مروچی :جمعه, ۲۹ تیر , ۱۴۰۳
مولانا عبدالحمید ماں زاهدان ءِ جمعه نماز ءِ دیوان ءَ:

حکومت گۆں سلاه ءُ سلاه‌بندێں واکاں ساتگَ نه بیت

حکومت گۆں سلاه ءُ سلاه‌بندێں واکاں ساتگَ نه بیت

شیخ‌الاسلام مولانا عبدالحمید، ماں زاهدان ءِ جمعه نماز ءِ دیوان ءَ (2 دی 1401/ 24 دسمبر 2022) تچکاتچک گوشت: آشوب تاں وهدے مان ایت که مردم لۆٹ انت ءُ هر حکومتے مانگ ءِ راز اێش انت که مردمانی توار ءَ گۆش دار ایت ءُ آوانَ وشنود کنت.

په سنی‌آنلاین ءِ سرهال ءَ مولانا عبدالحمید درشان کرت: من مدام گوشتگ ءُ شه دگران هم اشکتگ که اسلامی زرمبش ماں سال 57 ءَ گۆں مردم، پاگواجه، واننده ءُ سۆداگرانی پله‌مرزی ءُ جنز ءَ سۆبێن بوت. مردماں گۆں خمینی ءِ رهشۆنی ءَ چست بوت انت ءُ گۆں یکویی ءُ هم‌تپاکی ءَ سۆبێن بوت انت. اے آشوب نه گۆں کودتا ءُ سلاه ءَ بلکه گۆں مردمانی پله‌مرزی ءُ جنز ءَ په آزاتی، عدالت ءُ رۆزیگی جاورے بدل بیگ ءَ سۆبێن بوت. مدام گوشگ بوتگ که آشوب تاں وهدے مان ایت که  مردم لۆٹ انت ءُ حکومت هم تاں وهدے مان ایت که مردم آیی پله‌مرز بےانت.

واجه ءَ زهرشانی کنۆکانی تیرکێل کنگے باروا گوشت: الله پاک ءَ گوشتگ: هرکسے بکشیت کسے را بغیر شه قصاص ءَ گڑا چۆ بوت که آیی درستێن مردم کشتگ ءُ هرکسے که بچێنیت کسے  را شه کشگ ءَ گڑا چۆ بوت که آیی درستێن مردماں زندگ کرتگ. چنکه اے گالرد جوان انت. شاید ماں آدگه رسم ءُ کانوداں که مردماں جۆڑ کرتگ چشێن چیزے مه بیت که ماں قرآن ءَ هست. وهدے مردمے کشگ بیت قتل ماں دنیا ءَ رسم بیت. بازێن کارے انت که  سکّ انت، بلێن وهدے کسے آیرا کنت گڑا په دگران هم آسانَ بیت ءُ پهکان گوش انت ما پچے مه کن اێں! وهدے کسے را شه قتل‌ءَ بچێن ات شه قتلے رسم بیگ ءَ دێمداری کرتگ ات.

🔹  سنگے بدل تیر نه انت

زاهدان ءِ جمعه ءِ امام ءَ افساد فی الارض ءَ را راهزنی ءُ سلاه‌بندێن جنگ زانت ءُ گوشت ئِے: بائد کسے که زهرشانیَ کنت ءُ مشکلے دار ایت، گپ ئِے دلگۆش بیت. ما ایران ءِ مردماں یکے اێں. تیوگێن استماناں ملکی هم‌تپاکی دار انت ءُ هم‌تپاکی ءِ آسرال ملکی امنیت انت. سلاه‌بندێن واکاں ءُ ذمه‌واراں ءُ پهکێن استمان ایرانی انت، بائد همدگرے حقانَ کمار کن اێں. نه مردمانَ مۆکل هست که واکانَ کش انت ءُ نه واکانَ مۆکل است که مردمانَ کش انت. ما پهک ایرانی اێں ءُ مئے هۆن یکے. کسے که سنگ ءُ لٹے دست ءَ دار ایت، آیی بدل تیر نه انت. واجه ءَ گوشت: گۆں کشگ ءُ پاهو دیگ ءَ مشکلاں گێشترَ بےانت ءُ ما نقصانَ گند اێں.

🔹 اسلامی حکومت تاں آ وهد ءَ جوان انت که گێشترێن مردم آیرا لۆٹ انت

مولانا عبدالحمید گۆں «دین» ءُ «دینی حکومتے» گستائی ءَ شه هم گوشت: دین شه دینی حکومت ءَ دێمتر بوتگ. هژدری ئێں ٹک دین‌ ءِ پهازگ ءُ مانگ انت. نبائد دین په حکومت ءَ ندر بیت. بلکه حکومت په دین ءَ ندر بیت. بائد په دین ءِ پهازگ ءَ جهد بیت پچےکه دین پێسر شه حکومت ءَ بوتگ ءُ شه حکومت ءَ پد همَ مان ایت. اسلامی حکومت تاں آ وهد ءَ جوان انت که گێشترێن مردم آیرا لۆٹ انت. آگاں آمید ءُ آزاتی بوتێن ءُ مردمانی لۆٹاں دلگۆش بوتێن انت اسلامی حکومت تاں صد سال ءَ گێشتر همَ منت. واجه رسول الله صلّی‌الله‌علیه‌وسلّم ءَ ده سال حکومت کرت ءُ اگاں حکومت کنگ هژدری بوتێن الله پاک ءَ واجه رسول الله صلّی‌الله‌علیه‌وسلّم ءَ‌ را صداں ءُ هزاراں سال عمرَ دات تاں حکومت کنت. اسلامی حکومت مهم نه انت، بلکه آزاتی ءُ آمید ءُ مردمانی وشنودی مهم انت. مهتر علی درائێنتگ حکومت په من لڈے ارزشت نه دار ایت. مهتر علی ءُ خلفای راشدێناں گۆں ناداری ءَ حکومت کرت ءُ زرءُمال مچ اش نه کرت، بلێن نمونگ بوت انت.

🔹 گۆں 40 هزاری ئێں ڈالر ءَ مزن‌سسائاں واتر نه بنت

مولانا عبدالحمید مزن‌سسائانی لڈگے باروا گوشت: هر استمانے ٹوهترێں هنتکان وسی ئێں مردم انت.  ازم‌کار، مزن‌زانت ءُ کاربلداں مئے هنتکان انت. دێمرئوکێں ملکاں گۆں استمان ءَ دێمرئی کرتگ. مئے ملک ءَ په علم ءُ زانت ءَ هرچ کرتگ، بلێن بازێنے شه واننده ءُ بودێن مردماں شه ملک ءَ لڈتگ ءُ دگه ملکانَ آبادَ کن انت. آ ملک ءِ هنتکان انت، ملک په  دێمروی ءَ به آوان وازمندگ انت ءُ آوان بائد واتر بےانت، گۆں 40 هزاری ئێں ڈالر ءَ آ واتر نه بنت. بائد اقتصاد جۆڑ بیت ءُ اے هما چیزے که مردماں ماں دگاں آیرا جارَ جن انت.

🔹 اۆگانستان ءِ جنێنانی درس وانگ تیوگێن اسلامی پاگواجهانی لۆٹ انت

مولانا عبدالحمید گۆں نگد شه طالبانی حکم ءَ په مکن شه اۆگانستان ءِ جنێنانی درس وانگ ءَ، گوشت ئِے: بودێن جنێنان استمان ءِ هنتکان انت. ادا من اے چیز ءَ گوش آں ءُ شه امارت اسلامی ءِ سرۆکاں لۆٹ آں که مۆکل دےانت اۆگانستان ءِ جنێناں مزن‌شهدربرجاه ءَ برۆ انت ءُ درس بوان انت، اے تهنا اروپایی ءُ امریکاییانی لۆٹ نه انت، بلکه تیوگێن اسلامی پاگواجهانی لۆٹ انت. ماں علم ءُ زانت ءَ مرد ءُ جن برابر انت ءُ هردو بائد علم کٹ انت. ایران ءُ اۆگانستانے آبادی گۆں مردماں بیت، مردماں بائد علم کٹ انت تاں ملک دێمرئی کنت، اے مئے پهکانی گڑتی انت تاں جنێناں توان انت درس بوان انت.

🔹 لهتێنے گوش انت ولی‌امرَ توانت هر حکمے دنت!

🔹 هچ ولی‌امرے نه توانت بےشریعت ءِ حکم ءَ، په کشگ ءَ امر کنت

زاهدان ءِ جمعه ءِ امام ءَ بندیگانی باروا گوشت: مئے سۆگه اێش انت که ترۆندیانَ هلاس کن ات، پاهو، محاربه ءِ بِنڈ یا انچێن سزا ءُ لٹءُکٹاں که ماں بندیجاهانَ بےانت ءُ گوشتن اش سک انت، هلاس بےانت. من برے پگر کن آں که کے چشێن چیزانی مۆکل ءَ داتگ، اسلامی شریعت وت کانود دار ایت. حاکم ءُ قاضی ءُ ملک ءِ ذمه‌واراں اسلامی کانودے رد ءَ کرد کن انت. هچ ڈهدارے را مه جن انت ءُ په زۆر شه آیی اُستُه گرگ مه بیت. کسے که دگرے را نه کشتگ ئِے، کشگ مه بیت.

واجه ءَ گوشت: هچ حاکمے نه توانت شه الله ءِ حکماں برزترێن حکمے دنت، مئے ملکے تها برزترێن چیز کانود انت، کسے نه توانت کانودے هلاپ ءَ حکم دنت. من برے بهمانگ باں که لهتے گوش انت ولی امرَ توانت هر حکمے دنت! ماں اهل‌سنت ءِ عقیده ءَ چشێن چیزے نێست. اهل‌سنتانی عقیده ءِ رد ءَ حضرت رسول صلّی‌الله‌علیه‌وسلّم که ٹوهترێن واجه انت نه توانت شه وتی نێمگ ءَ حکمے دنت، مگه وحے بیت. مئے عقیده‌ءِ رد ءَ هچ ولی امرے نه توانت شریعت ءِ هلاپ ءَ کسے ءِ قتل ءِ حکم ءَ دنت.

🔹 سپاهیگانَ ماں سربازجاهاں دار ات

مولانا عبدالحمید گۆں اشاره به زاهدان ءِ هۆنێن جمعه ءِ پێشامد ءَ گوشت: ما بهمانگ اێں که پچے مردمے که په نماز ءَ آت ات انت، کشگ بوت انت! زاهدان ءِ مردماں مدام منا گوش انت که آ پێشامد ءَ رندگیری کن ات. دیوانے برجم دارگ بوتگ ءُ اے پێشامد ءَ رندگیریَ کنت، اگاں توان اێں، نۆکێن هپتگ ءَ اے باروا سرهالَ دے اێں. واجه ءَ گوشت ما هم ایرانی اێں ءُ سۆگهَ کن اێں که ایران ءِ نندۆکانَ مه جن ات. منی لۆٹ همێش انت که سپاهیگاں ماں سربازجاهاں نند انت ءُ په امنیت ءَ جهد کن انت، بلێن مردمانَ تیر مه کن انت.


چمشانک

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *