سنی‌آنلاین|شیخ‌الاسلام مولانا عبدالحمید، ماں زاهدان ءِ جمعه نماز ءِ دیوان ءَ (۲۰ خرداد ۱۴۰۱/ 10 جون 2022) گۆں انتقاد شه بازێں پاهواں ماں ملک ءَ ءُ سیستان ءُ بلوچستان ءَ، شه ذمه‌واراں لۆٹ ات که جزایی کانودانی بارو ءَ نوکێں چارگے بیت.
په سنی‌آنلاین ءِ سرهال ءَ مولانا عبدالحمید گوشت: لهتێں شه پاهواں قصاص انت ءُ قصاص الله ءِ حکم انت. هچ کس قصاصے بارو ءَ هبرے نه دار ایت، بلێں دگه پاهو انت که تعزیری انت ءُ مذاهبانی دیدانک آوانی بارو ءَ وڑوڑ انت. اے په جمهوری اسلامی ءُ مردماں نقصانے ءُ ذمه‌واراں باید اے بارو ءَ چارگے گند انت.
واجه ءَ تچکاتچک گوشت که «ما ذمه‌وارانی خیرلۆٹ اێں ءُ آوانی دشمن نه اێں» ءُ درائێنت ئِے: ذمه‌واراں باید کانودانی بارو ءَ نۆکێں چارگے کن انت. مئے باور همێش انت که بازێنے شه ملکے کانوداں اسلامے رد ءَ نه انت. اے کانوداں هچ چارگَ نه بےانت ءُ نه ٹگل انت، درحالےکه اے ٹگلگانی تها حاکم ءُ استمانے سۆب انت.
🔹بُندار استمان انت/ باید ملکے مهمترێں سیاست رسیدگی به استمان ءَ بیت
مولانا عبدالحمید وتی هبرانی دێمتر ءَ گۆں انتقاد شه یارانه ءِ دیگ ءَ درشان ئِے کرت: «هرچۆں که بازێنے شه مردماں یارانه ءَ پسندَ کن انت، بلێں درێگے اے سیاستے بدل ءَ په مردماں کار جۆڑ اش کرتێں تاں مردماں وتی کارے بدل ءَ مز گپتێں، اے گهترێں سیاستے ات. باید مردم کار کن انت، درحالےکه لهتێنے شه مردماں که اے زر آوانی دست ءَ کپ ایت گوش انت نون پچے کار کن اێں؟ بازێں لۆگمانے په یارانه ئانی امێت ءَ کار ءَ را یله داتگ، درحالےکه اے زر هم دردے را دوا نه کنت. معلوم نه انت کے اے سیاست ءَ را ملکے بڈ ءَ لڈ ات؟ باید ملکے دێمروی ءُ آبادی ءِ سیاست زورگ بوتێں ءُ پهکان ءَ په کارے نیمگ ءَ تێلانک داتێں تاں مردماں وتی کارے بدل ءَ زر گپتێں.»
زاهدان ءِ جمعه ءِ امام ءَ گۆں اشاره به ملکی زرے بازێں بےارزش بیگ ءَ گێش کرت: «ارمان که یارانه هچ دردے را دوا نه کنت. یارانه ءَ را گێشتر اش کرتگ، بلێں زر شه ارزش کپتگ. مهمترێں سیاست ماں ملک ءَ باید رسیدگی به استمان ءَ بیت. مردمانی سر ءَ باز سکّ انت ءُ گۆں مشکلاں آماچ انت، ایران ءِ زر ءِ ارزش شه تیوگێں زراں کمتر انت. گسانی کرایه ئاں هم گێش بوتگ انت ءُ گسانی واهندان کرایه‌نشینانَ گوش انت که اے زر ارزشے نه دار ایت.»
واجه ءَ همےپێم گس‌واهندانَ په کرایه‌نشینانی هیالداری ءَ سۆگه کرت ءُ گوشت ئِے: «راست انت که اے زر په شما گسواهندان بےارزش انت، بلێں په کرایه‌نشیناں همے زرے نز آرگ سکّ انت.»
مولانا عبدالحمید شه ذمه‌واراں لۆٹ ات که په مردماں رحم کن انت. واجه ءَ گێش کرت: «اصل استمان انت. هماپێم که مزن رهشۆں ءُ دگه ذمه‌واراں گوشتگ، استمان ولی نعمت انت. انچێں سیاستے درگێج اێں که استماں شه اے سکّے ءُ مشکلاں رکّ ایت. پهکێں مردماں گۆں سکّیاں آماچ انت. ذمه‌واراں باید کارے کن انت که مردماں گێشتر گۆں سکی ءُ رنجاں آماچ مه بےانت.»
🔹بےشرپی، آزاتی نه انت؛ فساد انت
مولانا عبدالحمید هندی سرۆکانی بارو ءَ که واجه رسول الله صلّی‌الله‌علیه‌وسلم ءِ بدگوشی ءَ را کرتگ اش، درشان ئِے کرت: «ماں هند ءَ شه حکومتی سرۆکانی نێمگ ءَ که شه ترندێں پارٹیان انت، واجه رسول الله ءِ بدگوشی بوت. شه وهدےکه اے پارٹی ماں هند ءَ حکومت ءَ را دست ءَ گپتگ، مسلمانان گۆں سکیان آماچ انت ءُ پریشان انت. هند جوانێں ملکے بوتگ ءُ پێسرے سرۆکاں اعتدال پسند بوتگ انت، بلێں ارماں که اے پارٹی ءِ سرۆکاں تروندێں مردم انت.»
زاهدان ءِ جمعه ءِ امام ءَ گێش کرت: «هچ سالمێں عقلے ماں دنیا ءَ مقدساتانی بدگوشی ءَ روا نه زانت. مسلمانان هم حق نه دار انت هچ دین ءُ مذهبے ءِ بدگوشی ءَ کن انت. حتا ما حق نه دار اێں که بتانی بدگوشی ءَ کن اێں. ما حق نه دار اێں که هچ کسے بدگوشی ءَ کن اێں. ما تعجبَ کن اێں که دنیا گۆں اێشی که وت را دۆدءُربێدگ ءِ واهندَ زانت، چشێں جٹّی ئێں کارَ کنت! ما آوانی کردار ءَ سکّ اێرَ جن اێں ءُ امێت‌دارێں که هند ءِ مردم ءُ سرکار اےوڑێں مردمانَ که بےشرپیَ کن انت، سکّ اێر جن انت.»
واجه ءَ آوانی بارو ءَ که آزاتی بیان ءِ ادعا ءَ کن انت، تچکاتچک گوشت: «یک گشتے انگرێزے مزن وزیر ءَ گوشت ات پرێشا که ماں مئے ملک ءَ آزاتی هست ما نه توان اێں آوانی دێم ءَ گر اێں که مسلمانانی مقدساتانی بدگوشی ءَ کن انت. بدگوشی ماں هچ دۆدءُربێدگے روا نه انت. اے آزاتی نه انت، بلکه فساد انت ءُ پهکاں باید دێمے گر انت.»
چمشانک