شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (24 مهر 1405/ 16 اکتوبر 2026) گۆں شرگداری شه آذربایجان ءِ حکومت ءِ نۆکێں فرمان ءَ که ماں آ ملک ءِ وانگجاهاں حجاب ءُ شال ءِ پۆشگ ءِ سرا بندش جنگ بوتگ، اے چیز ءَ گۆں «راجمستری ءِ رهبنداں چپ» زانت ءُ اے فرمان ءِ اصلاح ءِ لۆٹۆک بوت.
په سنی‌آنلاین ءِ سرهال ءَ مولانا عبدالحمید درشاں کرت: ماں آذربایجان که آئی آباتی ءِ گێشتر شه 94 درصد ءَ مسلمان انت، بازێنے شه جنێناں شال پۆش انت ءُ لهتے هم نه پۆش انت. ماں آ ملک ءَ آزاتی بوتگ ءُ حجاب اختیاری بوتگ. بلے راجکماش ءِ نۆکێں فرمان ءِ رد ءَ نۆدربر ءُ وانێنۆکاں لاچار انت شال ءَ دور دےانت ءُ شه آواں لۆٹگ بوتگ که سر درا ءَ ماں کلاساں بهر زور انت.
واجه ءَ گێش کرت: ماں آذربایجان ءَ اے فرمان ءِ سر ءَ اێراد گرگ بوتگ. حجاب ءِ مکن کنگ ءِ فرمان اگں گۆں آذربایجان ءِ کانود ءَ چپ مه بیت، اے ملک ءِ گێشتری آباتی مسلمان انت، ءُ اگه مسلماناں کم هم به انت، هچ سرکارے را اے حق نێست که مردمانی آزاتیانی سر ءَ بندش جنت.
زاهدان ءِ آدێنگ ءِ امام ءَ ٹکاٹک گوشت: مردمانی آزاتیانی سر ءَ بندش جنگ گۆں راجمستری ءِ رهبنداں چپ انت، هرچۆن که بازێں ملکے بس پرێشی که ماں دنیا ءَ دۆستناک به انت، راجمستری ءِ اۆگام ءَ جن انت. گڑا گهتر انت که الهام علی‌اف، آذربایجان ءِ راجکماش هم مردمانی مارشتانی کمار ءَ کنت ءُ وتی فرمان ءَ اصلاح کنت. اے چیز آذربایجان ءِ حکومت ءُ ملک ءِ خیر ءَ انت.
🔹«زۆر» ءِ سیاست پرۆشَ وارت ءُ آئی آسر چپکا انت
مولانا عبدالحمید گێش کرت: هرجا که جنێنانی حجاب ءُ پۆشگ ءِ باروا مکن ءُ بندشے بوتگ، آئی پرۆش وارتگ. همارنگ که ماں آذربایجان ءَ اے فرمان ءِ آسر چپکا بوتگ ءُ بازێنے شه جنێناں ءُ نۆدربر ءُ وانێنۆکاں که پێسر ءَ سردرا بوتگ انت، اے فرمان ءِ بگێر ءَ شال اش پۆشتگ.
واجه ءَ درائێنت: مئے ملک ءِ ته ءَ هم گێشتری مردم مسلمان انت، ما دیست که وهدے حجاب زۆرکایی بوت ءُ گۆں آواں که حجاب ءَ کمار اش نه کرت دێم‌په‌دێمی ءُ ترندی بوت، گڑا اێشی برورد چپکا بوت ءُ مئے ملک ءَ شه اے سیاست ءَ تاوان دیست.
🔹مردم «زۆرین هبر ءَ» نه منّ انت؛ بائد شه «استدلال»، «حکمت» ءُ «حقانی کمار کنگ» ءَ کار گرگ بیت
زاهدان ءِ آدێنگ ءِ امام ءَ گوشت: باز براں شه اے تریبون ءَ گوشگ بوتگ که گهترێں توجیل همێش انت که شه تدبیر ءُ حکمت ءَ کارگرگ بیت. جنێنانی ارزشت ءَ دار ات ءُ دلگۆش اش کن ات، زهرشانی کنۆکێں جنێن ءُ مردێنانی گپاں گۆش دار ات ءُ زۆر ءِ گپ مه جن ات، پچےکه مردم زۆرێں گپ ءَ نه من انت، شه هرکس ءِ نێمگ ءَ بیت، چه قاضی، عالم یا اسپےریش ءُ دگرے بیت، بلکه استدلال، منطق/ راست‌بندگِری، تدبیر، حکمت ءُ حقانی کمار کنگ پسو دنت.
🔹جنێانی کشگ گۆں «ڈیه ءِ دۆدمان ءَ چپ انت»؛ جنێنانی حرمت بائد ساتگ بیت، هر کار ءُ جاگهے که دار انت
مولانا عبدالحمید ماں دگه بهرے شه وتی هبراں وتی گڑتی ءَ سیستانءُبلوچستان ءِ ناامنیانی باروا درشان کرت که ماں اے ناامنیاں دۆ جنێں کشگ بوتگ انت ءُ اے چیز ءَ گۆں ڈیه ءِ دۆمان ءَ چپ زانت ءُ گوشت ئی: بژن انت که ناامنیاں ماں هلاکه ءَ گێش بوتگ انت ءُ ماں اے پێشامداں دۆ جنێں هم کشگ بوتگ انت.
واجه ءَ درائێنت: ماں گوست ءَ اے ڈیه ءِ ته ءَ انچێن دۆمانے بوتگ که اگں کسے وتی پس ءِ کۆشکار ءَ دیستێں بلے گۆں آئی جنێنے همراه بوتێں، جنێن ءِ حرمت ءِ پارءَ آئی وتی پس ءِ کۆشکار ءَ نه کشت. راهجناں هم وهدے دیستێں که گۆں کاروانے جنێنے همراه انت آئی زرءُمالاں نه پل ات اش. بلے ارمان که مرۆچی دزاں انچۆ بےحیا بوتگ انت که جنێنانی زر ءُ زێوراں شه آوانی گور ءَ در کن انت ءُ بر انت.
واجه ءَ کڈن کرت: وهدے که جنێنے را گند اێں بائد وتی ماس ءُ گهار ءُ جنک ءِ یاد ءَ کپ اێں که مهروان ءُ دلسۆچێں پاٹی ئے انت. من پێسر ءَ بر براں آمیدگس ءَ سۆگه کرتگ که جنێناں پاهو مکن ات ءُ سیاسی جهدکارێں جنێناں بندیگ مه کن ات ءُ آوان آزات کن ات. من پهکان سۆگه کن آں که جنێنانی حرمت ءَ دار ات، هر کار ءُ جاگهے که دار انت.
🔹په هلاکه ءِ امنیت ءِ پهازگ ءَ کڈن کن آں
زاهدان ءِ آدێنگ ءِ امام ءَ وتی هبرانی گڈسر ءَ گوشت: منی سۆگه ءُ کڈن په پهکان همێش انت که مارشتاں دلگۆش کن ات ءُ امنیت ءَ سات ات. هچ راج ءُ استمان ءِ مارشتاں مه شۆرێں ات. امنیت ءِ پهازگ پهکانی سۆب ءَ انت.
چمشانک