سنیآنلاین| نامپرشتێں پاگواجه، اسپےریش ءُ سردار ءُ شش نپر شه سیستانءُبلوچستان ءِ پارلمان ءِ جهگیراں چارشمبی ءَ (13 مهرماه 1401) ماں دیوانے که زاهدان ءِ مزنمسیت ءَ برجم دارگ بوت، زاهدان ءِ هۆنێں جمعه ءِ پێشامد ءَ را پٹءُپۆل اش کرت ءُ وتی گڑتی ءُ لۆٹانَ آیی بارو ءَ درشان اش کرت.
اے دیوان ءِ اول ءَ شیخالاسلام مولانا عبدالحمید زاهدان ءِ هۆنێں جمعه ءِ پێشامد ءِ راستال ءَ را گێشواری کرت. پد ءَ پاگواجه ءُ سرداراں گپ کرت. گشتانک دئۆکاں شه زاهدان ءِ هۆنێں جمعه ءِ پێشامد ءِ همگرنچی ءَ گۆں بیمکار ءُ وتمستری لۆٹێں پاٹیاں سک انتقاد کرت. آوان ٹکاٹک گوشت که ماں اے پێشامد ءَ هچ وتمستری لۆٹێں پاٹی ءُ نپرے نه بوتگ ءُ آیی سبب استان ءِ ذمهوار ءُ سلاهبندێں واکانی بےتدبیری ءُ نازانتی بوتگ.
گشتانک دئۆکاں ماں اے دیوان ءَ شه استانی رسانک (هامون) ءُ ملکی رسانکدراں سک انتقاد کرت که په درۆگ جهد اش کرتگ تاں اے پێشامد ءِ گواچن ءَ چێر دےانت ءُ مردمانی دلانَ رێش اش کرتگ.
گڈسر ءَ شیخالاسلام مولانا عبدالحمید گۆں اے پێشامد ءِ اێر جنگ ءَ استانی ذمهواراں ءُ هاس شورای تامین ءِ بےتدبیری ءُ نازانتی ءَ را اے پێشامد ءِ بنی سبب زانت ءُ شه ملکی ذمهواراں لۆٹ ات ئِے که اے پێشامد ءَ گۆں آمید ءُ بےدۆزواهی ءَ پٹءُپۆل کن انت.
🔷 سیستانءُبلوچستان ءِ پاگواجه، اسپےریش، سردار ءُ وانندهانی دیوان ءِ گڈی بیانه اے وڑ انت:
1. اے پێشامد هورت پٹءُپۆل بیت تاں معلوم بیت کجاماں بےگناهێں نمازوانۆکانَ ٹک تیر کرتگ. اے پێشامد ءِ کنۆکاں باید پجاه آرگ ءُ مجازات بےانت.
2. گۆں اے پێشامد ءِ شهیدانی لۆگماناں بائد انت همدردی بیت ءُ آوانی تاوان دیگ بےانت.
اے پێشامد سبب بوتگ که بازێنے شه زاهدان ءِ مردمانی مالاں تباه بےانت، بائد پرێشی تۆجیلے درگێجگ بیت.
🔸3. اے پێشامد ءَ استان ءِ شورای تامین ءِ باسکانی نازانتی ءَ درا کرت ءُ همےپێم معلوم بوت که استان ءِ مزنێن ذمهواراں بائد ٹگل دیگ بےانت تاں آیۆک ءَ چشێن پێشامدے پێش مه یهت.
چمشانک