شیخ الإسلام مولانا عبدالحمیدءَ تهدید ؤ جنگءِ سیاست إیر جت ؤ چه تپاکیں راجانی هوربند (سازمان ملل) ؤ مزن واکانی لوٹ إت که باید په صلح ؤ تپاکیءِ آرگ ؤ جنگ ؤ ترندیءِ گار کنگءَ جُهد بکن أنت.
زاهدانءِ جمعهءِ پیشنمازءَ ماں وتی جمعه(4مهر1393)ءِ وعظاں په سازمان مللءِ تازه إیں اجلاس ؤ دیوانءَ اشاره کت ؤ پرمائینتی: ترندروی، افراط ؤ زیاده روی، ٹوه تر إیں پریشانی أت که ماں سازمان مللءِ کنفرانسءَ إے بارهءَ گپ جنگ بیت. لهتے ملکانی کارمستراں ماں سازمان مللءِ إے دیوانءَ په تروریزم ؤ زیاده رویءِ چه بین بَرَگءَ ترندیں گپ جت. أمریکه لوٹیت که گوں جنگءَ تروریزم ؤ ترندرویءَ گار بکنت ؤ په وتی إے کار ءَ دگه لهتے هں گوں وتی تپاک کتگ.
واجهءَ گوں اشاره په إے دیوانءِ گپاں گوشتی: اپسوز إنت که ماں إے اجلاسءَ چه صلح ؤ تپاکیءَ که په تروریزمءِ گار کنگءَ بهتریں راه إنت، گپے جنگ نبوت.
مولانا عبدالحمیدءَ چه أمریکهءِ راجکماش (اوباما)ءِ گپاں گلّه کت ؤ گوشتی:أمریکهءِ راجکماشءَ ماں وتی گپاں، ترندرویں گل ؤ پاٹی سرطانی غُدّه گوشت أنت، ؤ چه إے پاٹانی جاه جنگءَ اپسوزئی وارت، بلے آئی چه مستریں سَڑِتگیں سرطانی غدهءَ که آ زورگیریں اسرائیل إنت ؤ سبب بوتگ مرچی دگه گونڈیں سرطانی غده جوڑ ببیت، ، هچ گپی نجت.
واجه دیمءَ گوشت: جهانءِ مردماں مرچی اسرائیلءِ ظلم ؤ جور ءَ گندگءَ أنت ؤ آیانی تها ترند مزاج إیں مردم هست که إے مسائلءَ تحمل کرت نه کن أنت، گڑا دستاں په افراط ؤ زیاد رویءَ لانچ أنت. ما بار بار گوشتگ که ما گوں هر وڑیں ترندروی ؤ ترورءَ مخالف إیں. بلے إے گپءَ هں ما تپاک نه إیں که لهتے ملک جاه به جن أنت که ما گوں کشت ؤ کشارءَ لوٹ إیں تروریزمءِ دیمءَ بگر إیں.
مولانا عبدالحمیدءَ “اسرائیلءِ امنیتءِ برجاه دارگ” اصلی تریں سبب په ملکانی نا امن کنگءَ زانت ؤ گوشتی: بازیں نا امنی ئے که مرچی ماں عراق، سوریا ؤ لبنانءَ گندگ بیت غیرچه سیاسی مقصد ؤ مُراداں اصلی تریں مقصد ؤ مراد اسرائیلءِ امنیتءِ برجاه دارگ إنت. إے مزن واکاں لوٹ أنت که مسلماناں وتی تمامیں زور ؤ طاقتءَ وتی ضررءَ کار بگر أنت ؤ یکدگرءَ به کُش أنت تا اسرائیل امانءِ تها ببیت.
زاهدانءِ جمعهءِ پیشنمازءَ پرمائینت: سازمان ملل ؤ مزن واکاں باید په صلح ؤ تپاکی ؤجنگ ؤ ترندیءِ گار کنگءَ جُهد بکن أنت، جنگ ؤ ترندرویءَ گوں جنگءَ چه بین برگ ، غیر چه خاصیں وهدے، عقل مندیں کارے نه إنت.
باید په تعلیم ؤ تربیتءِ دیمرویءَ یک مزنیں جهدے کنگ ببیت
شیخ الإسلام مولانا عبدالحمیدءَ ماں دگه بهرے چه وتی جمعهءِ وعظاں، دولتی مدرسه یانی نوکیں تحصیلی سالءِ شروع بوگ، مبارکباد گوشت ؤ استانءِ آموزش ؤ پروشءِ کارمستری که ماں دیوانءَ حاضر أت، وش آتک کت ؤ پرمائینتی: آموزش ؤ پرورشءِ کارمستر یکے چه توانمند ؤ خیرواهیں کارمستران إنت که په گوستگیں کم کاریانی جبران کنگءَ باز کوشش کنگ إنت. ؤ په مردمانی چکانی تعلیم ؤ آموزشءَ سک هدوناک إنت.
دیمءَ واجهءَ په آموزش ؤ پرورشءِ اهمیتءَ گپ جت ؤ پرمائینتی: آموزش ؤ پرورش سرجمیں مادی ؤ معنوی دیم رویانی(پیشرفت) بنیاد إنت. گڑا ما پهکاں نوکیں نسلءِ پگرءَ بکن إیں. آموزش ؤ پرورش هر اندازه توان ببیت، بلے تعلیم ؤ تربیت هما ٹیمءَ فایده ؤ سوت دات که ما پهکاں کمکاری ؤ دیم پانی بکن إیں.غیر چه إے ڈولءَ تغییر ؤ تبدیلی ؤ دیمروی بے فائده إنت.
واجهءَ چه تعلیم ؤ تربیتءِ کم ؤ کاستیاں ماں استاں گله کت ؤ گوشتی: مرچی مئے استان سواد ؤ تعلیمی لحاظءَ ملکءِ تها ماں کمتریں درجهءَ قرار داریت، باید په تعلیم ؤ تربیتءِ دیمرویءَ یک مزنیں جهد، دلی اراده إے چه عالم ؤ زانوگر ؤ اسپیت ریشانی ؤ دگه پاٹانی نیمگءَ کنگ ببیت. همے پیمءش دولت ؤ استاندار ؤ آموزش ؤ پرورشءِ وزارت ؤ دگه دولتی گلاں چه استانءِ مدرسه یاں هرجاگه که ببنت دیم پانی ؤ کمکاری بکن أنت .
سرچمگ: شیخ الإسلام مولانا عبدالحمیدءِ رسمی سایت
چمشانک