شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (13 مهر 1403) سیستانءُبلوچستان ءِ امنیتی ءُ چاگردی مشکلانی نێمگ ءَ اشاره کرت ءُ په «دێمداری ءُ پهرێز شه زۆراکی ءَ» ءُ «تاهیر ءِ جۆڑ کنگ ءَ ماں چاکرد ءَ» سک سۆگه کرت. واجه ءَ شه کارمستراں لۆٹ ات که ظلم ءُ زۆراکیانے که مردمانی سر ءَ بوتگ انت، رسیدگی کن انت ءُ گوشتء که «مردمانی سر ءَ زۆراں کم کنگ بنت؛ پچےکه هلاکه ءَ تاهیر په کار انت.»
په سنی‌آنلاین ءِ سرهال ءَ شیخ‌الاسلام مولانا عبدالحمید ءَ همےرنگ مالزانشتی ءُ صنعتی سیاستانی نێمگ ءَ اشاره کرت. واجه ءَ اے ٹِکے سر ءَ تأکید کرت که «درستێں آسر» وهدے کٹگ بنت که «سیاستاں درست» به انت. واجه ءِ دیدانک ءِ رد ءَ نۆکێں سرکار بائد ماں تیوگێں پڑاں چۆ صنعت، کشار، سۆداگری ءُ معدناں ردێں سیاستان ءَ بدل کنت.
زاهدان ءِ آدێنگ ءِ امام ءَ وتی هبرانی دێمتر ءَ سیستانءُبلوچستان ءِ جاور ءِ نێمگ ءَ اشاره کرت ءُ گوشتء که ڈکال ءُ کم آپی ءَ اے ڈیه ءِ کشاران ءَ سک نقصان رسێنتگ.
مولانا عبدالحمید گۆں اشاره به استان ءِ آدگه بستاراں چۆں سیمسر، دریاب ءُ معدناں که ملک ءِ دێمروی ءِ پتانسیل انت، وتی شرگداری ءَ شه معدنانی پائدگ زوری ءِ رهبند ءَ درشان کرت ءُ گوشتء: استان ءِ گێشتری معدناں شه تهران ءِ شرکتانی نێمگ ءَ کارمرز بنت بےاێشی که شه آوان په استان ءِ ڈیلءُڈۆلانی دێم ءَ برگ ءَ سۆبے رس ایت. اے معدنانی زندچاگردی چٹیاں ماں استان ءَ مان انت ءُ مالزانشتی سۆبمندی شه استان ءَ در به انت.
🔹 معدنانی پائدگ‌زوری ءِ ته ءَ «فساد» ءُ «مردمانی حقانی نادلگۆش کنگ» هست انت
شیخ‌الاسلام مولانا عبدالحمید درشان کرت: سیستان ءُ بلوچستان ءِ ملیاردی ئێں مڈیاں بے اێشی که په اے هلاکه ءِ مردماں سۆبے داشته به انت، په دگه جاهاں برگ به انت.
واجه ءَ ٹکاٹک گوشت: اے معدناں زۆرآور ءُ آقازادهانی دست ءَ انت که ابرمی مڈی ءُ چاگردی زندمان ءَ چٹی جن انت ءُ مردمانی حقان ءَ هم پادمالی کن انت. کانود هم بس بےوسێں مردمانی سر ءَ اێر دارگ بیت ءُ هچ اداره ءِ زۆر گۆں اے مردمان نه رس ایت ءُ اے ٹوهێں ظلمے.
🔹 تفتان ءِ معدن ءِ در کنگ، سوب بوتگ تاں ڈیه ءِ مردماں پرێشان به انت/ اے معدن ءِ سۆباں کئے کیتو ءَ رو انت؟
مولانا عبدالحمید دێمتر ءَ به تفتان ءِ معدن ءَ اشاره کرت ءُ گوشتء: تفتان استان ءِ پێشانی ءِ نگێنگ انت که بازێں ابرمی مڈی ئے چۆ گهترێں باگاں، مالانی ردێنگ‌جاه ءُ آپ ءِ جاگه انت. بلێں ٹوهێں شرکتاں گۆں ٹوهێں ماشینانی آرگ ءَ ءُ کوهانی تراکێنگ ءَ هم آپ ءَ را ءُ هم چاگردی زندمان ءَ را نقصان رسێنتگ. تراکێنگانی دَزاں سوب بوتگ انت تاں گنگداماں مر انت ءُ همے چیز سوب بوتگ تاں مردماں پرێشان به انت.
واجه ءَ تفتان ءِ دمگ ءِ مالزانشتی ءُ کشت ءُ کشاری مشکلاں اشاره کرت ءُ گوشتء: پیسر ءَ شه اے دمگ ءَ ھزاراں تن کشت ءُ کشاری چیز ملک ءِ ته ءَ ءُ درملک ءَ راه دیگ بوتگ اَنت، بلے نوں ابرمی ءُ کشت ءُ کشاری سرچمگانی بێران کنگے سوب ءَ چیزے په راه دیگ ءَ نێست انت.
🔹 گۆں چنکه دمگی پوریاگر ءِ کارمرز کنگ ءَ، استان ءِ مزنێں مڈیانی درکپگ ءِ جبران کنگ نه بیت
مولانا عبدالحمید همےرنگ گۆں اشاره به دمگی پوریاگرانی کمێں کارمرز کنگ ءَ ماں اے معدناں گوشت: گۆں صداں یا هزاراں پوریاگر ءِ کارمرز کنگ ءَ، استان ءِ مزنێں مڈیانی درکپگ ءُ همےرنگ هزاراں باگ ءُ چمگ ءُ سێل ءُ گردگی جاگهانی جبران کنگ نه بیت.
واجه ءَ اے جاور ءَ را په دهاں هزار کهولے که ماں آ ڈیه ءَ زند گوازێن انت، بس نه زانت ءُ تأکید کرت که آ ڈیه ءِ مردمانی حقاں دلگۆش بنت ءُ شه ابرمی مڈیانی بێرانی ءَ دێمداری بیت.
🔹 واجه پزشکیان سیستانءُبلوچستان ءَ سک دلگۆش کنت
🔹 استان ءَ لهتے بنیادی بدلی په کار انت
مولانا عبدالحمید چاردمی سرکار ءِ هاسێں دلگۆش ءَ په سیستان ءُ بلوچستان ءَ لۆٹۆک بوت ءُ گوشتء: شه واجه پزشکیان ءَ لۆٹ اێں که اے استان ءَ پرێشی که مشکلانی آماچ انت سک دلگۆش کنت. سیستانءُبلوچستان ءِ باروا بائد انت هاسێں چارگے بیت ءُ لهتے بنیادی بدلی په کار انت.
🔹 اگاں سرکار مه توانت استمان ءِ پرشتگێں دل ءَ دست ءَ بیار ایت، گڑا آیی راستێں سیاست ءِ رد ءَ کردار نه کرتگ
مولانا عبدالحمید درشان کرت: راستێں ءُ جوانێں سیاست استان ءَ امن کن انت. اے استان ءَ بس سلاهبندێں واک په کار نه انت، بلکه آیرا سیاسی مردم هم په کار انت که گۆں سیاست ءُ سسا ءَ مردمانی دل ءَ دست ءَ بیار انت. اگاں سرکار مه توانت استمان ءِ پرشتگێں دل ءَ دست ءَ بیار ایت، گڑا آیی راستێں سیاست ءِ رد ءَ کردار نه کرتگ.
واجه ءَ سک سۆگه کرت که ظلم ءُ پێشامداں که اے مردمانی سر ءَ بوتگ انت رسیدگی به انت ءُ شه امنیتی کارمستراں لۆٹ اتء که شه مردمانی جنَگ ءُ کُشَگاں ماں دگاں دێمداری کن انت.
چمشانک