرب ءُ پَور اِنت
تو ئے بے وتیں دیندار ءِ تئی دینکار


یا چوش کہ
تئی راج ءُ زبان ھر دو شت اَنت زرّ ءِ وڑالاں
پہ بنگان ءُ پہ بنگانی گلاں کُرتگیں بیگار


بلوچ کلب بھرن ءِ بُنھشت 1973 ءَ ماں (دلمون) بزاں کہ بھرن ءِ بُنجاھی شھر منامہ ءِ دلبند ءِ سر ءَ چو کوہ ءِ البُرز ءَ مِک کنگ بوت۔ بھرن ءِ ھاکم ءُ واکداراں مار اتگ اَت کہ بلوچ یک جتائیں راجے۔ آئی ءِ زبان، دود ربیدگ آئی ءِ دودمان چہ اے دگہ راجاں جتا اِنت۔ بلوچی لبزانک ءَ وت ءَ ارزشتے ھست۔ اے بنیاد ءَ بھرن ءِ مھروانیں ھاکماں بلوچ ءِ زبان ءَ لبزانک ءَ جتائیں ارزشتے دات۔ بلوچ راج ءِ نام ءَ کلبے ءِ منزوری دیگ بوت۔ من ھمے سرپد باں بلوچ کلب بھرن ءِ کُلّیں بلوچانی راجی مڈّی یے۔ ءُ اے درگت ءَ بھرن ءِ مھروانیں ھاکمانی زانت ءُ سما ءُ سسّا ستا کرز اِیت۔ چوناھا ماں ڈنّی مُلکاں کلب ملکانی نام ءَ جوڑ کنگ بنت۔ بلے اے اولی کلب اِنت کہ بلوچ راج ءِ نام ءَ جوڑ کنگ بیتگ بزاں کہ بلوچ راج ءَ را یک ملکے ءِ ارزشت دیگ بیتگ۔ بزاں بلوچ یک راجے ءُ بلوچستان یک ملکے منّگ بیتگ۔ ھمے واست ءَ بلوچ کلب بھرن جتائیں بستارے ءِ واھند اِنت۔ بلوچ ءِ مُلک، زبان ءُ دود ربیدگاں وت ءَ بستارے ھست۔ اے بلوچ ءِ تپاکی ءِ، سوبمندی ءِ، جھدانی برورد اِنت۔ ملا پازل گْوش اِیت۔


وھدے کہ بیلانی بد ءُ سیاھی زیاد بیت
ماں ھزارانی تورم ءَ سیاہ مار ساد بیت


مرچی زانت ءُ زانگ بلاھیں ھزانگے۔ کہ ناں دُزّگ بیت ناں کہ زورانسری پُلگ بیت۔ ناں آس ئِے سوچ اِیت ناں آپ ئِے بارت۔ سید گْوش اِیت
بے پتّی ءُ بے سنّتی ءِ ھیل ءُ تب ءَ پْروش
توجیلّے بہ کن پْرشتگیں باسکاں پد ءَ تیمار
بوھیریں پکی ءِ گھیں سندلے امباز
تو سستگیں دستورے نہ ئے تُستگیں سالار


اے کلب ءِ دستور ءُ رھبند ءِ اندر ءَ سیاست نیست۔ زاتی پسند نا پسند نیست، زات ءُ زریات، دین ءُ مزھب ءِ دَرْک ءُ پرک نیست۔ گروھی ءُ الاکھی تئسب ھم نیست۔ اد ءَ بس زبان، لبزانک، دود ربیدگ، چاگردی جیڑھانی سر ءَ جھد کنگ بیت۔ ھرچ بلوچ اے کلب ءِ باسکے جوڑ بیت کنت۔ وانگ ءُ زانگ ءِ کلاس، لیب ءُ گوازی ءِ ساز ءُ سامان ماں اے کلب ءَ ھست اَنت۔ ورزش ءُ جاندْراھی ءِ سر ءُ سوج کنوک ھم ھست۔ وھد پہ وھد ءَ اد ءَ بلوچی دیوان ءُ مراگش ھم بنت۔ کلب ءِ واکدار سرپدیں سر اَنت۔ ازت داریں واجہ اَنت ھر یک ادیبے ءُ زانتکارے کہ بھرن ءَ رَوت، آئی ءِ شرپ ءَ دیوانے ایر کنگ بیت. آئی ءِ مھمان نوازی کنگ بیت۔ ازت ءُ شرپ دیگ بیت۔ ساز ءُ زیملی مراگش ھم بنت۔ بلوچ کلب ءَ بلوچی ءُ براھوی زبان دوئیں وانینگ بنت کہ باز جْوانیں گامگیجے۔ پرچا کہ بلوچ ءِ زبان دو اَنت بلوچی ءُ براھوی۔ اے دوئیں بلوچ ءِ زبان اَنت۔ ماں بھرن ءِ سالروچ ءِ درگت ءَ بلوچ کلب وتی دود ربیدگی ءُ وتی دستکاری ءُ ساز ءُ زیمل ءُ دو چاپی ءُ ناچ ءَ پیشدار اِیت کہ دری راج بلوچ ءِ اے مڈّیانی توسیپ ءُ ستا ءَ کن اَنت۔ بلوچ کلب وتی راجی پجّار ءَ دری راجانی دیم ءَ پیشدار اِیت۔


سید گْوش اِیت
ھانل ءِ مسکیں ڈگار ءَ چہ ابید
ھچ ودارانی وداریگ نہ باں


من سلام گْوشاں ھما بلوچ بامرداں، راجپھازاں کہ آیاں پہ کلب ءِ منزوری گرگ ءَ سک باز جھد کُتگ۔ آیانی جھدانی برورد اِنت کہ مرچی بلوچ ءَ ماں درملک ءَ وت ءَ یک مُنّویں ساھگے چو بلوچ کلب بھرن ءِ دروشم ءَ ھست اِنت۔ من ھمے سرپد باں کہ بلوچ کلب بھرن ماں درملکاں کُلّیں بلوچانی سپارتھانہ اِنت۔ بلوچ کلب ماں بھرن ءَ اولی کلب اِنت کہ کلب ءِ ماڑی ءُ کلب ءِ زمین کلب ءِ ملکیت اِنت۔ اے دگہ ملکانی کلبانی باڑہ ءِ زمین ءُ باڑہ ءِ ماڑی اَنت۔ اے کلب ءِ بنھشت ءِ ایر کنگ ءَ اے واجھانی جھد نمیران اَنت۔ چوش کہ میر گلام کادر، پَیز مھمد واڑیلا، ھوت پازل، واجہ ابد رھمان سَیکی، میر دادکریم، میر آبد ھسین، ابدلواھد مشتاک، ءُ دگہ بازینے ءَ ھم کُمک ءُ ھمکاری کُتگ۔ بلوچ کلب بھرن ءِ واکدار شرتر زان اَنت کہ کَے ءَ جھد کتگ۔ اگاں کسے ءِ نام من شمشتگ پھلّی لوٹاں۔ مروچیگیں کلب ءِ واکدار بلوچ راج ءِ پدریچ اِنت۔ ورنا اَنت کہ آیانی جھد ھم ستا کرز اَنت کہ وتی کماشانی جھد اِش دیم ءَ بُرتگ۔ اے بے زرّ ءُ مال ءَ کار ءَ اَنت۔ بزاں کہ بے پکار ءَ کار ءَ اَنت۔ وتی نوکری ءِ دزگٹّیاں چہ پد بلوچ کلب ءَ کا اَنت ءُ کلب ءُ بلوچ راج ءِ ھزمت ءَ کن اَنت۔ کہ آیانی جھدانی برورد اِنت کہ مرچی بلوچ کلب چو سالونک ءَ سمبھ اِتگ۔ وانگ ءُ زانگ ءِ ھم کلاس ھست۔ اد ءَ بچار کہ مئے کوھنیں لبزانک کار ءُ کواساں وانگ ءُ زانگ ءَ را چنچو ارزشت داتگ۔ ملا پازل گْوش اِیت


بیا اِت منی شاھی مھزبیں راجاں
یاد کن اِت منی گُڈّیگیں وسیّتاں
کشّ اِت کھن ءُ ءُ کِش اِت نکیلاتاں
یا کن اِت باپار ءُ تجارتاں
بوان اِت اِلم ءُ زیر اِت کراماتاں


گُڈ سر ءَ من گوں بھرن ءِ کُلّیں ازتداریں، شرپمندیں، کماش، واجہ ءُ بُزرگ ءُ ورنایاں دزبندی کناں کہ کلب ءِ باسک جوڑ بہ بنت۔ کلب ءَ یک شرّیں کساسے ءَ باسک ھست۔ بلے ھمینچو کہ باسک گیشتر بنت کلب ءِ ارزشت ھم ودّ اِیت۔ شُمئے ازت شمئے وتی دست ءَ اِنت۔
گُڈ سر ءَ چیزے بند ندر اِنت پہ باب البھرن ءِ ھور دْروشمانی نام ءَ
باب البھرن ءِ مھرنگاں
توتی زیملیں وش لبزاں
رکّ اِش بینگ ءِ مانند اَنت
ملگور اِش زباد درنز اَنت
راجانی تلاھیں ننگ اَنت
پاکیں دامن اِش سوگند اَنت
وھدے ناگھاں بچکند اَنت
ٹپیگیں دلاناں سند اَنت
آسیگ کن اَنت دلبنداں
مھر ءِ کرنیگیں نادراھاں
اشک ءِ گریشگ ءَ بیگواہ اَنت
وزمے ساز اِتگ ھاوند ءَ
پاکیں زُلجلال ءِ جند ءَ

تپاکی آجوئی ءِ مانزمان اِنت


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *