واجه شیخالاسلام مولانا عبدالحمیدا ماں ( اردیبهشت ءِ شَشُما و 1398ءِ سالا) جمعه ءِ نمازا گوں تاکید په کشور ءِ مسیتّ و معابدانی حرمت ءِ دارگا گوشتی: که چه آیانی بیران کنگا دوری کنگ ببیت.
گوں سنی آنلاین ءِ حالرسانیا، واجه مولانا عبدالحمیدا ماں بهرے چه وتی گپاں کشور ءِ ذمه واران و قاضیّاں توار پردات و گوشتی: مسیتان خاصیں حرمتے هستنت. اگه ماں جاهے بے قانون ءِ اجازتا کَلَّگ و میتگے اڈ کنگ بیت و ذمه واراں لوٹنت که آئیا بیران بکننت؛ پیسر چه هر چیزا ما په بیران کنگا راضیگ نهیں و مئے باور اش انت که اے پیمیں جاهاں هما اولا په اڈ کنگ و لوگ ءِ بندگا اجازت مدینت، وهدے که اڈکنگ بوت گڑا په آئیا دگه راهے پیداگ بکننت. ما راضیگ نهیں که مردمانی لوگ و دوار بیران کنگ ببنت؛ بلے اگه اود ءِ لوگ بیران کنگ بیتنت نباید انت مسیتّے که اودا بندگ بوتگ بیران کنگ ببیت.
واجها دیمترا گوشت: لوگ و دوارانی واهند مردمان انت، بلے مسیت په «الله پاکا» منسوب انت. همے وابستگی احترام ءِ قابل انت؛ اے بابتا مسیتانی احترام گیشتر سمبالَگ ببیت. بَرے گندگ بیت که ذمه واراں کَلّگے مسیت اے بابتا بیران کتگ که ادارهے شکایت کتگ مسیت بے قانون ءِ اجازتا بندگ بوتگ، اے وشّیں کارے نهنت. اگه جاهے مسیتے اڈ کنگ ببیت و هنوں هم هچ کسے اودا نهنت، پدا هم باید انت که مسیتّا بِلّ انت. رهگوزے په نماز و دم ءِ ساسارگا اودا کیت انت په همے نسبتے که مسیتا گوں الله پاکا هست انت نباید انت که بیران کنگ ببیت.
دارالعلوم زاهدان ءِ پاگواجها دیماترا، دلیل گرگ په «ضرار ءِ» مسیت ءِ بیران کنگا ماں واجه رسول الله “صلی الله علیه و سلم ءِ ” زمانگا رد کت و گوشتی: «ضرار ءِ» مسیت ءِ بابتا وحی و آیتے چه قرآنا نازل بوتگ که اے مسیت په ضد مسلمانان و گوں منافقانی همدست بیگا جوڑ کنگ؛ آیانی مراد اش ات که په وت پایگاهے جوڑ بکننت و چه آئیا بهره ببرانت. رند چه اشی که رسول الله”صلی الله علیه وسلم” چه تبوک ءِ جنگا چَهر کُتگت، چه رسول الله ” صلی الله علیه و سلما دزبندی اش کت که اودا بیئیت، الله پاکا آیت دیم دات که اے مسیت په مسلمانانی تفرقه و په ضد آیاں وش کنگ بوتگ و آئی ءِ بیران کنگ ءِ دستوری دات.
واجه مولانا عبدالحمیدا گوشت: برے ادعا کنگ بیت لهتے په زمینانی وت کنگیّا، مسیت اڈَّ کننت؛ کسے که خلاف کنت دیمی گرگ ببیت، بلے مسیتے که بندگ بوتگ آئی ءِ حرمت دارگ ببیت و آئیا کار مداریں؛ چیا که مسیت مردمانی دینی پایگاه انت. مسیت هرجاهے که بندگ ببیت، باید انت که آئی ءِ احترام کنگ ببیت. همے وڑا بایدانت غیر مسلماناتی معابد و عبادتجاھانی احترام دارگ ببیت و چه آیانی بیران کنگا دوری کنگ ببیت.
زاهدان ءِ اهل سنت ءِ جمعہ ءِ پیش اماما گوں اشاره په مسیتانی بے احترامی کنگ و آیانی بیران کنگا گوشتی: مسیتانی بے احترامی کنگا تاوان و پیشامد گون انت. چه لهتے اے پیمیں کارانے که ماں کشورا کنگ بوتگنت، هما اندازه تاوانیں کتگ که چه کشّ و کساسا درنت.
واجها گوشت: مسیتّا گوں شیعه و سنیا کارے نیست: «وَ أنَّ المَسَاجِدَ لله» مسیت الله پاکیئگنت؛ نه که شیعه و نه که سنیانی.
واجه مولانا عبدالحمیدا دیمترا چه اے گپا که شیعه و سنی گوں یک و دگر ءِ مسیتانی بندگا همکارے کننت شادی پیش کُت و گوشتی: یک عزیزے منا جست کت که په شیعه یانی مسیتے بندگا چه منا کمک ءِ دزبندی کنگ بوتگ؛ من گوشت: مسیت خدائیگنت ، برو بِبَند. کسے که مسیت جوڑه کنت په سیاست و مصلحتا اڈّ نکنت، بلکیں په الله ءِ ناما اڈَّ کنت. شیعه یے په اهل سنت ءِ مسیت ءِ بندگا کمک کنت ، یا سنی یے که په شیعه ءِ مسیت ءِ بندگا کمک کنت، گپ اش انت که آئیا خدا ءِ دین مدد کتگ.
واجها گوشت: وهدے که شیعه یانی جامعه ءِ مسیت ماں زاهدان اڈ ماں بیگت، چه اهل سنت ءِ تاجراں لوٹگ بوتگت که کمک و مددت بکننت، آیاں گوں ما مشورت کت، گوشتیں: کمک کن ات؛ مسیت پروردگارئیگَنت، مسیتا کارے گوں مذهبا نیست.
زاهدان ءِ اهل سنت ءِ آدینگ ءِ پیش اماما گوں ذمه وارانی توار پرجنگا تاکید کت: نه شیعه یانی مسیتا بیران بکن ات و نه که سُنّیانی مسیتّا. مسیتانی بیران کنگا تاوان گوننت؛ په ضد نظاما تبلیغات بیت و حسد و کینگ پیداگ بیت. سرجمیں مسیتانی احتراما بداریں. په نصارا و یهود ءِ کلیسا و معابدان و پهکیں نامسلماناں احترام ایر بکنیں. هرکسے وت وتی عبادت ءِ وڑا جواب دیوکنت.
سریلانکا ءِ کلیسایانی سرا اُرُش کنگ بداَت
واجه شیخالاسلام مولانا عبدالحمیدا ماں دگہ بهرے چه وتی گپاں، گوں افسوز چه انفجارانے که گوستگیں هفتگا ماں سریلانکایا که چند کلیسا اِش جتگتِش، مسیت و معابدانی حرمت ءِ سمبالگ ءِ لوٹوک بوت.
واجه مولانا عبدالحمیدا گوشت: سریلانکا ءِ پیشامد که چندے ترندینا مسیحیانی معابد جَت و لهتے مردم اش کشتگ، واکی دردناکیں گپے.
واجها گوشت: چه اشیا پیسر «نیوزیلند ءِ» پیشامد پیش آتکگت که ماں آئیا لهتے افراطیا مسلمانان ماں مسیتا و نماز ءِ وهدا په خاک وخونا کشّ اِت و آیان اش شهید کت. اے پیشامد واکی دردناکتنت و جهان ءِ لس مخلوق پریشان و متاثر بوتنت.
زاهدان اهل سنت ءِ آدینگ ءِ پیش اماما ارشانے که په «معابدان» بیت بد زانت و گوشتی: چیا کسانے که په عبادتا ماں معابدان رَوَنت -فرق نکنت که آ عبادتجاه، مسیت یا که یهود و نصارا ءِ عبادتجاه ببنت- آیانی سرا اُرُش کنگ بیت؟ چیا ناامنی په مسیت و معابداں کشگ ببیت؟ چیا مسیتاں پاترپ و زراب ءِ جاها بَیَنت؟ چیا نا مسلمانانی معابد پاترپ ءِ جاه قرار دیگ بوتگنت؟
واجها په عبادتجاهاں ارش کنگا جدا چه عقل و دود و ربیدگا زانت و گوشتی: په عبادتجاهاں ارش کنگ عقل خلافا انت. دین اسلام ءِ مزنیں دود و ربیدگ و دنیا ءِ سالمیں مردمانی ربیدگ اے مسئله ها نمنّیت که «عبادتجاهے»، تُری کلیسایے ببیت یا مسیتے، آئی سرا ارش کنگ ببیت. اے مسائل واکی په ایران ملّتا و درائیں دنیا ءِ آزادیں مردمانی پریشانیں گپے ات.
درائیں دینانی عبادتجاهاں احترام ءِ واهند انت
واجه مولانا عبدالحمیدا تأکید کت: سرجمیں عبادتجاه احترام ءِ واهندانت؛ اے بابتا نباید په هچ عبادتجاهے ، هر گَلّ ءِ هم ببیت، دست دراجی کنگ ببیت. مردمے که عبادت کنگا انت، هر چیزیا که عبادت کننت، عبادت اش راست انت یا ردّ، نباید آیانی سرا اُرُش کنگ ببیت.
دارالعلوم زاهدانءِ سرمسترا گوں پریشانی چه ارشے که په سریلانکا ءِ عبادتجاهاں بوتگ گوشتی: ما چه اے پیشامدا وتی دلپدردیا جار جنیں و چه مئے دیدا سریلانکا ءِ پیشامد چش که نیوزیلند ءِ پیشامدا ناراستیں کارے.
واجها تاکید کت: په درائیں گلّ و گروپاں -هر دین و ربیدگ ءِ واهند ببنت- سفارش کناں که دست چه افراط و تندرویا بکشّنت و دنیا ءِ مردمانی مارشت، مسلمان و نا مسلمانانی مارشتا ٹَپّی مکننت.
چمشانک