ھک دے تھریک ءِ سروک مولانا ھدایت الرحمان بلوچ ءَ پسنی ءَ دریاوردانی برجاھیں نندانک ءَ چہ تران کنان ءَ گْوشتگ کہ سیمسر ءِ پچ بوگ ءَ پد ھم لَس مھلوک ءَ ھچ مُز رسگ ءَ نہ اِنت.
آئی ءَ گْوشتگ کہ سیمسر ءَ ھرچ وڑیں ایرانی توژگ ءُ ساز سامان آھگ ءُ بھا بوگ ءَ اِنت بلے اشی ءَ چہ اَبید ھم لَس مھلوک ءَ پائدگ رسگ ءَ نہ اِنت.
آئی ءَ گْوشتگ کہ ایرانی سیمسر ءَ گوں بندوکیں باپاری مردم آسراتی دیگ نہ بوت اَنت گُڑا ھک دے تھریک دمگی انتزامیہ ءَ گوش اِیت کہ آ پرگینگ ءَ ڈن تھنا دہ کاٹون ایرانی روگن گوزگ ءِ موکل بدنت.
آئی ءَ گوشتگ کہ ما اینچوکیں مزنیں جُھدے کنگ ءَ ایں بلے ایرانی روگن ءِ گوادر ءَ چہ کراچی کم نھاد ءَ رس اِیت چُشیں تھریک ءِ چلائینگ ءَ چی پائدگ کہ چریشی ءِ باسک کربانی بدے اَنت ءُ راج ءَ ھچ پائدگ مہ رس اِیت.
مولانا ھدایت الرحمان ءَ وتی تران ءِ تہ ءَ گوشتگ کہ دمگی انتزامیہ ءَ نِھاد ءِ گر ءُ دار ءِ ھاتر ءَ دیوانے برجم بدار اِیت ءُ ایرانی توژگاں یک مناسبیں نھادے ءَ ایر بہ کنت تانکہ سرجمیں توژگ سامان کم کیمت ءَ بہ رس اَنت.
آئی ءَ گوشتگ کہ ایرانی سیمسر مارا چہ نزیک اِنت ءُ اے ضلع گوادر ءِ راج ھک اِنت آیاں ایرانی توژگ کم نھاد بہ رس اَنت.
ھدایت الرحمان ءَ گْوشتگ کہ سیمسر ءَ ھزرانی کچ ءَ ٹرک چہ گیس ءَ لوڑ بنت ءُ دگہ صوبھاں روگ ءَ اَنت بلے گوادر ءِ راج ءَ ھمے گیس ءِ نھاد ءِ آسراتی رسگ ءَ نہ اِنت- اے ھچ وڑ مناسب نہ اِنت سیمسر ءَ چہ گیس 13 کلدار ءَ زورگ گوادر ءِ راج 230 کلدار بھا بہ کن.
مولانا ھدایت الرحمان ءَ گْوشتگ کہ جیونی ءَ چہ بگر اورماڑہ ءَ دریاورداں وتی لائسنس فیس ءَ داں ھما وھد ءَ ندے اَنت دانکہ لائنس فیسانی تہ ءَ کمی ءِ درگت ءَ نوٹیفکیشن شنگ نہ بیت.
آئی ءَ دیمتر ءَ گْوشتگ کہ ضلع گوادر ءَ سیمسر ءَ 250 ءَ مزنیں کچے ءَ گیس ءُ دگہ ورگ ءُ توژگ ءِ باپاری بوگ ءَ اِنت بلے اشی ءَ چہ اَبید ضلع گوادر ءِ راج ءَ آیاں چہ ھچ پائدگ رسگ ءَ نہ اِنت.
سیمسر ءَ 13 کلدار ءَ بھا بؤکیں گیس گوادر ءِ راج ءَ 230 کلدار ءَ بھا بوگ ءَ اِنت کہ گوادر ءِ راج ءِ گوم ءَ سر ءَ سر زُلم اِنت نا انساپی اِنت.
دمگی انتزامیہ ءَ زوت گوادر ءِ راج ءِ ھاتر ءَ گیس ءِ نھاد ءَ یک مناسبے نھادے ءَ ایر بہ کن اَنت اگاں ناں گُڑا ما ایرانی گیس ءَ ڈن صوبہ ءَ روگ ءَ نیل ایں.
آئی ءَ دیمتر ءَ گْوشتگ کہ ھزارانی کچ ءَ ایرانی سیمسر ءَ چہ گیس ٹینکر ڈن صوبہ ءَ برگ بوگ ءَ اِنت بلے گوادر ءَ چہ ھوار سیمسر ءَ راج ءَ ھچ وڑیں آسراتی رسگ ءَ نہ اِنت- پسنی ءَ ھریکی ءَ اے ھک ھست کہ آ اد ءَ باپاری بہ کنت بلے راہ راھبندی ءِ رد ءَ باپاری کنگ بہ بیت- اد ءَ راہ راھبند لوٹ اِیت کہ دمگی دریاورد ور ایر کن اَنت.
آئی ءَ گوشتگ کہ پسنی جیٹی ءَ برجاھیں نندانک ءَ اسسٹنٹ کمشنر پسنی ءِ کارگس ءِ دیم ءَ جنگ ءَ اِنت باسک تیاری بہ کن اَنت ، باندا نندانک ءَ اسسٹنٹ کمشنر پسنی ءِ کارگس ءِ دیم ءَ جنگ بیت اگاں پد ءَ ھم دریاورداں ھکیں لوٹ منگ نہ بوت اَنت گُڑا اے نندانک ءَ دوبر مکران کوسٹل ھائی وے ءَ بر ایں.
سرچمگ: دی بلوچستان پست
چمشانک