شیخالاسلام مولانا عبدالحمید ماں زاهدان ءِ نمازجمعه ءِ دیوان ءَ (8 تیرماه 1403)، گۆں ایراد شه اسرائیل ءِ جرائماں ماں غزه ءَ شه آ جنگ ءِ آسراتاں بیھار داتگ ءُ گوشتگ: اے جنگ جھان ءِ ایمنی ءَ خراب کنگ ءَ اِنت ءُ جھان ءِ ته ءَ ناشرکاری ءَ مھکم ءُ گێش کنگ ءَ اِنت.
🔹 غزہ ءِ جنگ ءِ هردو پاٹیاں یکے دومی ءِ بندیگاں یله به کن انت ءُ آسبندی ءِ سر ءَ تپاک به کن انت
په سنیآنلاین ءِ سرهال ءَ مولانا عبدالحمید ماں یک بهرے شه وتی هبراں گوشت: اے رۆچاں فلسطین ءَ جاور سک گران انت ءُ ندارگ سک دل کش انت. هرکس که آیرا انسانیت ءِ مارشت هست اے ندارگ ءَ سگ ات نه کنت.
واجه ءَ گێش کرت: ارمان که اسرائیل ءِ تانسر پسندیں حاکماں مردمانی کُشگ، لوگانی ڈالێنگ ءُ جنێن ءُ چُکانی کُشگ ءِ ھچ وڑیں ھیال ءُ لیکه نێست ءُ ما ھمے مار ایں که آ شه اے کار ءَ وش اَنت، وھدے که اگاں کسے ءَ انسانیت ھست گڑا گنگدام ءِ کُشگ ءُ ابرمی وسیلهانی هراب کنگ ءَ هم سگ ات نه کنت، چه برسیت که کسے مردمانی چاگرد ءُ زند ءَ هراب کنت. ھپتاد سال ءَ گێش ءِ گوزگ ءَ پد انگت اسرائیل په فلسطینیانی ڈگارانی پدا دیگ ءَ نیمۆن کنت ءُ کشتاراں برجاہ دارگ لوٹیت.
زاهدان ءِ آدێنگ ءِ امام ءَ درشان کرت: اِے کرد ءِ دێما برگ نه یهودیانی سۆب ءَ اِنت ءُ نه که مسلمان ءُ دنیا ءِ سۆب ءَ اِنت. جنگ، تباهی ءُ کُشگ شه ھر نێمگ ءَ چَٹی اِنت ءُ دنیا بائد جنگ ءُ زۆراکی ءُ انسانی تاوانان ءَ بند کنت. اسرائیل ءَ سلاہ دیگ په فلسطینیانی کُشگ ءَ یا ھرکس ءَ سلاه دیگ که مردمان ءَ کُش ایت، اِے پهکانی چَٹی ءَ اِنت.
واجه ءَ گێش کرت: هردو پاٹیاں بائد یکے دومی ءِ بندیگان ءَ یله به کن اَنت ءُ آسبندی ءِ سر ءَ تپاک به کن اَنت. اسرائیل بائد عادلانه ئێں تپاک ءَ ءُ فلسطینیانی زۆرگپتگێں ٹگارانی پدا دیگ ءَ منّ ایت؛ اے جھان ءِ امن ءُ ایمنی ءِ ضمانت ءَ دات کنت.
شیخالاسلام مولانا عبدالحمید ءَ غزہ ءِ جنگ ءِ برجاہ دارگ ءِ بیمناکیں آسر ءِ بابت ءَ بیھار دات ءُ گوشت: اگاں اے جنگ اے رنگ ءَ برجاہ به بیت، بوت کنت که اے جنگ سێمی ئێں جھانی جنگ ءَ بدل به بیت. اے جنگ، جھان ءِ ایمنی ءَ ھراب ءُ جھان ءِ ته ءَ ناشرکاری ءَ مھکم ءُ گێش کنت.
واجه ءَ سکّ سۆگه کرت: ناشرکاری ءِ دێمداری ءِ راہ آمید ءُ انصاف اِنت. آمید ءُ منصفانه ءُ معقولێں گێشءُگیواری توانت ناشرکاری ءِ بُن ءُ رۆتگ ءَ ھشک کنت. امریکی، یورپی ءُ دنیا ءِ سرجمێں سرکاراں وتی وس ءُ رسوخ ءَ په دێمداری شه اسرائیل ءَ کارمرز به کن اَنت. اسرائیل سلامتی کونسل ءُ میان استمانی دیوانانی قرار ءُ بیان ءُ سرکارانی بیھارانی نێمگ ءَ دلگۆش نه کنت. بائد زۆرگر ءِ دێم دارگ بیت. هرکس که ظلم کنت یا ظالم ءِ پلهمرزی ءَ کنت آ الله ءِ عذاب ءُ سزا ءُ استمانانی زهر ءِ آماچ بیت.
🔹 الحمدلله «آگاهی» ملک ءَ آتگ ءُ مردم وتی اگده ءَ زان اَنت
🔹 ما بائد وتی بستار ءَ گێش به کن ایں ءُ هر کس ءَ را آزاتی به دے ایں
مولانا عبدالحمید ماں دگه بهرے شه وتی هبراں گوشت: الحمدلله مرۆچی دنیا ءَ ءُ ھاس ماں مئے ملک، ایران ءَ آگاهی آتگ ءُ درستیں مردماں شه زالبول ءُ مردێناں وتی ذمهواری ءَ زان اَنت ءُ منّ اَنت ءُ ھمے رد ءَ کار کن اَنت.
واجه ءَ گێش کرت: اے المی اِنت که ما وتی بستار ءَ بُرز به کن ایں ءُ درستیں مردمان ءَ ھک ءُ آزاتی به دے ایں. هر کس لوٹ ایت شه یک راهے به وشبهتی ءَ رس ایت. بستار ءُ برداشت بیت ءُ مردماں وتی آزاتی ءَ داشته به انت. دێمروئی کرتگیں ملکانی تها وڑوڑێں ھیال ءُ لیکه هست انت، بلێں اے رنگ رنگێں ھیالاں برداشت کنگ بنت. اسلام ءَ ما را اۆپار ءُ دور چاری ءَ یات داتگ.
🔹 بنڈ ءُ بدگوشیاں ماں سائبر اسپیس ءَ گێش بوتگ انت؛ اے گۆں اخلاق ءَ چپ انت
زاهدا ءِ آدێنگ ءِ امام ءَ وتی هبرانی گُڈّی بهر ءَ «سائبر اسپیس ءِ تهے بد اخلاقیانی گێش بیگ» ءِ سر ءَ اێراد گپت ءُ گوشت ء: ارمان که اے رۆچاں سائبر اسپیس ءِ تها بنڈ ءُ بدگوشی گێش بوتگ اَنت؛ اے گۆں اخلاق ءَ چپ انت. من پهکان ءَ ڈاه دیان که په وتی دنیاوے سۆباں همدگر ءِ سر ءَ بُھتام مه جن اێں ءُ گۆں کس ءِ نام ءُ توار ءَ گوازی مه کن اێں ءُ شه اے جیڑھاں پھرێز کن اێں.
واجه ءَ گێش کرت: بائد الله ءَ بےهیال مه کن اێں. ما درست یک رۆچے الله تعالیٰ ءِ دربار ءَ پیش به ایں ءُ مئے کارکردانی رد ءَ فیصله کنگ بیت. الله پاک ما مچان ءَ توفیق دنت که اسلام ءِ تعلیماتانی سر ءَ پابند به به اێں.
چمشانک